અમેરિકન ઉપરાષ્ટ્રપતિ જેમ્સ ડેવિડ વેન્સ (જેડી વેન્સ) આજથી ચાર દિવસીય ભારત પ્રવાસે આવ્યા છે. અહીં તેમના ભારત પ્રવાસ અંગે સંપૂર્ણ શેડ્યુલ છે. તેઓ વડાપ્રધાન નરેન્દ્ર મોદી સાથે પણ ખાસ બેઠક કરવાના છે. તેઓ જયપુર જતા પહેલા આગ્રાની પણ મુલાકાત લેવાના છે.
યુનાઇટેડ સ્ટેટ્સના ઉપરાષ્ટ્રપતિ જેડી વાન્સ (વેન્સ)આજે સવારે ચાર દિવસની ભારત મુલાકાત માટે દિલ્હી પહોંચ્યા છે, જે દરમિયાન તેઓ વડા પ્રધાન નરેન્દ્ર મોદી સાથે સંભવિત ભારત-અમેરિકા વેપાર કરાર પર બેઠક કરશે તેવી અપેક્ષા છે.
અહીં તેમનું સ્વાગત કેન્દ્રીય મંત્રી અશ્વિની વૈષ્ણવે કર્યું. એરપોર્ટ પર જ તેમને ગાર્ડ ઓફ ઓનર આપવામાં આવ્યું હતું. કલાકારોએ વેન્સ, તેની પત્ની અને બાળકોની સામે પરંપરાગત નૃત્યો રજૂ કર્યા. અમેરિકાના ઉપરાષ્ટ્રપતિ અહીંથી અક્ષરધામ મંદિર જશે.
પીએમ નરેન્દ્ર મોદી સાંજે અમેરિકી ઉપરાષ્ટ્રપતિ માટે રાત્રિ ભોજનનું આયોજન કરશે. વેન્સ વિદેશ મંત્રી એસ. જયશંકર, NSA અજિત ડોભાલ, વિદેશ સચિવ વિક્રમ મિશ્રી અને અમેરિકામાં ભારતીય રાજદૂત વિનય મોહન ક્વાત્રાને મળશે.
વેન્સની અક્ષરધામ મંદિરની મુલાકાતની તૈયારીઓ પૂર્ણ થઈ ગઈ છે. મંદિરનાં પ્રવક્તા રાધિકા શુક્લાએ જણાવ્યું હતું કે જેડી વેન્સ અને ઉષા વેન્સ 11 વાગ્યા પછી ગમેત્યારે મંદિરમાં આવી શકે છે. તેઓ અહીં ભગવાન સ્વામિનારાયણના મંદિરની મુલાકાત લેશે.
જેમ્સ ડેવિડ વેન્સ રિપબ્લિકન પાર્ટીના સભ્ય છે અને યુનાઇટેડ સ્ટેટ્સના 50મા વાઇસ પ્રેસિડેન્ટ છે. જે હાલમાં ચાર દિવસ માટે ભારત મુલાકાતે આવ્યા છે. 2 ઓગસ્ટ 1984 માં જન્મેલા જેડી વેન્સ અમેરિકન રાજકારણીની સાથોસાથ એક સારા લેખક પણ છે. તેઓએ 2023 થી 2025 સુધી યુએસ સેનેટમાં ઓહિયોનું પ્રતિનિધિત્વ કર્યું હતું.
ભારત માટે, જેડી વેન્સની આ મુલાકાત વધુ મહત્વપૂર્ણ સાબિત થઇ શકે છે. કારણ કે બંને દેશો ઇન્ડો-પેસિફિક ક્ષેત્રમાં ચીનના વધતા પ્રભાવનો સામનો કરવા માંગે છે. બંને તેમની મુલાકાત દરમિયાન ટેરિફ અને દ્વિપક્ષીય વેપાર સોદા સંબંધિત મુદ્દાઓ પર ચર્ચા કરે તેવી અપેક્ષા છે. સૂત્રોએ જણાવ્યું હતું કે તેઓ યુએસ સંરક્ષણ સાધનો ખરીદવાના મુદ્દા પર ભારત પર દબાણ કરે તેવી અપેક્ષા છે.
