દેશના પૂર્વ ભાગમાં રેમલ ચક્રવાતનો ખતરો ઝડપથી વધી રહ્યો છે. ભારતીય હવામાન વિભાગ અનુસાર, ચક્રવાત રેમલ આજે મધ્યરાત્રિએ પશ્ચિમ બંગાળ અને બાંગ્લાદેશના દરિયાકાંઠે ત્રાટકશે. હાલમાં કોલકાતા શહેરના કેટલાક વિસ્તારોમાં વરસાદ પડી રહ્યોછે. બંગાળના રાજ્યપાલે લોકોને ચક્રવાતને લઈને સાવચેત રહેવાની સલાહ આપી છે. લોકોને SOPનું પાલન કરવા પણ વિનંતી કરી છે.
ગવર્નર ડૉ સીવી આનંદ બોઝે જણાવ્યું હતું કે તેઓ પરિસ્થિતિ પર નજીકથી નજર રાખી રહ્યા છે અને તેનો સામનો કરવા માટે રાજ્ય અને કેન્દ્રીય નિષ્ણાતોના સતત સંપર્કમાં છે. દિલ્હીમાં પીએમ મોદીએ આ ચક્રવાતનો સામનો કરવાની તૈયારીઓને લઈને સમીક્ષા બેઠક પણ કરી હતી. બાંગ્લાદેશના દરિયાકાંઠાના વિસ્તારોમાંથી ૮ લાખ લોકો સુરક્ષિત સ્થળોએ ખસેડાયા હતા, આથી વિચારી શકાય કે આ વાવાઝોડું કેટલું ભયાનક હશે. વાવાઝોડાને કારણે બાંગ્લાદેશના સતખીરા અને કોક્સ બજાર વિસ્તારના તટીય જિલ્લાઓમાં દરિયામાં ઊંચા મોજા જોવા મળ્યા હતા.
પશ્ચિમ બંગાળના કોલકાતા શહેરના ઘણા ભાગોમાં સતત વરસાદ ચાલુ છે. ચક્રવાત રેમલ વધુ થોડા સમય માટે લગભગ ઉત્તર તરફ અને પછી ઉત્તર-પૂર્વ તરફ આગળ વધવાનું ચાલુ રાખશે. ચક્રવાતી તોફાન રેમલના ઉતરાણ બાદ કોલકાતામાં ભારે વરસાદ ચાલુ છે. વરસાદને કારણે કોલકાતાના ઘણા વિસ્તારોમાં પાણી ભરાઈ ગયા હતા. આટલું જ નહીં તોફાની પવનને કારણે અનેક જગ્યાએ વૃક્ષો ધરાશાયી થયા હતા. જેના કારણે અનેક રસ્તાઓ જામ થઈ ગયા છે. એનડીઆરએફ સહિત તમામ એજન્સીઓ તેમને હટાવવામાં વ્યસ્ત છે.
આ ઉપરાંત હવામાન વિભાગે આજ અને આવતી કાલે અસમ અને બીજા પૂર્વોત્તર રાજ્યોમાં ભારે વરસાદની ચેતવણી જાહેર કરવામાં આવી છે. ચિરાંગ, ગોલપારા, બક્સા, દિમા હસાઓ, કછાર, હૈલાકાંડી અને કરીમગંજ જિલ્લાઓ માટે ‘રેડ એલર્ટ’ જાહેર કરવામાં આવ્યું છે. જ્યારે ધુબરી, દક્ષિણ સલમારા, બોંગાઈગાંવ, બાજલી, તામુલપુર, બારપેટા, નલબારી માટે ‘ઓરેન્જ એલર્ટ’ જાહેર કરવામાં આવ્યું છે.
પશ્ચિમ બંગાળના સાગર દ્વીપ અને બાંગ્લાદેશના ખેપુપારા વચ્ચે ભૂસ્ખલનની આશંકા છે. હાલમાં ચક્રવાત કેન્દ્રની આસપાસ ૧૧૦-૧૨૦ કિમી પ્રતિ કલાકની ઝડપે પવન ફૂંકાઈ રહ્યો છે. ઝડપ ૧૩૫ કિમી પ્રતિ કલાક સુધી વધી શકે છે. આસામ, મેઘાલય, ત્રિપુરા, મણિપુર અને મિઝોરમની સરકારોએ અલગ-અલગ એડવાઈઝરી જારી કરી છે અને નેશનલ ડિઝાસ્ટર રિસ્પોન્સ ફોર્સ, સ્ટેટ ડિઝાસ્ટર રિસ્પોન્સ ફોર્સ, જિલ્લા વહીવટીતંત્ર અને અન્ય સંબંધિત વિભાગોને કોઈપણ પરિસ્થિતિનો સામનો કરવા માટે તૈયાર રહેવા જણાવ્યું છે. આસામ સ્ટેટ ડિઝાસ્ટર મેનેજમેન્ટ ઓથોરિટીએ જણાવ્યું હતું કે IMD એ આસામ તેમજ અન્ય પૂર્વોત્તર રાજ્યોમાં ૨૭ અને ૨૮ મેના રોજ ભારે વરસાદની ચેતવણી આપી છે.
આ પણ વાંચો :-