સુરત જિલ્લામાં ઓલપાડના અટોદરા ગામની સીમમાં જેસીબી ચાલકે દીવાલને ટક્કર મારતા દીવાલ તૂટી પડી હતી અને ત્યાં માટીનું પુરાણ કરતા મહિલા સહીત 3 શ્રમિકો કાટમાળમાં દબાઈ ગયા હતા. આ ઘટનામાં એક મહિલાનું મોત નીપજ્યું છે, જયારે બે લોકો ઈજાગ્રસ્ત થયા છે. આ મામલે જેસીબી ચાલક સામે ઓલપાડ પોલીસ મથકમાં ગુનો નોંધાયો છે.
દિવાલ નીચે દબાતા મહિલાનું મોત
મળતી માહિતી મુજબ, અટોદરા ગામની સીમમાં આવેલ કાવેરી બીઝનેસ પાર્કમાં પ્લોટ નં.06 માં જેસીબી ચાલક આદિત્યકુમાર રામજીતરામએ દીવાલને ટક્કર મારી હતી. જેથી દીવાલ તૂટી પડી હતી અને ત્યાં માટીનું પુરાણ કરતા કૈલાશ વિશાલભાઈ દિનેશભાઈ ભુરીયા, શૈલેષ દિનેશભાઈ ખરાડી તથા શીતલ દિનેશભાઈ ખરાડી કાટમાળમાં દબાઈ ગયા હતા.
કાટમાળ નીચે દબાતા બે ઈજાગ્રસ્ત
ઘટનાને લઈને ત્યાં અફરાતફરી મચી ગયી હતી. જેમાં કૈલાશ વિશાલભાઈ દિનેશભાઈને માથા સહીત શરીરના ભાગે ગંભીર ઈજાઓ પહોચી હોય તેઓનું મોત નીપજ્યું હતું. જયારે અન્ય બે લોકોને ખભા, માથા તથા કમરના ભાગે ઈજા થઈ હતી અને તેઓને સારવાર અર્થે હોસ્પિટલ ખસેડવામાં આવ્યા હતાં. આ મામલે ઓલપાડ પોલીસમ મથકમાં જેસીબી ચાલક સામે ગુનો નોંધવામાં આવ્યો છે. પોલીસે આ મામલે કાયદેસરની કાર્યવાહી હાથ ધરી છે.