ભારતીય રેલવે હવે માત્ર મુસાફરોને જ નહીં, પરંતુ ઝડપી માલસામાન પહોંચાડવામાં પણ નવી ક્રાંતિ લાવવા તૈયાર છે. 145 કિમી પ્રતિ કલાકની ટોપ સ્પીડ હાંસલ કરનારી દેશની પ્રથમ વંદે ભારત આધારિત હાઈ-સ્પીડ ફ્રેટ EMU (કાર્ગો ટ્રેન) નું ટ્રાયલ શરૂ થયું છે. આ ટ્રેન સફળ થઈ તો ઈ-કોમર્સ પાર્સલ, દવાઓ, નાશવંત ખાદ્યપદાર્થો અને કોલ્ડ-ચેન લોજિસ્ટિક્સનું પરિવહન પહેલાં કરતાં વધુ ઝડપથી અને સુરક્ષિત રીતે થઈ શકશે.
ચેન્નાઈની ઇન્ટિગ્રલ કોચ ફેક્ટરી (ICF)માં નિર્મિત 16 કોચની આ પ્રોટોટાઇપ કાર્ગો ટ્રેનનું પરીક્ષણ રાજસ્થાનના કોટા-નાગદા-સવાઈ માધોપુર હાઈ-સ્પીડ રેલવે સેક્શન પર થઈ રહ્યું છે. પશ્ચિમ-મધ્ય રેલવેના જણાવ્યા મુજબ પ્રથમ જ દિવસે ટ્રેને સફળતાપૂર્વક 145 કિમી પ્રતિ કલાકની મહત્તમ ઝડપ હાંસલ કરી હતી. આગામી લગભગ એક મહિના દરમિયાન વિવિધ ગતિ, ભાર અને ઓપરેશનલ પરિસ્થિતિઓમાં તેના અનેક ટેક્નિકલ ટેસ્ટ હાથ ધરાશે.
આ ફ્રેટ EMUમાં કુલ 16 કોચ છે, જેમાં 12 પાર્સલ કોચ, 2 રીફર (રેફ્રિજરેટેડ) વાન અને 2 અન્ય કોચનો સમાવેશ થાય છે. ટ્રેનની કુલ પેલોડ ક્ષમતા 397 ટનથી વધુ છે અને તેમાં 20 ટનથી વધુ એક્સલ લોડ ક્ષમતા છે. ટ્રેનમાં રેફ્રિજરેટેડ પાર્સલ સુવિધા, ફોર્સ્ડ વેન્ટિલેશન, ન્યૂમેટિક રિટ્રેક્ટેબલ રોલર ફ્લોરિંગ, આધુનિક બ્રેકિંગ અને પ્રોપલ્શન સિસ્ટમ જેવી સુવિધાઓ આપવામાં આવી છે. સુરક્ષા માટે ભારતીય રેલવેની કવચ (KAVACH) એન્ટી-કોલિઝન સિસ્ટમ પણ સામેલ કરવામાં આવી છે.
ટ્રાયલ દરમિયાન ઓસિલેશન ટેસ્ટ, ઇમર્જન્સી બ્રેકિંગ, કપલર ફોર્સ, કર્વ પરફોર્મન્સ, ટ્રેક્શન, બ્રેકિંગ, રિજનરેટિવ એનર્જી, સિગ્નલિંગ અને અન્ય સુરક્ષા પરીક્ષણો કરવામાં આવશે. તમામ પરીક્ષણો સફળ રહ્યા બાદ આ હાઈ-સ્પીડ કાર્ગો ટ્રેન દેશના લોજિસ્ટિક્સ ક્ષેત્રમાં ઝડપી અને સમયસર માલ પરિવહન માટે મહત્વપૂર્ણ સાબિત થઈ શકે છે.
