Home Blog Page 281

‘વંદે માતરમ’ના 150 વર્ષ પૂર્ણ થવાના અવસરે સુરત એરપોર્ટ પર ‘વંદે માતરમ્’ના મૂળ સ્વરૂપનું સમૂહગાન

News Editor
-
0
‘વંદે માતરમ’ના 150 વર્ષ પૂર્ણ થવાના અવસરે સુરત એરપોર્ટ પર ‘વંદે માતરમ્’ના મૂળ સ્વરૂપનું સમૂહગાન

સુરત હવાઈમથક ખાતે ભારતના રાષ્ટ્રીય ગાન “વંદે માતરમ”ની 150મી વર્ષગાંઠની ઉત્સાહપૂર્વક ઉજવણી કરવામાં આવી હતી. જેમાં CISFના અધિકારીઓ/કર્મચારીઓ, એરપોર્ટ સ્ટાફ, એરલાઇન પ્રતિનિધિઓ તેમજ મુસાફરોએ રાષ્ટ્રગીતનું સામુહિક ગાન કર્યું હતું. અને અંતે “ભારત માતા કી જય” અને “વંદે માતરમ”ના જયઘોષથી સમગ્ર વાતાવરણ રાષ્ટ્રભક્તિના રંગમાં રંગાઈ ગયું હતું.

આ પ્રસંગે એ.એસ.જી કમાન્ડન્ટશ્રી કુમાર અભિષેકે “વંદે માતરમ”ના ઐતિહાસિક મહત્વ પર પ્રકાશ પાડતાં જણાવ્યું કે, આ ગીત માત્ર ભારતના સ્વાતંત્ર્ય સંગ્રામનું પ્રતિક નથી. પરંતુ વંદે માતારમ દેશ પ્રત્યેના સમર્પણ, એકતા અને રાષ્ટ્રીય ગૌરવનો અવિસ્મરણીય સંદેશ આપે છે.

આ સાથે જ ઉપસ્થિત સૌ ‘સ્વદેશી અપનાવો’ના શપથ ગ્રહણ કરી ઘરેલૂ ઉત્પાદનને પ્રોત્સાહિત કરવા સંકલ્પબદ્ધ થયાં હતાં.

પાક નુકસાની માટે 10 હજાર કરોડની જાહેરાત:એક્સ પર પોસ્ટ કરી આપી માહિતી, CM ભૂપેન્દ્ર પટેલે સમીક્ષા બેઠક બાદ નિર્ણય

News Editor
-
0
પાક નુકસાની માટે 10 હજાર કરોડની જાહેરાત:એક્સ પર પોસ્ટ કરી આપી માહિતી, CM ભૂપેન્દ્ર પટેલે સમીક્ષા બેઠક બાદ નિર્ણય

રાજ્યના ખેડૂતો માટે આજનો દિવસ નિર્ણાયક સાબિત થયો. પાક નુકસાની માટે 10 હજાર કરોડની રાજ્ય સરકારની જાહેરાત કરી છે. CM ભૂપેન્દ્ર પટેલે સમીક્ષા બેઠક બાદ નિર્ણય કરીને એક્સ પર પોસ્ટ કરી માહિતી આપી.કમોસમી વરસાદ અને કુદરતી આફતોને કારણે પાકને થયેલા ભારે નુકસાન બાદ સરકારે ખેડૂતોને રાહત આપવા માટે તૈયારીઓ તેજ કરી દીધી છે. સૂત્રોના જણાવ્યા મુજબ, મુખ્યમંત્રી ભૂપેન્દ્ર પટેલે આજે સાંજે અતિ મહત્ત્વપૂર્ણ બેઠક બોલાવી છે, જેમાં કૃષિ, મહેસૂલ અને નાણાં વિભાગના ઉચ્ચ અધિકારીઓ સાથે કૃષિમંત્રી અને નાણામંત્રી પણ ઉપસ્થિત રહેશે.

આ બેઠકનો મુખ્ય ઉદ્દેશ કૃષિ રાહત પેકેજની અંતિમ સમીક્ષા કરવાનો છે. સૂત્રોના જણાવ્યા મુજબ, સરકાર પેકેજના માપદંડો, સહાયની રકમ અને નાણાકીય જોગવાઈઓને અંતિમ રૂપ આપશે, જેથી ખેડૂતોને ઝડપથી સહાય મળી શકે. રાજ્ય સરકાર ખેડૂતોને ઐતિહાસિક રાહત આપવા માટે તૈયાર હોવાનું માનવામાં આવી રહ્યું છે અને જરૂરી હોય તો નિયમોમાં ફેરફાર કરીને પણ સહાય આપવાનો નિર્ણય લેવાયો હતા.

જિતુ વાઘાણીએ જણાવ્યું હતું કે સર્વેનો રિપોર્ટ મુખ્યમંત્રી સમક્ષ રજૂ થઈ ચૂક્યો છે. એસડીઆરએફનાં ધોરણો મુજબ ખેડૂતોને સહાય ચૂકવવા માટે કેન્દ્ર સરકારને જાણ કરવામાં આવી છે અને રાજ્ય સરકારના ભંડોળમાંથી પણ સહાય ચૂકવવાની વિચારણા ચાલી રહી છે. લગભગ 42 લાખ હેક્ટરથી વધારે અને 16 હજાર ગામથી વધારે ગામોમાં નુકસાન થયાનો પ્રાથમિક અંદાજ છે.

