મધ્ય પૂર્વમાં અમેરિકા-ઈરાન યુદ્ધને કારણે હોર્મુઝ સ્ટ્રેટ બ્લોક થતા ભારતમાં ગેસ તંગી સર્જાઇ છે. જોકે ભવિષ્યમાં આવી સમસ્યાઓને રોકવા માટે કેન્દ્ર સરકારે એક યોજના બનાવી છે જે અમલમાં મુકાય તો હોર્મુઝ સ્ટ્રેટની જરૂરિયાત પડશે નહી અને ગેસ ટેન્કરની ટેંશન દૂર થશે. ચાલો જાણીએ કે ભારત સરકારની યોજના શું છે.

મોદી સરકારે દેશની ઉર્જા સુરક્ષા માટે રૂપિયા 40,000 કરોડના ડ્રીમ પ્રોજેક્ટ પર કામ ઝડપી બનાવ્યું છે. ભારત ગલ્ફ દેશોમાંથી અવિરત ગેસ પુરવઠો સુનિશ્ચિત કરવા માટે સમુદ્રની નીચે ઊભી પાઇપલાઇન નાખવાની યોજના પર વિચારી રહ્યુ છે. પેટ્રોલિયમ મંત્રાલયના અધિકારીઓ પાસેથી આ માહિતી પ્રાપ્ત થઈ છે અને ઓમાનથી ભારત સુધી ગેસ પાઇપલાઇનનો પ્રસ્તાવ મૂકવામાં આવ્યો છે.

ઓમાનથી ભારત સુધી પ્રસ્તાવિત મધ્ય પૂર્વ ભારત ડીપવોટર પાઇપલાઇન (MEIDP) પ્રોજેક્ટનો ખર્ચ આશરે ₹40,000 કરોડ થવાનો અંદાજ છે. આ પાઇપલાઇન 2,000 કિલોમીટર લાંબી હશે અને સમુદ્રની નીચે 3,450 મીટરની ઊંડાઈએ નાખવામાં આવશે. આ પાઇપલાઇન બનાવવામાં 5 થી 7 વર્ષનો સમય લાગી શકે છે અને તે ઓમાનને ગુજરાતના દરિયાકાંઠા સાથે સીધી રીતે જોડશે.

પ્રોજેક્ટ મુજબ પાઇપલાઇન ઓમાનથી ભારતમાં દરરોજ 31 મિલિયન સ્ટાન્ડર્ડ ક્યુબિક મીટર કુદરતી ગેસ સપ્લાય કરશે. ભારતની કુદરતી ગેસની માંગ પણ સતત વધી રહી છે. વર્તમાન ગેસનો વપરાશ 190-195 મિલિયન સ્ટાન્ડર્ડ ક્યુબિક મીટર છે, જે 2030 સુધીમાં વધીને 290-300 મિલિયન થવાનો અંદાજ છે. આ પ્રોજેક્ટ આ માંગને પૂર્ણ કરી શકે છે.

કેન્દ્રીય પેટ્રોલિયમ મંત્રાલય જાહેર ક્ષેત્રની કંપનીઓ GAIL, એન્જિનિયર્સ ઇન્ડિયા (EIL) અને ઇન્ડિયન ઓઇલ કોર્પોરેશન (IOC) ને પ્રોજેક્ટ પર કામ આગળ વધારવા માટે ડ્રાફ્ટ રિપોર્ટ તૈયાર કરવા નિર્દેશ આપવા જઈ રહ્યું છે. પાણીની અંદર ગેસ પાઇપલાઇન સાઉથ એશિયા ગેસ એન્ટરપ્રાઇઝના પૂર્વ-શક્યતા સંશોધન પર આધારિત છે. SAGE એ ડેમો પાઇપલાઇન બિછાવીને સંશોધન કર્યુ છે.

ઉત્તર પ્રદેશમાં ભીષણ વાવાઝોડા, વરસાદ અને કરા પડવાને કારણે ભારે તબાહી મચી છે. રાજ્યના અલગ-અલગ જિલ્લાઓમાં ઝાડ પડવા, દીવાલ ધરાશાયી થવી, વીજળી પડવી અને ટીન શેડ ઉડવા જેવી ઘટનાઓમાં અત્યાર સુધીમાં અંદાજે 96 લોકોના મોત થયા છે, જ્યારે હજારો લોકો ઘાયલ થયા છે. હવામાન વિભાગે રાજ્યના 38 જિલ્લાઓમાં વાવાઝોડું, વરસાદ અને વીજળી પડવા અંગે યલો એલર્ટ જાહેર કર્યું છે.

