બિહાર વિધાનસભા ચૂંટણી માટે રાજકીય પક્ષોએ તૈયારી આરંભી દીધી છે. જેમાં બિહાર વિધાનસભા ચૂંટણી માટે બેઠકોની વહેંચણી અંગે એનડીએ જાહેરાત કર્યા બાદ હવે ઉમેદવારોના નામો અંગે ચર્ચા ચાલી રહી છે. જયારે સુત્રો દ્વારા મળતી માહિતી મુજબ ભાજપે તમામ 101 ઉમેદવારોના નામ નક્કી કરી લીધા છે. જેમાં પક્ષના 16 વર્તમાન ધારાસભ્યોની ટિકિટ કપાય શકે છે. જેમાં 75 વર્ષથી વધુ ઉંમરના લોકોને પણ ટિકિટ આપવામાં આવી શકે છે.

બિહારમાં એનડીએ સત્તામાં આવશે
આ ઉપરાંત બિહાર ભાજપ પ્રમુખ દિલીપ જયસ્વાલે જણાવ્યું હતું કે ભાજપ સોમવારે સાંજે ઉમેદવારોની જાહેરાત શરૂ કરશે. પટનામાં પત્રકારો સાથે વાતચીતમાં જણાવ્યું હતું કે, એનડીએ ગઠબંધને બેઠકોની વહેંચણીની જાહેરાત કરી છે. તેમજ ફરી એકવાર બિહારમાં એનડીએ સત્તામાં આવશે.

એનડીએની બેઠક વહેંચણી ફોર્મ્યુલા
બિહારમાં વિધાનસભા ચૂંટણીની જાહેરાત બાદ પ્રચાર પૂરજોશમાં ચાલી રહ્યો છે. ત્યારે એનડીએ બેઠક વહેંચણી મુદ્દે સર્જાયેલી મડાગાંઠ પર ઉકેલાઈ ગઈ છે. જેમાં બિહારમાં ભાજપના પ્રભારી ધર્મેન્દ્ર પ્રધાને સોશિયલ મીડિયા પર એનડીએ ની બેઠક વહેંચણી ફોર્મ્યુલા શેર કરી હતી. જેમાં ભાજપ 101 બેઠક અને નીતિશ કુમારની જેડીયુ પણ 101 બેઠક પર ચૂંટણી લડશે. જયારે ચિરાગ પાસવાનના નેતુત્વવાળી એલજેપીને 29, આરએલએમને 06 અને એચએએમને 06 બેઠક ફાળવવામાં આવી છે.

કોણ કેટલી બેઠકો પર લડશે ચૂંટણી ?
ઉલ્લેખનીય છે કે વહેંચણીમાં સીએમ નીતિશકુમારની જનતા દળ યુનિટ અને ભાજપ 101-101 બેઠકો પર ચૂંટણી લડશે. જ્યારે 243 સીટ નાના સાથી પક્ષોને ફાળવવામાં આવી છે. કેન્દ્રીય મંત્રી ચિરાગ પાસવાનની એલજેપી (રામ વિલાસ પાસવાન) 29 બેઠકો પર ચૂંટણી લડશે, જ્યારે કેન્દ્રીય મંત્રી જીતન રામ માંઝીની એચએએમ (હિન્દુસ્તાની અવમ મોરચા) અને રાજ્યસભા સાંસદ ઉપેન્દ્ર કુશવાહાની આરએલએમ છ-છ બેઠકો પર ચૂંટણી લડશે.

એચએએમ અને આરએલએમએ બેઠક વહેંચણી વ્યવસ્થા પ્રત્યે અસંતોષ વ્યક્ત કર્યો છે. આજે સવારે દિલ્હીથી પરત ફર્યા બાદ, નાયબ મુખ્યમંત્રી વિજય સિંહાએ જણાવ્યું હતું કે બેઠક વહેંચણી વ્યવસ્થા પરસ્પર સંમતિથી સંમતિ થઈ હતી. તેમણે દાવો કર્યો હતો કે તેઓ સંપૂર્ણ બહુમતી સાથે સરકાર બનાવશે.