આજે 7 નવેમ્બરે કૃષિમંત્રી જિતુ વાઘાણીએ પણ કૃષિ વિભાગના ઉચ્ચ અધિકારીઓ સાથે બેઠક કરી હતી. કૃષિ વિભાગ દ્વારા જે પંચકામ કરવામાં આવ્યું છે, જેમાં ખેડૂતોને કેટલું નુકસાન થયું છે એ જાણી શકાય એ માટે આ બેઠક કરવામાં આવી હતી. હવે આ બેઠક બાદ રાહત પેકેજની સત્તાવાર જાહેરાત ટૂંક સમયમાં થઈ શકે છે. લાંબા સમયથી રાહ જોતા ખેડૂતો માટે આ પેકેજ આર્થિક હૂંફરૂપ બનશે એવી આશા વ્યક્ત થઈ રહી છે.

બનાસકાંઠાના સાંસદ ગેનીબેન બગડ્યા, જાણો કોને લુખ્ખા તત્વો ગણાવ્યા

News Editor
-
0
બનાસકાંઠાના સાંસદ ગેનીબેન બગડ્યા, જાણો કોને લુખ્ખા તત્વો ગણાવ્યા

પાટણ ખાતે સદારામ કન્યા છાત્રાલયના ભૂમિ પૂજન પ્રસંગે બનાસકાંઠાના સાંસદ ગેનીબેન ઠાકોરના આકરા તેવર જોવા મળ્યા હતા. સંબોધન દરમિયાન તેમણે લુખ્ખાઓને સ્ટેજ પર સ્થાન ન આપવા માટે અપીલ કરી હતી. ઉપરાંત સારા કાર્યોમાં રોડા નાખવાવાળા વ્યક્તિઓને ગેનીબેન ઠાકોરે લુખ્ખા તત્વો પણ ગણાવ્યા હતા.

સદારામ કન્યા છાત્રાલયના ભૂમિ પૂજન પ્રસંગે બનાસકાંઠાના સાંસદ ગેનીબેન ઠાકોર આ ભગીરથ કાર્ય કરવા બદલ સમાજના આગેવાનોને અભિનંદન પાઠવ્યા હતા.ઉપરાંત સમાજમાં દીકરા દીકરીઓની વચ્ચે સંમતુલા જળવાઈ રહે તે માટે દીકરાઓને પણ શિક્ષિત કરવા આહવાન કર્યું હતું. તો બીજી તરફ અંધશ્રદ્ધા માંથી બહાર આવી મંદિરો પાછળ ખોટા ખર્ચાઓ કરવાને બદલે સરસ્વતીના મંદિરો ગામે ગામ બનાવવા સમાજના આગેવાનોને અપીલ કરી હતી.

સદારામ સેવા સમિતિ ગુજરાત દ્વારા સદારામ કન્યા હોસ્ટેલનું ભૂમિ પૂજન કાર્યક્રમ આજે પાટણ ખાતે યોજાયો હતો જેમાં કન્યા છાત્રાલયનું ભૂમિ પૂજન બાબાભાઈ ભરવાડ, સંત દાસરામ બાપુ સહિતના આગેવાનોની ઉપસ્થિતિમાં કરવામાં આવ્યું હતું. અધ્યતન સુવિધા સાથેનું આ સંકુલ બે વર્ષમાં કાર્યરત કરાશે.

હાલના સમયમાં જે મોટા સમાજો છે તેમાં શિક્ષણનું પ્રમાણ વધુ જોવા મળી રહ્યું છે. વિવિધ શહેરોમાં આ સમાજની હોસ્ટેલો અને સંકુલો કાર્યરત છે. ત્યારે ઠાકોર સમાજના દીકરા દીકરીઓ પણ વર્તમાન સમયમાં શિક્ષણથી વંચિત ન રહે તેવા ઊમદા આશયથી પાટણમાં સદારામ કન્યા હોસ્ટેલનું ભૂમિ પૂજન દાતાઓના દાનથી કરવામાં આવ્યું હતું. બક્ષીપંચ સમાજમાંથી આવતા બાબાભાઈ ભરવાડે મુખ્ય દાતા બની બે કરોડ 51લાખ રૂપિયા આપી આ છાત્રાલયનું ભૂમિ પૂજન કર્યું હતું. ભૂમિ પૂજન કાર્યક્રમ બાદ સિંધવાઈ માતા મંદિર ખાતે જાહેર કાર્યક્રમ યોજાયો હતો. જેમાં ભાજપના અને કોંગ્રેસના રાજકીય અને સામાજિક આગેવાનો ઉપસ્થિત રહ્યા હતા.

