રામેશ્વરમ ખાતે નવા પંબન બ્રિજના ઉદઘાટનની તૈયારીઓ અંતિમ તબક્કામાં છે. 30 માર્ચ 2025ના રોજ રેલવે, કોસ્ટ ગાર્ડ, રાજ્ય વહીવટી તંત્ર અને પોલીસના અધિકારીઓએ સંયુક્ત રીતે નવા પુલના ઉદઘાટનનું રિહર્સલ સફળતાપૂર્વક પૂર્ણ કર્યું. આ રિહર્સલ દરમિયાન જૂના અને નવા પંબન બ્રિજની કામગીરીનું સંકલન તપાસવામાં આવ્યું. જેમાં ટ્રેનની અવરજવર અને કોસ્ટ ગાર્ડના જહાજના પરિવહનનો સમાવેશ થયો હતો.
જૂનો પુલ ખોલી કોસ્ટ ગાર્ડનું જહાજ પસાર-રિહર્સલના ભાગરૂપે, કોસ્ટ ગાર્ડના જહાજને પસાર થવા દેવા માટે જૂના પંબન બ્રિજનો શેર્ઝર સ્પાન ખોલવામાં આવ્યો. આ સાથે જ નવા પંબન બ્રિજનો લિફ્ટ સ્પાન ઉપાડીને જહાજને બીજી બાજુએથી ક્રોસ કરવાની મંજૂરી આપવામાં આવી. આ પ્રક્રિયામાં સમયનું સિન્ક્રોનાઇઝેશન ચકાસવા, બંને પુલોની ખોલવા-બંધ કરવાની ક્ષમતા પર ખાસ ધ્યાન આપવામાં આવ્યું. જહાજ પસાર થયા બાદ નવા પુલનો ઉપાડેલો ભાગ નીચે ઉતારવામાં આવ્યો અને તેનો સમય નોંધાયો.
ટ્રેનનું સફળ પરીક્ષણ:
નવા પુલનો લિફ્ટ સ્પાન નીચે ઉતાર્યા બાદ, ટ્રેનની અવરજવરની ક્ષમતા ચકાસવા માટે વિશેષ પરીક્ષણ હાથ ધરાયું. પંબન છેડાથી મંડપમ છેડા સુધી અને મંડપમથી પંબન છેડા સુધી ટ્રેન ચલાવવામાં આવી. આ દરમિયાન ટ્રેનની ગતિ, સમય અને પુલની મજબૂતાઈની ચોકસાઈથી તપાસ કરવામાં આવી. અધિકારીઓએ જણાવ્યું કે, આ ટ્રાયલ દરમિયાન બધું જ યોગ્ય રીતે કામ કર્યું અને પરીક્ષણ સંપૂર્ણ સફળ રહ્યું.
નવા પંબન બ્રિજનું મહત્વ:
નવો પંબન બ્રિજ રામેશ્વરમ અને મંડપમ વચ્ચેના રેલ માર્ગને વધુ સુરક્ષિત અને આધુનિક બનાવશે. જૂનો પુલ, જે શેર્ઝર સ્પાન ડિઝાઈન પર આધારિત છે, તે ઘણા વર્ષોથી સેવા આપી રહ્યો હતો. પરંતુ તેની જર્જરિત હાલતને કારણે નવા પુલનું નિર્માણ જરૂરી બન્યું હતું. નવા પુલનો લિફ્ટ સ્પાન દરિયાઈ જહાજોની અવરજવરને સરળ બનાવશે અને રેલવે પરિવહનને પણ અવિરત રાખશે. આ પુલનું ઉદઘાટન રામેશ્વરમના પર્યટન અને સ્થાનિક અર્થતંત્ર માટે મહત્વનું પગલું ગણાશે.