બિહાર વિધાનસભા ચૂંટણી માટે તૈયારી કરી રહેલી રાજકીય રણનીતિકાર પ્રશાંત કિશોરની પાર્ટી જનસુરાજએ ઉમેદવારોની બીજી યાદી જાહેર કરી દીધી છે. જનસુરાજના વડા પ્રશાંત કિશોરે સોમવારે 65 ઉમેદવારોના નામની જાહેરાત કરી હતી. આ પહેલાં, પાર્ટીએ 51 ઉમેદવારોની પ્રથમ યાદી બહાર પાડી હતી. આ બે યાદીઓને ભેગી કરતાં, જનસુરાજે અત્યાર સુધીમાં 100થી વધુ (કુલ 116) બેઠકો પર પોતાના ઉમેદવારોના નામ જાહેર કર્યા છે.

પ્રથમ યાદીમાં મુખ્ય નામો અને જાતિગત સમીકરણ

• જનસુરાજની પ્રથમ યાદીમાં કેટલાક નોંધનીય નામોનો સમાવેશ થાય છે:
• સમસ્તીપુરની મોરવા વિધાનસભા બેઠક પરથી સ્વર્ગસ્થ મુખ્યમંત્રી કર્પૂરી ઠાકુરના પૌત્રી જાગૃતિ ઠાકુર.
• પૂર્વ કેન્દ્રીય મંત્રી RCP સિંહની પુત્રી લતા સિંહને અસ્થાવાં બેઠક પરથી ટિકિટ.
• ગોપાલગંજ બેઠક પરથી પ્રીતિ કિન્નર ને ઉમેદવાર બનાવવામાં આવ્યા છે.
• પ્રથમ યાદીના જાતિગત સમીકરણ ની વાત કરીએ તો, સૌથી વધુ EBC (અત્યંત પછાત વર્ગ) માંથી 17 ઉમેદવારો, SC/ST માંથી 7, OBC માંથી 11, લઘુમતી માંથી 9 અને સામાન્ય વર્ગ માંથી 7 લોકોને ટિકિટ આપવામાં આવી હતી.

બિહાર વિધાનસભા ચૂંટણી પહેલા, રાષ્ટ્રીય જનતા દળ (RJD) ના વડા લાલુ પ્રસાદ યાદવ, તેમની પત્ની અને બિહારના ભૂતપૂર્વ મુખ્યમંત્રી રાબડી દેવી અને પુત્ર તેજસ્વી યાદવ માટે મુશ્કેલીઓ વધી ગઈ છે. IRCTC કૌભાંડમાં એક મોટા ચુકાદામાં, દિલ્હીની રાઉઝ એવન્યુ કોર્ટે ત્રણેય સામે ભ્રષ્ટાચારના આરોપો ઘડ્યા છે. તેમની સામે સીબીઆઈના આરોપોમાં લાલુ પ્રસાદ યાદવ અને તેમના પરિવાર દ્વારા ટેન્ડરમાં દખલગીરીનો આરોપ છે.

લાલુ, રાબડી અને તેજસ્વી પર કેસ ચલાવવામાં આવશે. લાલુ યાદવ પર ભ્રષ્ટાચાર, ગુનાહિત કાવતરું અને છેતરપિંડીનો આરોપ છે. વધુમાં, રાબડી દેવી અને તેજસ્વી યાદવ પર ભારતીય દંડ સંહિતા (IPC)ની કલમ 420 (છેતરપિંડી) અને 120B (ગુનાહિત કાવતરું) હેઠળ આરોપ મૂકવામાં આવ્યો છે. જો ત્રણેય સામેના આરોપો સાબિત થાય છે, તો તેમને એક થી સાત વર્ષની જેલની સજા થઈ શકે છે.

