સુરત શહેરના વરાછા વિસ્તારમાં આવેલી સ્ટેટ બેંક ઓફ ઈન્ડિયાની બ્રાન્ચમાં થયેલી 50 લાખ રૂપિયાની ધોળે દિવસે થયેલી લૂંટ હવે રાજ્યભરમાં ચર્ચાનો વિષય બની ગઈ છે. આ કેસમાં નવા CCTV ફૂટેજ સામે આવતા લૂંટનો સંપૂર્ણ પ્લાન, સમયગાળો અને આરોપીઓની કાર્યપદ્ધતિ એકદમ ફિલ્મી સ્ટાઈલમાં સામે આવી છે. પોલીસ માટે આ કેસ હવે માત્ર ગુનો નહીં પરંતુ પ્રતિષ્ઠાનો પ્રશ્ન બની ગયો છે.
નવી સામે આવેલી માહિતી મુજબ, સાતેય લૂંટારૂઓ બપોરે લગભગ 1:10 વાગ્યે ત્રણ અલગ-અલગ બાઈક પર આવી પહોંચ્યા હતા. તેઓએ બેંકની આસપાસ બાઈક પાર્ક કરી અને ધીમે ધીમે અંદર-બહાર ફરીને પરિસ્થિતિ નિહાળી હતી. એક લૂંટારૂ બહાર ઊભો રહીને નજર રાખતો હતો, જ્યારે બાકીના બેંકની અંદર અને આસપાસ પોઝિશન લઈને ઉભા રહ્યા હતા. તેઓ એકબીજાથી મોબાઇલ દ્વારા સતત સંપર્કમાં હતા, જે બતાવે છે કે આખી ઘટના સંપૂર્ણ પ્લાનિંગ સાથે કરવામાં આવી હતી.
બપોરે 2:01 વાગ્યે કેશ વાન બેંકની બહાર આવીને ઊભી રહી. તેમાં બે ગનમેન અને બે કર્મચારી હતા. જેમ જ કર્મચારીઓએ 38 લાખ રૂપિયાની પેટી બહાર કાઢી અને બેંકમાં લઈ જવા લાગ્યા, તેટલામાં લૂંટારૂઓએ તેમને ઘેરી લીધા. બંદૂકની અણીએ કર્મચારીઓને કાબૂમાં લઈ લેવામાં આવ્યા અને પેટી લૂંટી લેવામાં આવી.
બેંકની અંદરનું ખોફનાક દ્રશ્ય
લૂંટારૂઓ બેંકમાં ઘૂસ્યા બાદ બધું જ ફિલ્મી સ્ટાઈલમાં થયું. ગ્રાહકો અને સ્ટાફને એક ખૂણામાં બેસાડી દેવામાં આવ્યા હતા. દરેકના મોબાઇલ ફોન છીનવી લેવામાં આવ્યા હતા. કોઈ અવાજ ન કરે તે માટે ધમકીઓ આપવામાં આવી હતી. આ દરમિયાન તેઓએ કેશ કાઉન્ટરમાંથી વધુ 12 લાખ રૂપિયા પણ લૂંટી લીધા હતા. આ રીતે કુલ 50 લાખ રૂપિયાની લૂંટ માત્ર થોડા જ મિનિટોમાં પૂર્ણ થઈ ગઈ.
ઘટનાની સૌથી ચોંકાવનારી બાબત એ છે કે લૂંટ બાદ આરોપીઓ એકદમ શાંત રીતે બહાર નીકળ્યા હતા. એક પછી એક પાંચ લૂંટારૂઓ બેગ લઈને બેંક બહાર ઉભેલા ગનમેનની નજર સામે થી પસાર થઈ ગયા. ગનમેનને કોઈ શંકા જ ન આવી. બાદમાં બાકીના આરોપીઓ પણ નીકળી ગયા અને ત્રણ બાઈક પર સવાર થઈને સ્થળ પરથી ફરાર થઈ ગયા હતા.
17 દિવસ સુધી સતત રેકી, પ્રોફેશનલ પ્લાનિંગ
તપાસમાં બહાર આવ્યું છે કે આ લૂંટ એકદમ અચાનક નહોતી. લૂંટારૂઓએ લગભગ 17 દિવસ સુધી સતત બેંક અને કેશ વાનની હરકતો પર નજર રાખી હતી. તેમણે ખાસ કરીને કેશ વાનનો સમય, ગનમેનની પોઝિશન, બેંકની અંદરની સુરક્ષા વ્યવસ્થા અને આસપાસના રસ્તા અને ભાગવાના રસ્તાઓ બાબતેનો અભ્યાસ કર્યો હતો. આથી સ્પષ્ટ થાય છે કે આખી લૂંટ ખૂબ જ વ્યવસ્થિત રીતે ગોઠવવામાં આવી હતી.
