Home Blog Page 291

અરબ સાગરનું ડિપ્રેશન ગુજરાત તરફ વળ્યું, રાજ્ય પર કુદરતી આફતનું સંકટ ઘેરાયું

News Editor
-
0
અરબ સાગરનું ડિપ્રેશન ગુજરાત તરફ વળ્યું, રાજ્ય પર કુદરતી આફતનું સંકટ ઘેરાયું

ગુજરાત માથે ફરી એક વાર મોટી ઘાત આવી રહી છે. એક તરફ પ્રચંડ વાવાઝોડુ મોન્થા આંધ્રપ્રદેશના કાકીનાડા કાંઠા નજીક પ્રતિ કલાકની 110 કિ.મી.ની વિનાશક ઝડપ સાથે ધસી આવ્યું છે. બીજી બાજું ગુજરાતમાં મુશળધાર કમોસમી વરસાદ વરસાવીને ખેડૂતોની માઠી દશા સર્જનાર પૂર્વે-મધ્ય અરબી સમુદ્રમાં રહેલું ડિપ્રેશન આજે ગુજરાતની દિશા તરફ આગળ વધ્યું છે.

સોમવારે તે વેરાવળથી 570 કિ.મી.ના અંતરે હતું અને મંગળવારે સાંજના અહેવાલ મૂજબ તે 480 કિ.મી. દૂર હતું, એક દિવસમાં આશરે 100 કિ. મી.નજીક આવ્યું છે. વળી, આ ડિપ્રેશન સાથે ગુજરાતના પડોશી રાજ્ય રાજસ્થાન ઉપર સાયક્લોનિક સર્ક્યુલેશન સર્જાયું છે જેના પગલે મધ્ય ગુજરાત થઈને અરબી સમુદ્રથી રાજસ્થાન સુધી સમુદ્ર સપાટીથી 1.5 કિ.મી. ઉંચાઈએ ભારે વરસાદ લાવે તેવું ટ્રફ સર્જાયો છે. આ ઉપરાંત વેસ્ટર્ન ડિસ્ટર્બન્સ કે જે સામાન્ય માવઠાં વરસાવે છે તે પણ સક્રિય છે. આમ, ગુજરાતમાં માવઠાંની માઠી દશા હજુ જારી રહેશે.

હવામાન વિભાગની આગાહી
હવામાન વિભાગે બુધવારે અમરેલી, ભાવનગર જિલ્લામાં અતિ ભારે વરસાદનું (ઓરેન્જ એલર્ટ) અને દક્ષિણ ગુજરાતના ભરુચ, સુરત, ડાંગ, નવસારી, વલસાડ, તાપી, જૂનાગઢ, સોમનાથ, બોટાદ જિલ્લા તેમજ દીવ-દમણમાં ભારે વરસાદની અને રાજ્યના અન્ય જિલ્લામાં 30-40 કિ.મી ઝડપે પવન સાથે તોફાની વરસાદની ચેતવણી જારી કરી છે.

ડિપ્રેશન મંગળવારે ઉત્તર-પૂર્વ દિશામાં એટલે કે સૌરાષ્ટ્ર ભણી કલાકના 7 કિ.મી.ની ઝડપે આગળ વધ્યું હતું અને આ જ દિશામાં આગળ વધવાનું પૂર્વાનુમાન છે. આ ઉપરાંત કેટલાક મોડેલો અનુસાર ડીપ ડિપ્રેશનમાં ફેરવાઈને વધુ તીવ્ર બની શકે છે.

ગુજરાતમાં ભારે વરસાદથી ખેડૂતોમાં ડિપ્રેશન લાવનાર અરબી સમુદ્રનું ડિપ્રેશન અને આંધ્રપ્રદેશ પર ત્રાટકતું વાવાઝોડું કે જેનું નામકરણ મોનથા થયું છે તેના વચ્ચે બહુ ફરક નથી. ડિપ્રેશન એ લૉ પ્રેશરમાંથી જન્મતી વરસાદી સિસ્ટમ છે જેમાં ગોળગોળ ઘુમતા પવનની ચક્રાકાર ગતિ 63 કિ.મી.થી ઓછી હોય છે અને ગતિ આથી વધે તો તેને વાવાઝોડાનું નામ અપાય છે. આ વાવાઝોડુ 118 કિ.મી.થી વધુ ચક્રાકાર ગતિએ પહોંચે તો તે સુપર સાયક્લોન બને છે.

