મુંબઈની પ્રખ્યાત તાજ હોટલ અને ટ્રાઈડન્ટ હોટલને બોમ્બથી ઉડાવી દેવાની ધમકી મળતા શહેરમાં ચકચાર મચી ગઈ હતી. અજાણ્યા શખ્સે ફોન કરીને બંને હોટલોમાં બ્લાસ્ટ કરવાની ધમકી આપતાં જ પોલીસ અને સુરક્ષા એજન્સીઓ તાત્કાલિક એક્શન મોડમાં આવી ગઈ હતી. બંને હોટલોમાં સર્ચ ઓપરેશન હાથ ધરવામાં આવ્યું અને સુરક્ષા કડક બનાવી દેવામાં આવી હતી.

ઘટનાની ગંભીરતાને ધ્યાનમાં રાખીને મુંબઈ પોલીસે ઝડપી કાર્યવાહી કરતાં થોડા જ કલાકોમાં ફોન કરનારનું લોકેશન ટ્રેસ કરી લીધું. તપાસ દરમિયાન જાણવા મળ્યું કે કોલ સાયન વિસ્તારમાંથી કરવામાં આવ્યો હતો. ત્યારબાદ પોલીસે તાત્કાલિક દરોડો પાડીને આરોપીને ઝડપી પાડી કસ્ટડીમાં લીધો હતો.

૨૬/૧૧ના આતંકવાદી હુમલાની યાદોને ધ્યાનમાં રાખીને સુરક્ષા એજન્સીઓ કોઈપણ જોખમ લેવા તૈયાર નહોતી. હોટલના સ્ટાફ અને મહેમાનોને સાવચેત કરવામાં આવ્યા હતા અને સમગ્ર વિસ્તાર પર કડક નજર રાખવામાં આવી રહી હતી.

હાલ પોલીસ આરોપીની ઓળખ, તેની મન્સા અને કોલ પાછળ કોઈ મોટું ષડયંત્ર છે કે માત્ર અફવા ફેલાવવાનો પ્રયાસ છે તેની દિશામાં સઘન તપાસ કરી રહી છે.

પશ્ચિમ બંગાળના ઉત્તર 24 પરગણા જિલ્લાના પાણીહાટી વિસ્તારમાં ભાજપ કાર્યકરો પર દેશી બોમ્બ ફેંકાતા ઓછામાં ઓછા પાંચ કાર્યકર ઘાયલ થયા છે. પોલીસે ગુરુવારે આ માહિતી આપી હતી. આ હુમલો શુભેંદુ અધિકારીના લાંબા સમયથી ખાનગી સહાયક રહેલા ચંદ્રનાથ રથની હત્યાના થોડા કલાકો બાદ થયો હતો. પોલીસે જણાવ્યું કે આ ઘટના મધરાત બાદ પાણીહાટી નગરપાલિકાના વોર્ડ નંબર 2માં દત્તા રોડ પર બની હતી.

સતત ત્રણ બોમ્બ ફેંકાયા
માહિતી મુજબ, કેટલાક ભાજપ કાર્યકરો સામાન્ય લોકો સાથે વાતચીત કરી રહ્યા હતા ત્યારે કેટલાક ઉપદ્રવીઓ બાઈક પર સવાર થઈ સ્થળ પર પહોંચ્યા હતા. પ્રત્યક્ષદર્શીઓએ જણાવ્યું કે બાઈક પર આવેલા ચાર લોકોએ ત્યાં હાજર ભાજપ કાર્યકરો પર બોમ્બ ફેંક્યા હતા. સતત ત્રણ બોમ્બ ફેંકવામાં આવ્યા બાદ ઉપદ્રવીઓ ત્યાંથી ફરાર થઈ ગયા હતા. આ બોમ્બ વિસ્ફોટમાં પાંચ ભાજપ કાર્યકરો ગંભીર રીતે ઘાયલ થયા હતા.