હવામાન વિભાગના જણાવ્યા મુજબ પશ્ચિમ ઉત્તર પ્રદેશ પર બનેલી ચક્રવાત સિસ્ટમ અને દક્ષિણ રાજસ્થાનથી આવતા પૂર્વીય પવનોની અસરને કારણે રાજ્યમાં અનેક સ્થળોએ 80 થી 100 કિલોમીટર પ્રતિ કલાકની ઝડપે પવન ફૂંકાયો હતો. બુધવારે બપોર પછી શરૂૂ થયેલો હવામાનનો આ ફેરફાર સાંજ સુધીમાં મોટા વાવાઝોડામાં ફેરવાઈ ગયો હતો.

UPના અનેક જિલ્લાઓમાં મોટી જાનહાનિ થઈ છે. ભદોહીમાં 10, પ્રયાગરાજ મંડળમાં 10, ફતેહપુરમાં 8, ઉન્નાવમાં 7, બદાયુમાં 6, બરેલીમાં 4, સીતાપુરમાં 2 અને રાયબરેલીમાં 1 મૃત્યુ નોંધાયું છે. આ સિવાય હરદોઈ, ઝાંસી, કાનપુર દેહાત, સંભલ, પ્રતાપગઢ અને અન્ય જિલ્લાઓમાં પણ લોકોએ જીવ ગુમાવ્યા છે. બરેલીમાં ભારે પવનના કારણે એક યુવક ટીનશેડ સાથે 50 ફુટ ઉંચે ઉડયો હતો અને 100 મીટર દૂર પટકાયો હતો.

ઉન્નાવ જિલ્લામાં ભારે વાવાઝોડા અને વરસાદ દરમિયાન અલગ-અલગ ઘટનાઓમાં ત્રણ લોકોના મોત થયા છે. દહી પોલીસ સ્ટેશન વિસ્તારમાં આંબાનું ઝાડ પડવાથી 70 વર્ષીય ખેડૂત રામ આશ્રયનું મોત થયું હતું. જ્યારે આસીવન પોલીસ સ્ટેશન વિસ્તારમાં નીલગિરીનું ઝાડ પડવાથી 9 વર્ષના અંશનું મોત નીપજ્યું હતું. અન્ય બે લોકો ગંભીર રીતે ઘાયલ છે અને તેમની સારવાર લખનઉ ટ્રોમા સેન્ટરમાં ચાલી રહી છે.

અચાનક આવેલા ભયંકર વાવાઝોડાને કારણે સેંકડો ઝાડ અને વીજળીના થાંભલા પડી ગયા છે. અનેક જિલ્લાઓમાં વીજ પુરવઠો ખોરવાઈ ગયો હતો અને રસ્તાઓ પર વાહનવ્યવહાર પ્રભાવિત થયો હતો. કેટલીક જગ્યાએ કાર અને મકાનોને પણ નુકસાન થયું છે. હવામાન વિભાગે લખનઉ, ઉન્નાવ, સીતાપુર, પ્રયાગરાજ, જોનપુર, પ્રતાપગઢ, બાંદા સહિત 38 જિલ્લાઓમાં આગામી કેટલાક કલાકો માટે ભારે વરસાદ, વીજળી પડવા અને 60 કિલોમીટર પ્રતિ કલાકની ઝડપે પવન ફૂંકાવાની ચેતવણી જાહેર કરી છે.

લખનઉ હવામાન કેન્દ્ર મુજબ વેસ્ટર્ન ડિસ્ટર્બન્સની અસરને કારણે આગામી એક-બે દિવસ હવામાન આવું જ રહેશે. ત્યારબાદ 15 મેથી તાપમાનમાં 6 થી 8 ડિગ્રી સેલ્સિયસનો વધારો થઈ શકે છે અને ઘણા જિલ્લાઓમાં પારો 45 ડિગ્રી સેલ્સિયસને પાર કરી શકે છે. મુખ્યમંત્રી કાર્યાલયે તમામ અસરગ્રસ્ત જિલ્લાઓના કલેકટરને રાહત અને બચાવ કાર્ય તેજ કરવા, ઘાયલોને શ્રેષ્ઠ સારવાર પૂરી પાડવા અને મૃતકોના પરિવારજનોને તાત્કાલિક સહાય આપવા સૂચના આપી છે.

ગૂગલ-એપલને વેશ્યાવૃત્તિ, અશ્લીલતાને પોષતી એપ તાત્કાલિક હટાવવા હાઈ કોર્ટે ફરમાન કર્યું છે. દિલ્હી હાઈ કોર્ટે કડક નિર્દેશ આપતાં કહ્યું કે, પ્લે સ્ટોર અને એપ સ્ટોર પર વેશ્યાવૃત્તિ, અશ્લીલતા તથા અન્ય ગુનાહિત ગતિવિધિને પ્રોત્સાહન આપતી મોબાઈલ એપ સામે તાત્કાલિક કાર્યવાહી કરો.

