તેલંગાણાના ફાયરબ્રાન્ડ નેતા અને ગોશામહલના ધારાસભ્ય ટી રાજા સિંહે ભારતીય જનતા પાર્ટી (ભાજપ)માંથી રાજીનામું આપી દીધું છે. તેલંગાણા ભાજપ પ્રમુખ તરીકે એક નવું નામ સામે આવ્યા બાદ તેમણે આ નિર્ણય લીધો છે. પ્રદેશ ભાજપ પ્રમુખ પદ માટે હાઇકમાન્ડે એન રામચંદ્ર રાવના નામ પર સંમતિ દર્શાવી છે. તેનાથી નારાજ થઈને ટી રાજા સિંહે વર્તમાન પ્રદેશ પ્રમુખ બંદી સંજય કુમારને પોતાનું રાજીનામું મોકલી દીધું છે.
ભલે હું પાર્ટી છોડી રહ્યો છું… પણ
પાર્ટીમાંથી રાજીનામું આપવાની જાહેરાત સાથે, ટી રાજા સિંહે એક પત્ર લખ્યો છે. જેમાં તેમણે કહ્યું છે કે, ‘ભલે હું પાર્ટી છોડી રહ્યો છું, હું હિન્દુત્વની વિચારધારા પ્રત્યે સંપૂર્ણ પ્રતિબદ્ધ છું અને આપણા ધર્મ અને ગોશામહલના લોકોની સેવા કરું છું. હું મારો અવાજ ઉઠાવતો રહીશ અને હિન્દુ સમુદાય સાથે વધુ મજબૂત રીતે ઊભો રહીશ.’
આ એક મુશ્કેલ નિર્ણય છે પણ તે જરૂરી છે – ટી રાજા સિંહ
ટી રાજા સિંહે પત્રમાં આગળ લખ્યું, ‘આ એક મુશ્કેલ નિર્ણય છે, પણ જરૂરી છે. ઘણા લોકોના મૌનને સંમતિ ન માનવી જોઈએ. હું ફક્ત મારા માટે જ નહીં, પરંતુ અસંખ્ય કાર્યકરો અને મતદારો માટે બોલી રહ્યો છું જેઓ વિશ્વાસ સાથે અમારી સાથે ઉભા હતા અને જેઓ આજે નિરાશ થઈ રહ્યા છે.’
પીએમ મોદી, નડ્ડા અને અમિત શાહને ખાસ અપીલ
ગોશામહલના ધારાસભ્ય રાજા સિંહે કહ્યું, ‘હું અમારા વરિષ્ઠ નેતૃત્વ – માનનીય પ્રધાનમંત્રી નરેન્દ્ર મોદીજી, ભાજપના રાષ્ટ્રીય અધ્યક્ષ જેપી નડ્ડાજી, અમિત શાહજી અને બીએલ સંતોષજીને પણ નમ્રતાપૂર્વક અપીલ કરું છું કે તેઓ આ માર્ગ પર પુનર્વિચાર કરે. તેલંગાણા ભાજપ માટે તૈયાર છે, પરંતુ આપણે તે તકનો આદર કરવા માટે યોગ્ય નેતૃત્વ પસંદ કરવું જોઈએ અને તેને હાથમાંથી ન જવા દેવી જોઈએ.’ પત્રના અંતે, ટી રાજા સિંહે ‘જય હિંદ. જય શ્રી રામ’ ના નારા સાથે પોતાનું ભાષણ સમાપ્ત કર્યું.