કૅબિનેટની મોટી જાહેરાત: કેન્દ્ર સરકારે 8મા પગાર પંચની રચનાને આપી મંજૂરી

News Editor
-
0
કૅબિનેટની મોટી જાહેરાત: કેન્દ્ર સરકારે 8મા પગાર પંચની રચનાને આપી મંજૂરી

કેન્દ્રીય મંત્રીમંડળે મંગળવારે 8મા પગાર પંચની રચનાને મંજૂરી આપી દીધી છે. આ એક અત્યંત મહત્ત્વપૂર્ણ નિર્ણય છે, જેનાથી દેશના 50 લાખથી વધુ કેન્દ્ર સરકારના કર્મચારીઓ અને 69 થી વધુ પેન્શનરોને સીધો ફાયદો થશે.કેન્દ્રીય મંત્રી અશ્વિની વૈષ્ણવે મંગળવારે કેન્દ્રીય મંત્રીમંડળ દ્વારા લેવાયેલા નિર્ણયો વિશે માહિતી આપતાં આ જાહેરાત કરી હતી. તેમણે જણાવ્યું હતું કે 8મું પગાર પંચ 1 જાન્યુઆરી, 2026 થી લાગુ થવાની અપેક્ષા છે. વિવિધ મંત્રાલયો, રાજ્ય સરકારો અને સંયુક્ત સલાહકાર તંત્રના કર્મચારી પક્ષ સાથે પરામર્શ કર્યા પછી પગાર પંચ માટેની સંદર્ભની શરતોને અંતિમ સ્વરૂપ આપવામાં આવ્યું છે.

પગાર પંચની રચના દર 10 વર્ષે કરવામાં આવે છે, જેનો હેતુ સરકારી કર્મચારીઓના પગાર અને ભથ્થામાં સુધારો કરવાનો હોય છે. 8મું પગાર પંચ તેની રચનાના 18 મહિનાની અંદર તેની ભલામણો રજૂ કરશે. કેન્દ્ર સરકારે જુલાઈમાં સંસદને જાણ કરી હતી કે તેણે ૮મા પગાર પંચની રચના અંગે મુખ્ય હિસ્સેદારો પાસેથી સૂચનો માંગ્યા છે. કેન્દ્રીય નાણાં રાજ્ય મંત્રી પંકજ ચૌધરીએ અગાઉ જણાવ્યું હતું કે સરકાર પગાર પંચની ભલામણો સ્વીકાર્યા પછી તેનો અમલ કરવામાં આવશે.અગાઉ 7મા પગાર પંચની રચના ફેબ્રુઆરી 2014માં કરવામાં આવી હતી, અને તેની ભલામણો 1 જાન્યુઆરી, 2016થી લાગુ કરવામાં આવી હતી.

જસ્ટિસ રંજના પ્રકાશ દેસાઈની નિમણૂક કરાઇ
8મા પગાર પંચના અધ્યક્ષ તરીકે જસ્ટિસ રંજના પ્રકાશ દેસાઈની નિમણૂક કરવામાં આવી છે, જ્યારે IIM બેંગ્લોરના પ્રોફેસર પુલક ઘોષ અને પેટ્રોલિયમ અને કુદરતી ગેસ મંત્રાલયના સચિવ પંકજ જૈનને સભ્યો તરીકે નિયુક્ત કરવામાં આવ્યા છે.8મા પગાર પંચ પછી સરકારી કર્મચારીઓના પગારમાં કેટલો વધારો થશે તે અંગે કોઈ સત્તાવાર ડેટા જાહેર થયો નથી, પરંતુ નોંધપાત્ર વધારાની અટકળો ચાલી રહી છે. પગાર પંચ તેની ભલામણો ફિટમેન્ટ ફેક્ટર અને લઘુત્તમ મૂળભૂત પગારના આધારે કરે છે. 7 મા પગાર પંચમાં ફિટમેન્ટ ફેક્ટર ૨.૫૭ ગણો હતો, જ્યારે 8મા પગાર પંચમાં તે 3 થી 3.42 ગણો થવાની ધારણા છે.

નોંધનીય છે કે જો ફિટમેન્ટ ફેક્ટર 3 ગણો પણ આધાર તરીકે ઉપયોગ કરવામાં આવે, તો લોઅર ડિવિઝન ક્લાર્ક (જેનો ગ્રેડ પે ₹1,900 છે અને 7મા પગાર પંચ હેઠળ મૂળ પગાર ₹18,000 છે) નો પગાર ₹59,700 સુધી પહોંચી શકે છે. હાલમાં HRA, DA અને મુસાફરી ભથ્થા સહિત તેમનો પગાર લગભગ ₹37120 થી ₹39370 સુધી પહોંચે છે.

