લોકસભા ચૂંટણીના પ્રથમ તબક્કામાં મતદારોની ઓછી ભાગીદારીએ ચૂંટણી પંચની ચિંતા વધારી દીધી છે. વિવિધ પહેલ દ્વારા, પંચ વધુને વધુ મતદારોને મતદાન મથક સુધી લાવવાનો પ્રયાસ કરે છે, પરંતુ પ્રથમ તબક્કામાં મતદાનની ટકાવારી ગયા વખત કરતાં ઓછી રહી છે. ૨૧ રાજ્યો અને કેન્દ્રશાસિત પ્રદેશોની ૧૦૨ બેઠકો પર મતદાન થયું હતું. લોકસભા ચૂંટણી માટે હવે ૬ વધુ તબક્કા બાકી છે (૨૬ એપ્રિલ, ૭ મે, ૧૩ મે, ૨૦ મે, ૨૫ મે અને ૧ જૂન). ૪ જૂને મતગણતરી થશે. ૨૦૧૯ની સરખામણીએ આ વર્ષે ૧૦૨ લોકસભા સીટો પર મતદાન લગભગ ત્રણ ટકા ઓછું હતું. આવી સ્થિતિમાં, ચૂંટણી પંચ નવી વ્યૂહરચના ઘડવામાં વ્યસ્ત છે, જેથી મતદારોનો ઉત્સાહ વધુ રહે.
ચૂંટણી પંચ કારણોની વ્યાપક સમીક્ષા કરી રહ્યું છે જેથી આગામી તબક્કામાં તે દિશામાં વધુ પ્રયાસો કરી શકાય. આ સપ્તાહના અંતે ચૂંટણી પંચમાં ચર્ચા થઈ હતી અને આજથી નવી વ્યૂહરચના આગળ ધપાવવામાં આવશે. કમિશનનું માનવું છે કે ઓછા મતદાનનું સૌથી મોટું કારણ વધી રહેલી ગરમી હોઈ શકે છે કારણ કે છેલ્લી વખત કરતાં આઠ દિવસ મોડા મતદાન શરૂ થયું હતું. તહેવારોની સાથે સાથે લગ્નની પણ સિઝન છે.
એક ખાનગી મીડિયાના અહેવાલ અનુસાર ચૂંટણી પંચ સાથે સંકળાયેલા એક વરિષ્ઠ અધિકારીએ જણાવ્યું કે, ઓછા મતદાનને લઈને ચિંતા વધી છે. મતદાન વધારવા માટે ઘણા પ્રયત્નો કરવામાં આવ્યા હતા પરંતુ તેનું બહુ પરિણામ આવ્યું નથી. અધિકારીએ કહ્યું કે, ECએ લોકોને વોટ કરવા માટે પ્રેરિત કરવામાં જબરદસ્ત કામ કર્યું છે. આ અંગે અનેક યોજનાઓ બનાવવામાં આવી હતી. તેમજ વિવિધ કાર્યક્રમો દ્વારા લોકોને જાગૃત કરવામાં આવ્યા હતા. આ માટે જાણીતી હસ્તીઓ દ્વારા પણ અપીલ કરવામાં આવી હતી. BCCIના સહયોગમાં IPLનો ઉપયોગ પ્લેટફોર્મ તરીકે પણ કરવામાં આવ્યો હતો. જોકે એવું લાગે છે કે આ પ્રયાસો અપૂરતા સાબિત થયા છે.
ઝારખંડના મુખ્ય ચૂંટણી અધિકારી રવિ કુમારે કહ્યું કે, સમગ્ર રાજ્યમાં મતદાર જાગૃતિ કાર્યક્રમ ચાલી રહ્યો છે. તેમણે કહ્યું કે મતદાન પછી તેમની સંસ્થાઓ સાથે સંકળાયેલા તમામ મતદાર જાગૃતિ મંચો મતદારોના પ્રતિસાદ વિશે પંચને જાણ કરશે. આ માટે બિનસરકારી સંસ્થાઓમાં મતદાર જાગૃતિ મંચની રચના કરવામાં આવી છે.
આ પણ વાંચો :-