ખુલ્લા ચહેરા સાથે લૂંટ – છતાં ઓળખ નહીં!
આ કેસમાં સૌથી ચોંકાવનારી વાત એ છે કે તમામ લૂંટારૂઓ ખુલ્લા ચહેરા સાથે બેંકમાં પ્રવેશ્યા હતા. કોઈ માસ્ક કે બુકાની નહોતી, છતાં પોલીસ હજુ સુધી તેમની ઓળખ કરી શકી નથી. આથી અનુમાન લગાવવામાં આવી રહ્યું છે કે આરોપીઓ સ્થાનિક ન હોઈ શકે અથવા તેઓએ પોતાની ઓળખ છુપાવવા માટે અલગ રીત અપનાવી હોય.
મજૂરો પર શંકા
બેંક સ્ટાફના નિવેદન મુજબ, કેટલાક લૂંટારૂઓ મજૂરો જેવા લાગતા હતા. કારણ કે, તેમના કપડાં સામાન્ય અને ગંદા હતા. તેમના બુટ પર કાદવ લાગેલો હતો અને હાથમાં ખોદકામ જેવું કામ કરતા હોય તેવા નિશાન હતા. છેલ્લા 15-20 દિવસમાં તેઓ બેંક આસપાસ જોવા મળ્યા હતા અને ખાતું ખોલાવા અંગે પૂછપરછ પણ કરતા હતા. આથી નજીકમાં ચાલી રહેલા કામ સાથે જોડાયેલા મજૂરોની સંડોવણીની શંકા વધુ મજબૂત બની રહી છે.
સુરત પોલીસ અને ક્રાઈમ બ્રાન્ચે આરોપીઓના ફોટા અને CCTV ફૂટેજ દેશના અનેક રાજ્યોમાં મોકલ્યા છે, જેમાં ઉત્તર પ્રદેશ, બિહાર, મધ્ય પ્રદેશ, દિલ્હી અને મહારાષ્ટ્રનો સમાવે થાય છે. તેમ છતાં હજુ સુધી કોઈ પણ રાજ્યમાંથી આરોપીઓ વિશે ચોક્કસ માહિતી મળી નથી.
CCTVના આધારે લૂંટારૂઓને શહેરના અનેક વિસ્તારોમાંથી ટ્રેક કરવામાં આવ્યા છે. તેઓ મોરાભાગળ તરફથી આવ્યા હતા અને બાદમાં સરથાણા, વાલક જંક્શન થઈને ઉમરા-વેલંજા તરફ ભાગ્યા હતા. તપાસ સાયણ સુધી પહોંચી ગઈ છે અને હવે મહારાષ્ટ્ર સુધી પણ પોલીસ પહોંચી ગઈ છે.
8 ટીમો મેદાનમાં, મહારાષ્ટ્રમાં પણ સર્ચ ઓપરેશન
આ કેસ ઉકેલવા માટે સુરત પોલીસ, ક્રાઈમ બ્રાન્ચ અને અન્ય એજન્સીઓની કુલ 8 ટીમો સતત કામ કરી રહી છે. ક્રાઈમ બ્રાન્ચની ખાસ ટીમ મહારાષ્ટ્રમાં ધામા નાખીને આરોપીઓની શોધખોળ કરી રહી છે. તેમ છતાં હજી સુધી એક પણ આરોપી પોલીસના હાથમાં આવ્યો નથી. ધોળે દિવસે, ખુલ્લા ચહેરા સાથે, સંપૂર્ણ પ્લાનિંગથી થયેલી આ લૂંટ હવે સુરત પોલીસ માટે સૌથી મોટો પડકાર બની ગઈ છે. દરેક નવી CCTV ક્લિપ સાથે નવા ખુલાસા થઈ રહ્યા છે, પરંતુ આરોપીઓ સુધી પહોંચવું હજુ મુશ્કેલ બની રહ્યું છે.
આ કેસ હવે માત્ર લૂંટ નહીં પરંતુ પોલીસની કામગીરી અને સુરક્ષા વ્યવસ્થાની કસોટી બની ગયો છે. શહેરના લોકોમાં પણ ભયનો માહોલ છે અને સૌની નજર હવે એક જ સવાલ પર છે કે, આ સાતેય લૂંટારૂઓ ક્યારે પકડાશે?