ભૂતપૂર્વ મેચ રેફરીએ BCCI પર લગાવ્યા સનસનાટીભર્યા આરોપ, સૌરવ ગાંગુલી પર કર્યો આ ખુલાસો

News Editor
-
0
ભૂતપૂર્વ મેચ રેફરીએ BCCI પર લગાવ્યા સનસનાટીભર્યા આરોપ, સૌરવ ગાંગુલી પર કર્યો આ ખુલાસો

ભારતીય ટીમ હાલમાં ઓસ્ટ્રેલિયા સામે પાંચ મેચની T201 શ્રેણી રમવા માટે ઉત્સુક છે. આ શ્રેણી 29 ઓક્ટોબરથી શરૂ થવાની છે. આ અગાઉ, આંતરરાષ્ટ્રીય ક્રિકેટ કાઉન્સિલ (ICC)ના ભૂતપૂર્વ મેચ રેફરીએ ભારતીય ટીમ પર ગંભીર આરોપ લગાવ્યો છે. એક ઈન્ટરવ્યૂ દરમિયાન તેમણે ભૂતપૂર્વ ભારતીય કેપ્ટન સૌરવ ગાંગુલીને લઈને પણ મોટો ખુલાસો કર્યો છે.

ભૂતપૂર્વ ICC મેચ રેફરી ક્રિસ બ્રોડે તાજેતરમાં એક ઈન્ટરવ્યૂમાં ખુલાસો કર્યો હતો કે મેચ રેફરી તરીકેના તેમના કાર્યકાળ દરમિયાન, તેમને એક ફોન આવ્યો હતો જેમાં તેમને નરમી દાખવવા અને ભારત સામે ધીમા ઓવર રેટ માટે પેનલ્ટી ટાળવા માટે કહેવામાં આવ્યું હતું. જોકે, તેમણે એ જાહેર કર્યું નથી કે તેમને કોણે ફોન કર્યો હતો. ક્રિસ બ્રોડને યાદ નથી કે તે કઈ મેચ હતી અથવા તે મેચમાં કઈ ટીમ ભારત સામે રમી રહી હતી.

ધ ટેલિગ્રાફને આપેલા એક ઈન્ટરવ્યૂમાં ક્રિસ બ્રોડે જણાવ્યુ કે, ‘ભારત મેચના અંતે 3-4 ઓવર પાછળ હતું, એટલે પેનલ્ટી જરૂરી હતી. મને એક ફોન આવ્યો કે, ‘નરમી રાખો, થોડો સમય લો કારણ કે આ ભારત છે.’ એટલે અમારે થોડો સમય કાઢવો પડ્યો અને ઓવર-રેટને મર્યાદા સુધી લાવવો પડયો.’ ભૂતપૂર્વ મેચ રેફરીએ વધુમાં જણાવ્યું કે, ‘આગલી મેચમાં પણ આવું જ થયું. તત્કાલીન ભારતીય કેપ્ટન સૌરવ ગાંગુલીએ મારી વાત ન સાંભળી તો મેં ફોન કરીને પૂછ્યું, ‘તમે હવે શું કરવા માગો છો? અને મને કહેવામાં આવ્યું,’બસ તેમની સાથે જ કરો.’

ચક્રવાત ‘મોન્થા’નો ઉડાનો પર પ્રભાવ: 32 ફ્લાઈટ રદ્દ, મુસાફરોને પડી મુશ્કેલી

News Editor
-
0
ચક્રવાત ‘મોન્થા’નો ઉડાનો પર પ્રભાવ: 32 ફ્લાઈટ રદ્દ, મુસાફરોને પડી મુશ્કેલી

મંગળવારે ગંભીર ચક્રવાતી વાવાઝોડા મોન્થાને કારણે વિશાખાપટ્ટનમ એરપોર્ટથી ચાલતી કુલ 32 ફ્લાઇટ્સ રદ કરવામાં આવી હતી, એમ એક અધિકારીએ જણાવ્યું હતું. વિશાખાપટ્ટનમ એરપોર્ટના ડિરેક્ટર એન. પુરુષોત્તમને જણાવ્યું હતું કે 27 ઓક્ટોબરે એર ઇન્ડિયા એક્સપ્રેસની બે ફ્લાઇટ્સ રદ કરવામાં આવી હતી.

સ્થાનિક અને આંતરરાષ્ટ્રીય ફ્લાઇટ્સ રદ
“વાસ્તવમાં, અમે દરરોજ 30 થી 32 ફ્લાઇટ્સ ચલાવીએ છીએ, સ્થાનિક અને આંતરરાષ્ટ્રીય બંને. તે બધી ફ્લાઇટ્સ આજે રદ કરવામાં આવી છે,” પુરુષોત્તમે જણાવ્યું હતું કે, એરપોર્ટ ઓથોરિટી ઓફ ઇન્ડિયા (AAI) ની માર્ગદર્શિકા અનુસાર ગંભીર ચક્રવાતી તોફાન માટે તૈયારી કરવા માટે એરપોર્ટ દ્વારા સાવચેતી રાખવામાં આવી છે, જેમાં ચક્રવાત પહેલા અને પછીની ફ્લાઇટ્સનો સમાવેશ થાય છે.

