હરદોઈ જિલ્લાના બિલગ્રામ કોતવાલી વિસ્તારમાં એક રીક્ષા કાબૂ બહાર ગઈ અને પલટી ગઈ. આ અકસ્માતમાં 10 લોકોના કરૂણ મોત થયા છે, જ્યારે પાંચ ગંભીર રીતે ઘાયલ થયા છે. જણાવવામાં આવી રહ્યું છે કે રોશનપુર પાસે બિલ્હૌર-કટરા સ્ટેટ હાઈવે પર આ અકસ્માત થયો હતો. અહીં એકાએક ડીસીએમ દેખાતાં ટેમ્પો રીક્ષા કાબૂ બહાર ગઈ અને પલટી ગઈ.
માહિતી મળતાં જ પોલીસ ઘટનાસ્થળે પહોંચી અને બચાવ કામગીરી શરૂ કરી. પ્રાપ્ત માહિતી અનુસાર, રોશનપુર ગામ પાસે સામેથી આવી રહેલા ડીસીએમને કારણે ટેમ્પો કાબૂ બહાર ગયો હતો અને પલટી ગયો હતો. ટેમ્પોમાં મુસાફરી કરી રહેલા સાત લોકોના ઘટનાસ્થળે જ મોત થયા હતા, જ્યારે ત્રણના સામુદાયિક આરોગ્ય કેન્દ્રમાં મોત થયા હતા.
આ ઘટનામાં ટેમ્પોમાં સવાર પાંચ લોકો ગંભીર રીતે ઘાયલ થયા હતા. મૃતકોમાં પાંચ મહિલાઓ, બે છોકરીઓ, એક બાળક અને બે પુરૂષોનો સમાવેશ થાય છે. ઘાયલો અને મૃતદેહોને સામુદાયિક આરોગ્ય કેન્દ્ર બિલગ્રામ મોકલવામાં આવ્યા છે. ઘટનાની માહિતી મળતાં જ પોલીસ અધિકારીઓ જિલ્લા મુખ્યાલયથી ઘટના સ્થળે રવાના થઈ ગયા છે. દરમિયાન ઘટના બાદ ડીસીએમનો ડ્રાઈવર અને હેલ્પર ઘટનાસ્થળેથી ફરાર થઈ ગયા હતા. પોલીસ મૃતકની ઓળખ કરવાનો પ્રયાસ કરી રહી છે.
