વડોદરા શહેરને નશામુક્ત બનાવવા માટે પોલીસ કમિશનર નરસિંહમ કોમારે ડ્રગ્સ વિરોધી અભિયાનને વધુ અસરકારક બનાવવા નવી રણનીતિ અમલમાં મૂકી છે. યુવા પેઢીને નશાની લતથી બચાવવા માટે સર્ચ, સીઝર, તપાસ અને ચાર્જશીટ સુધીની સમગ્ર પ્રક્રિયા અંગે પોલીસ અધિકારીઓ અને સ્ટાફને વિશેષ તાલીમ આપવામાં આવી છે.
પ્રતાપનગર સ્થિત પોલીસ તાલીમ કેન્દ્ર ખાતે “નશામુક્ત વડોદરા અભિયાન” અંતર્ગત યોજાયેલી વર્કશોપમાં સંયુક્ત પોલીસ કમિશનર નિલેશ જાજડિયા, સેક્ટર હેડ ડો. સુધીર દેસાઈ સહિત તમામ ઝોનના ડીસીપી, એસીપી, પોલીસ ઇન્સ્પેક્ટર અને અન્ય અધિકારીઓ હાજર રહ્યા હતા.
પોલીસ કમિશનર નરસિંહમ કોમારે જણાવ્યું હતું કે NDPS એક્ટ હેઠળના ગુનાઓમાં માત્ર કેસ નોંધવો પૂરતો નથી, પરંતુ સર્ચ, સીઝર, પુરાવા એકત્ર કરવાથી લઈને કોર્ટમાં ટકી શકે તેવી મજબૂત ચાર્જશીટ તૈયાર કરવી પણ એટલી જ જરૂરી છે. આ હેતુસર તમામ પોલીસ મથકોમાં ખાસ “NDPS ટીમ” બનાવવાનો મહત્વપૂર્ણ નિર્ણય લેવામાં આવ્યો છે.
વર્કશોપ દરમિયાન અધિકારીઓને NDPS એક્ટની વિવિધ કલમોની સમજ, કેસ સ્ટડી, ટેકનિકલ અને ડિજિટલ પુરાવા એકત્ર કરવાની પદ્ધતિ તેમજ તપાસમાં થતી સામાન્ય ભૂલો અંગે માર્ગદર્શન આપવામાં આવ્યું હતું. ડ્રગ્સ નેટવર્કની કડીઓ સુધી પહોંચવા અને સપ્લાય ચેઇન તોડવા માટે પ્રોએક્ટિવ પોલીસિંગ પર ભાર મૂકવામાં આવ્યો હતો.
પોલીસ કમિશનરે વધુમાં જણાવ્યું કે ડ્રગ્સ સામેની લડત માત્ર કાયદાકીય કાર્યવાહી સુધી મર્યાદિત નહીં રહે. શાળા-કોલેજોમાં જાગૃતિ કાર્યક્રમો, યુવાનો સાથે સીધો સંવાદ અને સમાજના વિવિધ વર્ગોને જોડીને નશા વિરોધી અભિયાનને વ્યાપક બનાવવામાં આવશે.
આંકડાઓ મુજબ, વર્ષ 2025 દરમિયાન વડોદરા શહેરમાં NDPS એક્ટ હેઠળ કુલ 42 ગુનાઓ નોંધાયા હતા, જ્યારે વર્ષ 2026માં અત્યાર સુધી 11 ગુનાઓ નોંધાયા છે. પોલીસનું માનવું છે કે તાલીમબદ્ધ NDPS ટીમો અને સુનિયોજિત કાર્યવાહી દ્વારા ડ્રગ્સ સંબંધિત પ્રવૃત્તિઓ પર વધુ અસરકારક નિયંત્રણ મેળવી શકાશે.
પોલીસ તંત્રના જણાવ્યા મુજબ, ડ્રગ્સના વધતા જોખમ સામે કડક અમલવારી સાથે જનજાગૃતિ બંનેને સમાન મહત્વ આપવામાં આવશે જેથી યુવા પેઢીને નશાની ગર્તામાં ધકેલાતી અટકાવી શકાય.