વિજયવાડા એરપોર્ટથી ૧૬ ફ્લાઇટ્સ રદ કરવામાં આવી
તેવી જ રીતે વિજયવાડા એરપોર્ટે આજે ૧૬ ફ્લાઇટ્સ રદ કરી હતી પરંતુ પાંચ ફ્લાઇટ્સનું સંચાલન કર્યું હતું. વિજયવાડા એરપોર્ટના ડિરેક્ટર લક્ષ્મીકાંત રેડ્ડીએ જણાવ્યું હતું કે, “ગઈકાલે (સોમવારે) વિશાખાપટ્ટનમ જતી માત્ર એક ફ્લાઇટ રદ કરવામાં આવી હતી. પરંતુ આજે દિલ્હી અને મુંબઈ સહિત દેશભરના વિવિધ સ્થળોએ જતી ૧૬ ફ્લાઇટ્સ રદ કરવામાં આવી હતી.”

તિરુપતિ એરપોર્ટ પર 4 ફ્લાઇટ્સ રદ કરવામાં આવી
રેડ્ડીના જણાવ્યા મુજબ, એરલાઇન્સે મંગળવાર માટે કામગીરી સ્થગિત કરવાનો નિર્ણય લીધો છે. તેમણે કહ્યું કે બુધવારના ફ્લાઇટ ઓપરેશન અંગેની પરિસ્થિતિ સાંજ સુધીમાં સ્પષ્ટ થઈ શકે છે. તેવી જ રીતે, તિરુપતિ એરપોર્ટ પર ચાર ફ્લાઇટ્સ રદ કરવામાં આવી હતી.

૧૨૦ ટ્રેનો પણ રદ કરવામાં આવી છે.
દરમિયાન, એક રેલવે અધિકારીએ જણાવ્યું હતું કે 27 ઓક્ટોબર અને મંગળવારે દક્ષિણ મધ્ય રેલવે (SCR) ઝોનમાં કુલ 120 ટ્રેનો રદ કરવામાં આવી હતી. ચક્રવાત મંગળવાર સાંજે અથવા રાત્રે આંધ્રપ્રદેશના દરિયાકાંઠે લેન્ડફોલ કરે તેવી શક્યતા છે.

બિહાર ચૂંટણી પહેલા ફસાયા પ્રશાંત કિશોર, બે રાજ્યોની મતદાર યાદીમાં નામ હોવાનો આરોપ

News Editor
-
0
બિહાર ચૂંટણી પહેલા ફસાયા પ્રશાંત કિશોર, બે રાજ્યોની મતદાર યાદીમાં નામ હોવાનો આરોપ

બિહારની ચૂંટણીનો માહોલ ચાલી રહ્યો છે, ત્યારે જન સુરાજ પાર્ટીના સ્થાપક પ્રશાંત કિશોર પણ બિહારની વિધાનસભા ચૂંટણીમાં પૂરા જોર સાથે રાજકીય જમીન મેળવવા માટેના પ્રયાસ કરી રહ્યા છે. તેમની પાર્ટી બિહાર ચૂંટણીના જંગમાં 243 વિધાનસભા બેઠક પર ઉમેદવાર ઉતાર્યા છે. પરંતુ આ દરમિયાન, એક નવો વિવાદ ઉભો થયો છે, પ્રશાંત કિશોર બે રાજ્યોમાં મતદાર હોવાનું બહાર આવ્યું છે. તેમનું નામ બિહાર અને પશ્ચિમ બંગાળ બંનેની મતદાર યાદીમાં નોંધાયેલું છે.

અહેવાલો અનુસાર, પશ્ચિમ બંગાળની મતદાર યાદીમાં પ્રશાંત કિશોરનું સરનામું ૧૨૧ કાલીઘાટ રોડ, કોલકાતા તરીકે નોંધાયેલું છે. આ સ્થાન ભવાનીપુરમાં તૃણમૂલ કોંગ્રેસ (TMC)નું મુખ્ય મથક છે. પ્રશાંત કિશોરે ૨૦૨૧ની પશ્ચિમ બંગાળ વિધાનસભા ચૂંટણી માટે મમતા બેનર્જીની ચૂંટણી રણનીતિ બનાવવામાં મુખ્ય ભૂમિકા ભજવી હતી. તે સમયે તેઓ TMC માટે રાજકીય સલાહકાર તરીકે કામ કરતા હતા.