દિલ્હી હાઈ કોર્ટના ચીફ જસ્ટિસ દેવેન્દ્ર કુમાર ઉપાધ્યાય અને જસ્ટિસ તેજસ કારિયાની ખંડપીઠે આ મામલે સુનાવણી કરતી વખતે અત્યંત કડક અને ચિંતાજનક ટિપ્પણી કરી હતી. ખંડપીઠે કંપનીઓને ફટકાર લગાવતા કહ્યું હતું કે, અમે આ દેશની આખી પેઢીને બરબાદ થતા જોઈ શકીએ નહીં. કોર્ટે જણાવ્યું હતું કે મોબાઈલ એપ્સની પહોંચ આજે ઘર-ઘર સુધી થઈ ગઈ છે. નાના બાળકો અને યુવાનો કોઈપણ રોકટોક વગર સરળતાથી આ એપ્સ સુધી પહોંચી જાય છે, જેની સીધી અને વિનાશક અસર આપણા સમાજ અને ખાસ કરીને આપણી યુવા પેઢીની માનસિકતા પર પડી રહી છે. કોર્ટે કંપનીઓને સંપૂર્ણ સાવચેતી રાખવાની સલાહ આપી હતી.

કંપનીઓની પણ છે જવાબદારી
કોર્ટે સ્પષ્ટ કર્યું હતું કે ગૂગલ અને એપલ તેઓ માત્ર એક હોસ્ટ અથવા પ્લેટફોર્મ છે તેવું કહીને પોતાની જવાબદારીમાંથી છટકી શકે નહીં. કોર્ટે જણાવ્યું હતું કે માહિતી ટેકનોલોજી નિયમો, 2021 હેઠળ આ કંપનીઓની એ વૈધાનિક અને નૈતિક જવાબદારી છે કે તેઓ તેમના પ્લેટફોર્મ પર કોઈપણ પ્રકારના ગેરકાયદેસર અને વાંધાજનક કન્ટેન્ટને ફેલાતા અટકાવે. અદાલતે આ ટેક જાયન્ટ્સને એ સુનિશ્ચિત કરવા નિર્દેશ આપ્યો છે કે ભવિષ્યમાં આવી ગેરકાયદેસર એપ્સ તેમની નજર હેઠળ પ્લે સ્ટોર કે એપ સ્ટોર પર અપલોડ જ ન થઈ શકે.

કોર્ટમાં દાખલ કરવામાં આવેલી અરજીમાં ગંભીર આક્ષેપ કરવામાં આવ્યો હતો કે ગૂગલ પ્લે સ્ટોર અને એપલ એપ સ્ટોર પર એવી અનેક એપ્સ ઉપલબ્ધ છે જે પોર્નોગ્રાફિક સામગ્રી, અનૈતિક તસ્કરી, વેશ્યાવૃત્તિ, નશીલા પદાર્થોનો દુરુપયોગ, ગેરકાયદેસર હથિયારોની હેરફેર અને સંગઠિત ગુનાખોરીને પ્રોત્સાહન આપે છે.

અરજીકર્તાના વકીલે જણાવ્યું હતું કે આ એપ્સ આવા ગુનાહિત કાર્યો દ્વારા કરોડો ડોલરની કમાણી કરી રહી છે. કેન્દ્ર સરકાર વતી એડિશનલ સોલિસિટર જનરલ ચેતન શર્માએ પણ આ અરજીને સમર્થન આપ્યું હતું. તેમણે કોર્ટમાં રજૂઆત કરી હતી કે સરકાર એકલી વિશ્વભરમાં બધું જ બ્લોક કરી શકે નહીં, તેથી આ બાબતે મધ્યસ્થીઓની ભૂમિકા અત્યંત મહત્વની બની રહે છે.

કોર્ટે ગૂગલ, એપલ અને ભારતીય કમ્પ્યુટર ઇમરજન્સી રિસ્પોન્સ ટીમને તેઓ આવી એપ્સના પ્રસારને તાત્કાલિક રોકે અને 2021 ના આઈટી (IT) નિયમોનું ચુસ્તપણે પાલન કરે તેવો નિર્દેશ આપ્યો હતો. ઉપરાંત કોર્ટે આ કંપનીઓને આગામી સુનાવણી સુધીમાં કરવામાં આવેલી કામગીરીનો રિપોર્ટ દાખલ કરવા પણ જણાવ્યું હતું.