કેનેડામાં 1 વર્ષ પહેલા સ્ટુડન્ટ વિઝા પર ગયેલી ભારતીય યુવતીનું હાર્ટ એટેક આવતા મોત નીપજ્યું છે. પરિવારજનોના જણાવ્યા પ્રમાણે તેમની દીકરીને ક્યાંય નોકરી જ નહોતી મળી રહી અને કરિયરનાં ટેન્શનને લીધે તે સતત મેન્ટલ સ્ટ્રેસમાં રહેતી હતી. આ દરમિયાન છેલ્લા કેટલાક દીવસોથી એને તબિયત પણ ખરાબ હતી. ઉલ્લેખનીય છે કે કેનેડામાં અત્યારે જોબ ક્રાઈસિસ, હાઉસિંગ ક્રાઈસિસ અને સતત વધી રહેલી મોંઘવારીથી ત્યાં ગયેલા ભારતીયોને પડ્યા પર પાટુ વાગ્યું છે. આવામાં હવે સતત જોબ અને હાઉસિંગ રેન્ટના કારણે ટેન્શનમાં રહેતા ૧૨ ટકા જેટલા ભારતીયો કેનેડા છોડી અન્ય દેશમાં અથવા ભારત જ ફરીથી આવીને સેટલ થવાનું મન બનાવી રહ્યા છે.

લુધિયાણાનાં રાયકોટની ૨૩ વર્ષીય યુવતી તનવીર કૌર ૧ વર્ષ પહેલા કેનેડા સ્ટુડન્ટ વિઝા પર ગઈ હતી. તેના માતા-પિતાએ જણાવ્યું કે અમારી દીકરી ભણવામાં હોંશિયાર હતી. આ સમયે તેને હાયર એજ્યુકેશન માટે અને કરિયરમાં વધારે આગળ વધુ હતું તેથી કેનેડા જવાનો પ્લાનિંગ શરૂ કર્યો હતો. જોકે આ તમામ સમયગાળા દરમિયાન તેને સ્ટુડન્ટ વિઝા માટે પણ ઘણી મહેનત કરી હતી અને જેવા એને વિઝા મળ્યા કે તરત ઘરમાં અમારે ઉજવણીનો માહોલ જામી ગયો હતો. તે કેનેડાના બ્રેમ્પટનની યુનિવર્સિટીમાં અભ્યાસ કરવા માટે જવાની હતી. તેનું સપનું હતું કે તે બ્રેમ્પટનમાં સેટલ પણ થઈ જાય અને સારી એવી નોકરી કરીને પોતાની કારકિર્દીને આગળ વધારે.

તેમણે વધુમાં કહ્યું કે અમે અમારી દીકરીને ખુબ જ ઈચ્છાઓ અને આશાઓ સાથે કેનેડા ભણવા માટે મોકલી હતી. અહીં બ્રેમ્પટન પહોંચતા જ તેને શરૂઆતમાં બધુ બરાબર લાગ્યું હતું અને ભણવા પર તેને ધ્યાન કેન્દ્રિત કરી દીધું હતું. જોકે પહેલા એકાદ મહિનો તેને નોકરી ન મળી તો અમે તેને સમજાવતા કે ચિંતા ન કરતી હજુ નવો દેશ છે તો થોડો સમય લાગશે. પરંતુ ધીમે ધીમે તેને ત્યાં ભણવામાં તો મન લાગતું પરંતુ ભણ્યા પછી જો નોકરી જ ન મળી તો એનું ટેન્શન થવા લાગ્યું હતું.

તનવીર કૌર અભ્યાસ કરવાની સાથે સાથે સતત પાર્ટ ટાઈમ નોકરી કરવા માટે પણ શોધખોળ કરી રહી હતી. પરંતુ એની ફિલ્ડને લગતી તેને જોઈએ એવી સારી નોકરી ક્યાંય નહોતી મળી રહી. મીડિયા રિપોર્ટ્સ પ્રમાણે યુવતીને સતત મેન્ટલ સ્ટ્રેસ વધવા લાગ્યો હતો. તેને એક જ વસ્તુ મગજમાં ચાલતી હતી કે આટલી બધી હોંશિયાર હોવા છતા કેમ મને નોકરી નથી મળી રહી. આના પરિણામે તેને ઓવરથિંકિંગ શરૂ થઈ ગયું હતું. આ અંગે તે પરિવારને પણ જાણ કરતી રહેતી હતી કે મને ભવિષ્યનું ટેન્શન થાય છે. અહીં જોબ ક્રાઈસિસ એટલા બધા વધી ગયા છે કે એક એક પોઝિશન માટે લોકોની લાંબી લાંબી લાઈનો લાગે છે. હવે આ અંગે થોડા દિવસો પહેલા જ ચર્ચા થઈ અને બાદમાં મોડી રાત્રે તનવીર કૌરનું કેનેડામાં હાર્ટ એટેક આવતા મોત નીપજ્યું હતું.

પરિવારે બાદમાં સરકારને મદદ માટે અપિલ કરી છે કે અમારી દીકરીનું કેનેડામાં અવસાન થયું છે અને તમે એનું પાર્થિવ શરીર ભારત લાવવામાં અમારી મદદ કરો. તેમના ગામમાં જ્યારે આ ઘટના અંગે જાણ કરવામાં આવી તો સંબંધીઓ અને પાડોશીઓમાં પણ શોક પ્રસરી ગયો હતો. પરિવારમાં માતા પિતાએ પણ એમ કહ્યું કે અમને અમારા દીકરીના સારા ભવિષ્યની ચિંતા હતી પરંતુ કેનેડા જઈને સેટલ થવા ગયેલી અમારી દીકરીના નસીબમાં કઈક બીજું જ લખાયું હશે. કુદરતને જે મંજૂર હતુ એ કર્યું અને અમે હજુ સુધી આ વાત પચાવી જ નથી શકતા કે અમારી દીકરી હવે અમારી સમક્ષ હાજર નથી.