મીડિયા અહેવાલ અનુસાર, પ્રશાંત કિશોરનું નામ બિહારના સાસારામ સંસદીય મતવિસ્તાર હેઠળ નોંધાયેલું છે. તેમનું મતદાન મથક મધ્ય વિદ્યાલય, કોનાર છે, જે તેમનું પૈતૃક ગામ પણ માનવામાં આવે છે. દરમિયાન, પશ્ચિમ બંગાળમાં, તેમનું મતદાન મથક સેન્ટ હેલેન્સ સ્કૂલ, રાણી શંકરી લેન તરીકે નોંધાયેલું છે.

ઉલેખનીય છે કે, લોક પ્રતિનિધિત્વ અધિનિયમ, ૧૯૫૦ ની કલમ ૧૭ હેઠળ, કોઈ પણ વ્યક્તિ એક કરતાં વધુ મતવિસ્તારમાં નોંધણી કરાવી શકતી નથી.કલમ ૧૮ જણાવે છે કે કોઈ પણ મતદારનું નામ એક કરતાં વધુ મતદાર યાદીમાં નોંધાયેલ હોવું જોઈએ નહીં. જો કોઈ વ્યક્તિ પોતાનો મતવિસ્તાર બદલે છે, તો તેણે ફોર્મ ૮ ભરીને પોતાનું નામ નવા મતવિસ્તારમાં ટ્રાન્સફર કરવું પડશે.

દિલ્હી એરપોર્ટના T3 ટર્મિનલ પર એર ઇન્ડિયા બસમાં આગ લાગી

News Editor
-
0
દિલ્હી એરપોર્ટના T3 ટર્મિનલ પર એર ઇન્ડિયા બસમાં આગ લાગી

મંગળવારે બપોરે દિલ્હી એરપોર્ટના ટર્મિનલ 3 પર એર ઇન્ડિયાના વિમાનથી થોડા મીટર દૂર પાર્ક કરેલી બસમાં અચાનક આગ લાગી ગઈ. મીડિયા રિપોર્ટ્સ અનુસાર, બસ એર ઇન્ડિયા SATS એરપોર્ટ સર્વિસીસ પ્રાઇવેટ લિમિટેડની હતી, જે ઘણી એરલાઇન્સ માટે ગ્રાઉન્ડ સર્વિસીસ પૂરી પાડે છે.

આગ લાગી ત્યારે બસમાં કોઈ મુસાફરો નહોતા. આ ઘટનામાં કોઈ ઘાયલ થયું છે કે નહીં તે હાલમાં સ્પષ્ટ નથી. સોશિયલ મીડિયા પર પોસ્ટ કરાયેલા એક વીડિયોમાં બસ સંપૂર્ણપણે આગમાં લપેટાયેલી જોવા મળે છે. ફાયર બ્રિગેડની ટીમ ઘટનાસ્થળે પહોંચી હતી અને આગ પર કાબુ મેળવ્યો હતો. તપાસ ચાલી રહી છે.

દિલ્લી એરપોર્ટ મેનેજમેન્ટે પણ આ બનાવ બાદ નિવેદન આપ્યું હતું. તેમણે જણાવ્યું કે, “બપોરે આશરે 12 વાગ્યે ગ્રાઉન્ડ હેન્ડલિંગ કંપનીની બસમાં અચાનક આગ લાગી હતી. એરપોર્ટની ફાયર ટીમે તાત્કાલિક કાર્યવાહી કરી અને થોડા જ મિનિટોમાં આગ પર કાબૂ મેળવી લીધો. તે સમયે બસ પાર્ક કરેલી હતી અને તેમાં કોઈ મુસાફર નહોતો. બધા ફ્લાઇટ ઓપરેશન્સ સામાન્ય રીતે ચાલુ છે.”

આ પહેલાં 11 સપ્ટેમ્બરના રોજ દિલ્હીથી કાઠમંડુ જતી સ્પાઈસજેટની ફ્લાઈટ SG041ના વિમાનના પાછળના ભાગમાં આગ લાગી હતી. આ અંગે બીજા વિમાનના પાઇલટે કંટ્રોલ ટાવરને જાણ કરી હતી. આ ઘટના ત્યારે બની હતી જ્યારે વિમાન ટેક-ઓફ માટે રનવે પર તૈયાર થઈ રહ્યું હતું. કાઠમંડુ જતી આ સ્પાઈસજેટ ફ્લાઈટમાં 100થી વધુ મુસાફરો સવાર હતા. વિમાનને સવારના 8:10 વાગ્યે ઉડાન ભરવાની હતી અને 9:55 વાગ્યે કાઠમંડુ પહોંચવાનું હતું, પરંતુ ટેલ પાઇપ (ઇન્જિનનો પાછળનો ભાગ)માં આગ લાગવાના કારણે ફ્લાઈટને બપોરે 3 વાગ્યે ઉડાન ભરવી પડી હતી. એરલાઇનના જણાવ્યા મુજબ, આગની જાણ થતાં જ તમામ મુસાફરોને સુરક્ષિત રીતે બહાર કાઢવામાં આવ્યા હતા અને કોઈને ઇજા થઈ નથી. ટેલ પાઇપ એ ઇન્જિનનો પાછળનો ભાગ હોય છે, જ્યાંથી ગરમ હવા અને ધુમાડો બહાર આવે છે.