વિસ્તારમાં તણાવ ફેલાયો
આ ઘટનાને કારણે વિસ્તારમાં ભારે તણાવ ફેલાયો હતો. ઘાયલોને ગંભીર હાલતમાં આરજી કાર મેડિકલ કોલેજ અને હોસ્પિટલમાં ખસેડવામાં આવ્યા હતા. અહેવાલો મુજબ ત્યાં તેમની સારવાર ચાલી રહી છે. ઘટનાની જાણ થતાં જ ખરદાહ પોલીસ સ્ટેશનના અધિકારીઓ સ્થળ પર પહોંચ્યા હતા. કેન્દ્રીય દળો પણ ત્યાં પહોંચ્યા હતા. તેમણે પરિસ્થિતિને કાબૂમાં લીધી અને વિસ્તારમાં પેટ્રોલિંગ શરૂ કર્યું. ખરદાહ પોલીસે ઘટનાની તપાસ શરૂ કરી છે. વિસ્તારના CCTV ફૂટેજની તપાસ કરવામાં આવી રહી છે. સાથે જ આરોપીઓને ઝડપી પાડવા માટે સર્ચ ઓપરેશન શરૂ કરવામાં આવ્યું છે.

‘15 વર્ષના મહા જંગલરાજનું પરિણામ’: શુભેંદુ અધિકારી
મધ્યમગ્રામ ઘટનાની પ્રતિક્રિયા આપતાં શુભેંદુ અધિકારીએ ખરદાહમાં થયેલા બોમ્બ વિસ્ફોટનો પણ ઉલ્લેખ કર્યો હતો. તેમણે કહ્યું, “રાજ્યમાં છેલ્લા 15 વર્ષથી બદલો લેવાની રાજનીતિ ચાલી રહી છે. આ 15 વર્ષના મહા જંગલરાજનું પરિણામ છે. ગઈ રાત્રે ખરદાહમાં બોમ્બ વિસ્ફોટ થયો અને બસીરહાટમાં ભાજપ કાર્યકરો પર ગોળીબાર કરવામાં આવ્યો. હિંસા માટે જવાબદાર લોકોને છોડવામાં નહીં આવે.”

ભાજપે તૃણમૂલ કોંગ્રેસ પર પાણીહાટીમાં બોમ્બ વિસ્ફોટ કરાવવાનો આરોપ લગાવ્યો છે. આ વિસ્તાર મધ્યમગ્રામથી લગભગ 7 કિલોમીટર દૂર છે, જ્યાં શુભેંદુ અધિકારીના ખાનગી સહાયકની તેમના ઘરે જતા સમયે ગોળી મારી હત્યા કરવામાં આવી હતી. આરોપ છે કે તૃણમૂલ સાથે જોડાયેલા ઉપદ્રવીઓએ આ બોમ્બ હુમલો કર્યો હતો. જોકે, તૃણમૂલ કોંગ્રેસે આ ઘટના અંગે કોઈ સત્તાવાર ટિપ્પણી કરી નથી.

અનેક જગ્યાઓ પરથી હિંસાના અહેવાલ
પશ્ચિમ બંગાળ વિધાનસભા ચૂંટણીના પરિણામો 4 મેના રોજ જાહેર થયા બાદથી રાજ્યભરમાં હિંસાના અહેવાલો સામે આવી રહ્યા છે. કેટલીક ઘટનાઓમાં તૃણમૂલ કોંગ્રેસના કાર્યકરોની મારપીટ કરવામાં આવી હતી. તેમના પાર્ટી કાર્યાલયોમાં તોડફોડ કરવામાં આવી હતી અને પાર્ટીના પોસ્ટરો ફાડી નાખવામાં આવ્યા હતા. કેટલીક જગ્યાએ ભાજપ કાર્યકરોને નિશાન બનાવવામાં આવ્યા હતા, જેમાંથી અનેક ઘાયલ થયા હતા. પોલીસે જણાવ્યું છે કે આવી પ્રવૃત્તિઓમાં સામેલ લોકો સામે કડક કાર્યવાહી કરવામાં આવશે.