હવે જાણો શું છે IRCTC કૌભાંડ
આ કેસ 2004 થી 2009ના સમયગાળાનો છે, જ્યારે લાલુ પ્રસાદ યાદવ કેન્દ્રીય રેલવે મંત્રી હતા. CBIનો આરોપ છે કે આ દરમિયાન, બે IRCTC હોટલ (રાંચી અને પુરીમાં) માટે જાળવણીનો કોન્ટ્રાક્ટ સુજાતા હોટેલ્સ નામની ખાનગી કંપનીને ખોટી રીતે આપવામાં આવ્યો હતો.

તપાસ એજન્સીનો દાવો છે કે લાલુ પરિવારને આ સોદાના બદલામાં પટનામાં કિંમતી જમીન મળી હતી. લાલુ પરિવાર ઉપરાંત, તત્કાલીન IRCTC ગ્રુપના જનરલ મેનેજર વીકે અસ્થાના, આરકે ગોયલ અને સુજાતા હોટેલ્સના ડિરેક્ટર વિજય અને વિનય કોચર પણ આ કેસમાં આરોપી છે.

CBIના એડિશનલ ડિરેક્ટર રાકેશ અસ્થાનાએ કોર્ટને જણાવ્યું હતું કે જ્યારે લાલુ પ્રસાદ યાદવ રેલવે મંત્રી હતા, ત્યારે પુરી અને રાંચીમાં રેલવેની BNR હોટલને IRCTCને ટ્રાન્સફર કરવામાં આવી હતી. જાળવણી અને સુધારો કરવા માટે તેમને ભાડે આપવાની યોજના હતી.

આ પ્રોજેક્ટ માટેનું ટેન્ડર વિનય કોચરની કંપની, મેસર્સ સુજાતા હોટેલ્સને આપવામાં આવ્યું હતું. ટેન્ડર પ્રક્રિયામાં ગોટાળા કરવામાં આવ્યા હતા. તત્કાલીન IRCTCના MD, પીકે ગોયલે ટેન્ડર પ્રક્રિયા પૂર્ણ કરી હતી. 17 જુલાઈ, 2017ના રોજ, CBIએ લાલુ પ્રસાદ યાદવ અને અન્ય પાંચ લોકો વિરુદ્ધ એફઆઈઆર દાખલ કરી. વિનય કોચર અને અન્ય આરોપીઓના 12 સ્થળોએ દરોડા પાડવામાં આવ્યા હતા.

હવે લેન્ડ ફોર જોબ્સ કૌભાંડ વિશે જાણો
CBIનું કહેવું છે કે આખું કાવતરું 2004 થી 2009ની વચ્ચે ઘડાયું હતું, જ્યારે લાલુ પ્રસાદ યાદવ કેન્દ્રીય રેલવે મંત્રી હતા. તપાસ એજન્સીએ જણાવ્યું હતું કે આ દરમિયાન, લગભગ તમામ કેસોમાં, નોકરી આપતા પહેલા જ જમીન ટ્રાન્સફર કરવામાં આવી હતી અને મોટાભાગના કેસોમાં, ગિફ્ટ ડીડ તૈયાર કરવામાં આવ્યા હતા.

CBIએ ચાર્જશીટમાં એવો પણ દાવો કર્યો છે કે જ્યારે લાલુ યાદવ રેલવે મંત્રી હતા, ત્યારે તેમના નજીકના સહાયક ભલ્લા યાદવે ગામમાં જઈને કહ્યું હતું કે તેમના પરિવારના સભ્યોને નોકરી અપાવવાના બદલામાં, તેઓ પોત-પોતાની જમીન લાલુ પરિવારના નામે ટ્રાન્સફર કરે. લાલુ પરિવારના નામે જમીન ટ્રાન્સફર કરનારા તમામ આરોપીઓએ દાવો કર્યો છે કે તેમને લાલુ પરિવાર દ્વારા રોકડમાં ચૂકવણી કરવામાં આવી હતી.