કેન્યામાં થયો દુખદ વિમાન અકસ્માત, 12 લોકોના મોતની આશંકા

News Editor
-
0
કેન્યામાં થયો દુખદ વિમાન અકસ્માત, 12 લોકોના મોતની આશંકા

કેન્યામાં એક વિમાન દુર્ઘટના ઘટી છે. કેન્યાના દરિયાકાંઠાના વિસ્તાર ક્વાલેમાં વિમાન દુર્ઘટના બની હતી. આ દુર્ઘટનામાં વિમાનમાં સવાર 12 લોકોના મોતની આશંકા છે. કેન્યાના અધિકારીઓએ અકસ્માત અંગે માહિતી આપી છે. અધિકારીઓએ જણાવ્યું હતું કે વિમાન મસાઈ મારા નેશનલ રિઝર્વના એક લોકપ્રિય પર્યટન સ્થળ પર જતી વખતે ક્રેશ થયું હતું. તેમણે કહ્યું કે આ અકસ્માત ડાયાની હવાઈ પટ્ટીથી લગભગ 40 કિલોમીટર દૂર એક પહાડી અને જંગલી વિસ્તારમાં થયો હતો.

શોધ અને બચાવ કામગીરી ચાલુ છે
ક્વાલે કાઉન્ટી કમિશનર સ્ટીફન ઓરિન્ડેએ એસોસિએટેડ પ્રેસને જણાવ્યું હતું કે ક્રેશ સ્થળ પર શોધ અને બચાવ કામગીરી ચાલી રહી છે અને વધુ વિગતો પછીથી જાહેર કરવામાં આવશે. કેન્યા સિવિલ એવિએશન ઓથોરિટીએ જણાવ્યું હતું કે વિમાનમાં 12 લોકો સવાર હતા અને અધિકારીઓ ક્રેશના કારણની તપાસ કરી રહ્યા છે.

વિમાન આગની લપેટમાં આવી ગયું હતું
અધિકારીઓએ જણાવ્યું હતું કે વિમાન ટેકઓફ કર્યા પછી થોડીવારમાં જ ક્રેશ થયું અને આગમાં ભડકી ગયું, જેના કારણે ઘટનાસ્થળે ફક્ત બળી ગયેલો કાટમાળ જ બચ્યો. સાક્ષીઓએ એસોસિએટેડ પ્રેસને જણાવ્યું હતું કે તેઓએ જોરદાર વિસ્ફોટ સાંભળ્યો હતો અને ઘટનાસ્થળે પહોંચ્યા પછી માનવ અવશેષો મળ્યા હતા.

મોમ્બાસા એર સફારીએ શું કહ્યું?
મોમ્બાસા એર સફારી નામની એરલાઇન કંપનીએ એસોસિએટેડ પ્રેસને જણાવ્યું હતું કે તે નાગરિક ઉડ્ડયન સત્તાવાળાને સહકાર આપી રહી છે અને અકસ્માત અંગેની નવીનતમ માહિતી સત્તાવાળા દ્વારા શેર કરવામાં આવશે. મસાઇ મારા રાષ્ટ્રીય અનામત એક લોકપ્રિય પર્યટન સ્થળ છે અને તાંઝાનિયાના સેરેનગેટીથી જંગલી બીસ્ટનું વાર્ષિક સ્થળાંતર અહીં થાય છે.

પરિવારને શક્ય તમામ મદદ કરવામાં આવશે.
કેન્યા એવિએશન ઓથોરિટીના અધિકારીઓએ જણાવ્યું હતું કે અકસ્માતની તપાસ એન્જિન નિષ્ફળતા, હવામાન અથવા પાઇલટની ભૂલ જેવા પરિબળો પર ધ્યાન કેન્દ્રિત કરશે. ક્વાલે કાઉન્ટી કમિશનરે કહ્યું, “આ અમારા માટે ખૂબ જ દુઃખદ દિવસ છે. પરિવારોને શક્ય તેટલી બધી સહાય પૂરી પાડવામાં આવશે.” કાટમાળમાંથી કોઈ બચી ગયું નથી.

