ગુજરાત પોલીસના સુરત અને અમદાવાદની ટિમ દ્વારા ગતરાત્રે એક મોટું ઓપરેશન હાથ ધરીને ગેરકાયદે રહેતા લગભગ હજાર બાંગ્લાદેશીઓને પકડવામાં આવ્યા હતા.

પહેલગામમાં આતંકવાદી હુમલો થયા બાદ કેન્દ્ર સરકારે તમામ રાજ્યોને ગેરકાયદે રહેતાં પાકિસ્તાની તથા બાંગ્લાદેશી નાગરિકોને તત્કાળ પકડીને રવાના કરવા માટે કહ્યા બાદ ગઈ રાત્રે ગુજરાત પોલીસે અમદાવાદ અને સુરતમાં મોટું ઓપરેશન હાથ ધર્યું હતું. આ બંને શહેરોમાં ગેરકાયદે રહેતા બાંગ્લાદેશીઓ પકડાયા હતા. અમદાવાદમાંથી 890 તેમજ સુરતમાં થઈ 134 બાંગ્લાદેશીઓને પકડવામાં આવ્યા હતા. ગેરકાયદેસર રીતે રહેતા આ બાંગ્લાદેશી બંગાળથી ઘુસ્યા હતા અને ત્યારબાદ ગેરકાયદેસર ડોક્યુમેન્ટ ઉભા કરીને દેશના અલગ અલગ રાજ્યમાં રહેતા હતા. પકડાયેલા બાંગ્લાદેશીઓમાંથી કેટલાય ડ્રગ્સના ધંધા સાથે સંકળાયેલા છે. અગાઉ પકડાયેલા ચાર બાંગ્લાદેશીઓ અલ કાયદા નામના આતંકવાદી સંગઠન માટે કામ કરતા હતા.

આ ઓપરેશન બાદ રાજ્યના ગૃહમંત્રી હર્ચેષ સંઘવીએ ચેતવણી આપી હતી કે જેઓ ગેરકાયદેસર રીતે ગુજરાતમાં રહે છે તે તમામ નજીકના પોલીસ સ્ટેશનના હાજર થઈ જાય. તેઓ હાજર નહીં થાય તો ગુજરાત પોલીસ ન ભૂતો ન ભવિષ્ય જેવી કાર્યવાહી કરશે.કેન્દ્રીય સુરક્ષા એજન્સીઓ દ્વારા આપવામાં આવેલા નિર્દેશ અનુસાર કામગીરી કરવામાં આવી રહી છે. પાકિસ્તાનીઓને પણ પરત મોકલવાની કામગીરી ચાલી રહી હોવાનું કહી હર્ષ સંઘવીએ સુરત પોલીસ અને અમદાવાદ પોલીસને અભિનંદન આપ્યા હતા.

એસીપી ડીસીપી સહિતના તમામ અધિકારીઓ અને પોલીસ કર્મચારી આખી રાત ખડે પગે રહ્યા હતા. ગૃહ મંત્રીએ આપી ઘૂસણખોરોને ચેતવણી હતી. આવનારા બે દિવસોમાં તમામ ગેરકાયદેસર રહેતા બાંગ્લાદેશીઓ પોલીસ સ્ટેશનમાં જઈ સરેન્ડર કરે નહીં તો પોલીસ ઘરે ઘરે જઈને પકડશે. ગેરકાયદે રહેનારાઓને શરણ આપનારાઓને પણ ગુજરાત પોલીસ નહીં છોડે. આ તમામ બાંગ્લાદેશીઓને ફેક ડોક્યુમેન્ટ બનાવી આપનારાઓને પણ પકડવામાં આવશે.

વડાપ્રધાન નરેન્દ્ર મોદીની બેઠક બાદ ભારત સરકારે પગલા ઉઠાવ્યા છે

કાશ્મીર ખીણમાં ઉશ્કેરણીજનક કાર્યવાહી અને આતંકવાદને પ્રોત્સાહન આપતા પાકિસ્તાને ફરી એકવાર નિયંત્રણ રેખા પર યુદ્ધવિરામનું ઉલ્લંઘન કર્યું છે. ૨૫-૨૬ એપ્રિલની રાત્રે, પાકિસ્તાનની ઘણી સૈન્ય ચોકીઓએ કોઈપણ ઉશ્કેરણી વિના ગોળીબાર કરતાં ભારતીય સેનાએ જડબાતોડ જવાબ આપ્યો હતો. આજે શ્રીનગર સ્થિત સંરક્ષણ વિભાગના એક અધિકારીએ માહિતી આપતાં જણાવ્યું હતું કે, ભારતે પાકિસ્તાન સામે કરેલી જવાબી કાર્યવાહીમાં કોઈ જાનહાનિના હેવાલ નથી.
આ ઘટના એવા સમયે બની છે જ્યારે પહેલગામમાં થયેલા આતંકવાદી હુમલા બાદ ભારતીય સુરક્ષા દળો ખીણમાં આતંકવાદીઓ સામે સતત કાર્યવાહી કરી રહ્યા છે. તાજેતરમાં, સુરક્ષા દળોએ લશ્કર-એ-તૈયબાના આતંકવાદી એહસાન અહેમદ શેખના બે માળના ઘરને IED વડે ઉડાવી દીધું હતું. એહસાન પુલવામા જિલ્લાના મુરાન વિસ્તારનો રહેવાસી હતો અને જૂન 2023 થી લશ્કર સાથે સંકળાયેલો હતો.
પહેલગામમાં થયેલા હુમલા બાદ ભારતે કડક વલણ અપનાવ્યું છે અને પાકિસ્તાન સામે કડક કાર્યવાહી શરૂ કરી દીધી છે. સૌ પ્રથમ, ભારત સરકારે સિંધુ જળ સંધિ રદ કરવા તરફ પગલાં લીધાં છે. શુક્રવારે કેન્દ્રીય ગૃહમંત્રી અમિત શાહ અને જળશક્તિ મંત્રી સી.આર. પાટિલ વચ્ચે આ મુદ્દે એક મહત્વપૂર્ણ બેઠક યોજાઈ હતી. એવું નક્કી કરવામાં આવ્યું હતું કે પાકિસ્તાનને હવે સિંધુ નદીનું પાણી મળશે નહીં અને આ માટે તાત્કાલિક પગલાં લેવામાં આવશે.
બેઠકમાં નિર્ણય લેવામાં આવ્યો કે સિંધુ નદીમાંથી કાંપ દૂર કરવાનું અને ડ્રેજિંગનું કામ ટૂંક સમયમાં શરૂ કરવામાં આવશે. આ ઉપરાંત, પાણીને અન્ય નદીઓમાં વાળવા, સૂકા વિસ્તારોમાં સિંચાઈ માટે તેનો ઉપયોગ કરવા અને નવા બંધોના નિર્માણ અંગે પણ ચર્ચા કરવામાં આવી હતી. આ રણનીતિને પાકિસ્તાનને રાજદ્વારી અને પાણી આધારિત જવાબ આપવાની દિશામાં ભારતનું એક મોટું પગલું માનવામાં આવી રહ્યું છે.