ગૃહ વિભાગના વધારાના મુખ્ય સચિવ એમ.કે. દાસ બનશે ગુજરાતના નવા મુખ્ય સચિવ

News Editor
-
0
ગૃહ વિભાગના વધારાના મુખ્ય સચિવ એમ.કે. દાસ બનશે ગુજરાતના નવા મુખ્ય સચિવ

ગુજરાત સરકારના સામાન્ય વહીવટ વિભાગ (GAD) દ્વારા વરિષ્ઠ IAS અધિકારી મનોજ કુમાર દાસ (એમ.કે. દાસ)ને રાજ્યના નવા મુખ્ય સચિવ તરીકે નિમણૂક કરવાની જાહેરનામા બહાર પાડવામાં આવી છે. આ નિમણૂક 31 ઓક્ટોબરથી અમલમાં આવશે. આ નિર્ણય તે જ દિવસે લેવામાં આવ્યો છે, જ્યારે હાલના મુખ્ય સચિવ પંકજ જોશી નિવૃત્ત થશે. જાહેરનામા મુજબ દાસ હાલમાં ગૃહ વિભાગમાં વધારાના મુખ્ય સચિવ તરીકે કાર્યરત છે અને પંકજ જોશીની નિવૃત્તિ બાદ મુખ્ય સચિવનો પદભાર સંભાળશે.

ગુજરાત કેડરના 1990 બેચના IAS અધિકારી મનોજ કુમાર દાસે રાજ્ય અને કેન્દ્ર સરકારમાં અનેક મહત્વપૂર્ણ પ્રશાસકીય પદો પર કામગીરી કરી છે, જેમાં મુખ્યમંત્રી કાર્યાલય (CMO) અને સામાન્ય વહીવટ વિભાગ (GAD)માં મહત્વની ભૂમિકાઓ નિભાવી છે. તેમને બંદર અને પરિવહન વિભાગના વધારાના મુખ્ય સચિવ તરીકે પણ વધારાનું કાર્ય સોંપવામાં આવ્યું છે. દાસનો જન્મ 20 ડિસેમ્બર 1966ના રોજ બિહારના દરભંગા ખાતે થયો હતો. તેમણે IIT ખડગપુરમાંથી કમ્પ્યુટર સાયન્સમાં બી.ટેક (સન્માન સાથે)ની ડિગ્રી મેળવી છે.

સિવિલ સર્વિસમાં જોડાયા બાદ દાસે પ્રથમ વડોદરા જિલ્લાના જિલ્લા વિકાસ અધિકારી (DDO) તરીકે કામગીરી કરી હતી. છેલ્લા ઘણા વર્ષોમાં દાસે અનેક મહત્વપૂર્ણ પદો પર સેવા આપી છે, જેમાં ભારત સરકારના ગૃહ મંત્રાલયમાં નિદેશક અને ઉપસચિવ, વડોદરા અને સુરતના મહાનગરપાલિકા કમિશનર, ગુજરાત સ્ટેટ પેટ્રોલિયમ કોર્પોરેશન (GSPC)ના સંયુક્ત વ્યવસ્થાપક નિયામક, તેમજ ઉદ્યોગ અને ખાણ વિભાગના વધારાના મુખ્ય સચિવ તરીકેની ભૂમિકાઓનો સમાવેશ થાય છે. IAS અધિકારી એમ.કે. દાસ 20 ડિસેમ્બર 2026ના રોજ નિવૃત્ત થશે. તેઓ ગુજરાતના મુખ્યમંત્રી કાર્યાલય (CMO)માં ફરીથી ફરજ બજાવનારા એકમાત્ર અધિકારી છે.

બિહાર વિધાનસભા ચૂંટણી માટે ગુજરાતના 10 IAS અધિકારીઓની નિરીક્ષક તરીકે નિમણૂક

News Editor
-
0
બિહાર વિધાનસભા ચૂંટણી માટે ગુજરાતના 10 IAS અધિકારીઓની નિરીક્ષક તરીકે નિમણૂક

ભારતના ચૂંટણી પંચે ગુજરાત કેડરના 10 IAS અધિકારીઓની આગામી બિહાર વિધાનસભા ચૂંટણી, જે 6 અને 11 નવેમ્બરના રોજ યોજાવાની છે, તેના માટે ચૂંટણી નિરીક્ષક તરીકે નિમણૂક કરી છે. સામાન્ય રીતે, કોઈપણ રાજ્યની વિધાનસભા ચૂંટણી દરમિયાન, ચૂંટણી પંચ દ્વારા વિવિધ રાજ્ય કેડરના IAS અધિકારીઓને ચૂંટણી નિરીક્ષક તરીકે ફરજ પર મૂકવામાં આવે છે. આ પ્રથાને અનુસરીને, હવે ગુજરાત કેડરના અધિકારીઓને બિહારમાં સમાન જવાબદારીઓ સોંપવામાં આવી છે.

ગુજરાત સરકારના સામાન્ય વહીવટ વિભાગ દ્વારા જારી કરાયેલા જાહેરનામા મુજબ, બિહારમાં ફરજ પર મૂકાયેલા અધિકારીઓમાં રાજકુમાર બેનીવાલ, આલોક કુમાર પાંડે, સંદીપ સંગલે, મિલિંદ તોરવણે, રાજેશ માંજુ, ડૉ. રાહુલ બી. ગુપ્તા, ડૉ. ધવલ પટેલ, નાગરાજન એમ., વી.જે. રાજપૂત, અને હર્ષિત પી. ગોસાઈનો સમાવેશ થાય છે.

GAD એ આ અધિકારીઓની ગેરહાજરી દરમિયાન તેમના સંબંધિત વિભાગોનો હવાલો અન્ય અધિકારીઓને સોંપ્યો છે. જે અધિકારીઓને કામચલાઉ ધોરણે આ જવાબદારીઓ સોંપવામાં આવી છે તેમાં રાજેશ માંજુ, જેનુલ દેવન, પી. સ્વરૂપ, ડૉ. રતનકંકવર ગઢવીચરણ, ડૉ. રાજેન્દ્ર કુમાર, પ્રભાવ જોશી, સંજીવ કુમાર, નીતિન સંગવાન, બી.એ. શાહ, આઈ.આર. વાલા, કુ. આઈ.વી. પટેલ, અને વી.કે. જાધવનો સમાવેશ થાય છે.

સુરતીઓ વેકેશન મોડ પર હોવાના કારણે વસ્તી ઘટતા પાણીનો વપરાશ 85 MLD જેટલો ઘટ્યો

News Editor
-
0
સુરતીઓ વેકેશન મોડ પર હોવાના કારણે વસ્તી ઘટતા પાણીનો વપરાશ 85 MLD જેટલો ઘટ્યો

સુરતીઓએ દિવાળીની ઉજવણી પહેલા ઘર સફાઈ કરી હતી તેના કારણે પાણીની ડિમાન્ડમાં વધારો થયો હતો અને એક તબક્કે પાણીનો સપ્લાય 1631 એમ.એલ.ડી. પર પહોંચી ગયો હતો. જોકે, હાલમાં આ વપરાશ ઘટીને 1546 એમ.એલ.ડી. પર આવી ગયો છે. જોકે, હજી પણ સુરતીઓ વેકેશન મોડમાં હોય આ સપ્લાય હજી પણ ઘટાડો જોવા મળી શકે છે.

સુરત પાલિકા વિસ્તારમાં વસતા લોકો માટે પાલિકા દ્વારા પ્રતિ રોજ સરેરાશ 1590 એમ.એલ.ડી. પાણી પુરવઠો આપવામાં આવે છે. પરંતુ દિવાળીના તહેવાર પહેલા પાણીની ડિમાન્ડમાં ઘણો વધારો જોવા મળે છે અને એક તબક્કે સુરત પાલિકા દ્વારા અપાતા પાણીનો જથ્થો 1631 એમ.એલ.ડી. (મીલીયન લીટર પર ડે) પહોંચી ગયો હતો. દિવાળીના પહેલા સુરતીઓ ઘર અને ઓફિસની સાફ સફાઈ કરતા હોય પાણીની ડિમાન્ડમાં વધારો થાય છે. પરંતુ દિવાળી બાદ સુરતને કર્મભૂમિ બનાવી રહેતા અન્ય રાજ્ય કે અન્ય શહેરના લોકો પોતાના વતન તરફ મોટી સંખ્યામાં પહોંચી જાય છે.

જેના કારણે હાલ સૌરાષ્ટ્રીયન બહુમતી તથા પરપ્રાંતિય વસ્તી ધરાવતા વિસ્તારમાં વસ્તી ઓછી જોવા મળે છે તેથી પાણીની ડિમાન્ડમાં પણ ઘટાડો જોવા મળી રહ્યો છે. વર્ષના સામાન્ય દિવસ પહેલા પાલિકા દ્વારા 1590 એમ.એલ.ડી. પાણી આપવામાં આવે છે. જ્યારે દિવાળીમાં ડિમાન્ડ વધીને 1631 એમ.એલ.ડી. સુધી પહોંચી ગઈ હતી. પરંતુ સુરતમાંથી મોટી સંખ્યામાં લોકો બહાર જતા રહેતા પાણીની ડિમાન્ડ ઘટી 1546 એમ.એલ.ડી. સુધી પહોંચી ગઈ હતી. જેના કારણે દિવાળીમાં પાણીનો ઉપયોગ થયો હતો જેના કરતા 85 એમ.એલ.ડી. પાણીનો જથ્થો ઓછો થઈ ગયો છે.

1...290291292...1,449Page 291 of 1,449