ઇન્ડોનેશિયાની મસ્જિદમાં જુમ્માની નમાજ દરમિયાન વિસ્ફોટ, 50થી વધુ લોકો ઘાયલ

News Editor
-
0
ઇન્ડોનેશિયાની મસ્જિદમાં જુમ્માની નમાજ દરમિયાન વિસ્ફોટ, 50થી વધુ લોકો ઘાયલ

ઇન્ડોનેશિયાની રાજધાની જકાર્તાના કેલાપા ગેડિંગ વિસ્તારમાં શુક્રવારે બપોરે એક શક્તિશાળી વિસ્ફોટ થયો. અહેવાલો અનુસાર, સ્ટેટ સિનિયર હાઇ સ્કૂલ 72 (SMA Negeri 72) ની મસ્જિદમાં શુક્રવારની નમાજ દરમિયાન વિસ્ફોટ થયો હતો. વિસ્ફોટમાં ઓછામાં ઓછા 15 વિદ્યાર્થીઓ અને 5 શિક્ષકો ઘાયલ થયા હતા. શાળા નૌકાદળના કમ્પાઉન્ડની અંદર આવેલી હોવાથી, નૌકાદળના કર્મચારીઓ અને પોલીસ તાત્કાલિક ત્યાં પહોંચી ગયા હતા. વિસ્ફોટ બપોરે 12:30 વાગ્યાની આસપાસ થયો હતો.

અચાનક જોરદાર વિસ્ફોટ
સાક્ષીઓના જણાવ્યા મુજબ, મસ્જિદના મુખ્ય હોલના પાછળના ભાગમાંથી એક મોટો અવાજ આવ્યો અને ધુમાડો ફેલાઈ ગયો. ભક્તો ભાગવા લાગ્યા. ગણિતના શિક્ષક બુડી લક્સોનોએ જણાવ્યું, “ઉપદેશ શરૂ થયો જ હતો ત્યારે અચાનક એક જોરદાર વિસ્ફોટ થયો. રૂમ ધુમાડાથી ભરાઈ ગયો. બાળકો રડતા અને ચીસો પાડતા બહાર દોડી આવ્યા, કેટલાક નીચે પડી ગયા.” મોટાભાગના ઘાયલોને કાચના ટુકડાથી ઇજા થઈ હતી અથવા વિસ્ફોટથી કાનને નુકસાન થયું હતું. બધાને નજીકના કેલાપા ગેડિંગ ક્લિનિકમાં લઈ જવામાં આવ્યા હતા. તેમની હાલત ખતરાની બહાર છે.

નૌકાદળના જવાનો સ્થળ પર તૈનાત
વિસ્ફોટ પછી તરત જ, નૌકાદળના કર્મચારીઓ અને જકાર્તા પોલીસે વિસ્તારને ઘેરી લીધો. બોમ્બ સ્ક્વોડ દ્વારા મસ્જિદ અને આસપાસના વિસ્તારની સંપૂર્ણ તપાસ કરવામાં આવી. પોલીસે જણાવ્યું હતું કે, “પ્રારંભિક તપાસમાં વિસ્ફોટનું કારણ જાણી શકાયું નથી. તે ઇલેક્ટ્રિક શોર્ટ સર્કિટ અથવા ખામીયુક્ત ઇલેક્ટ્રોનિક ઉપકરણ હોઈ શકે છે. જોકે, ઘટનાસ્થળેથી કેટલીક શંકાસ્પદ વસ્તુઓ મળી આવી છે, જેમાં ઘરે બનાવેલા બોમ્બના ભાગો, રિમોટ કંટ્રોલ, એરસોફ્ટ ગન અને રિવોલ્વર જેવા હથિયારનો સમાવેશ થાય છે.”

ઘટનાની તપાસ ચાલુ
પોલીસે જણાવ્યું હતું કે વિસ્ફોટોની તપાસ ચાલુ છે. ફોરેન્સિક અને બોમ્બ ડિસ્પોઝલ નિષ્ણાતો બધી સામગ્રીની તપાસ કરશે. હાલમાં કોઈ નિષ્કર્ષ કાઢવો અકાળ ગણાશે. શાળા બંધ કરી દેવામાં આવી છે અને વિસ્તાર કડક સુરક્ષા હેઠળ છે. પોલીસ ટૂંક સમયમાં સંપૂર્ણ રિપોર્ટ જાહેર કરશે.

“RSSએ વંદે માતરમ ક્યારેય ન ગાયું”, ખડગેએ RSS-BJP પર નિશાન સાધ્યું

News Editor
-
0
“RSSએ વંદે માતરમ ક્યારેય ન ગાયું”, ખડગેએ RSS-BJP પર નિશાન સાધ્યું

કોંગ્રેસ અધ્યક્ષ મલ્લિકાર્જુન ખડગેએ શુક્રવારે RSS અને BJP પર પ્રહાર કરતા કહ્યું કે આ સંગઠનોએ ક્યારેય તેમની શાખાઓ કે કાર્યાલયોમાં વંદે માતરમ કે આપણું રાષ્ટ્રગીત, જન ગણ મન ગાયું નથી. ખડગેએ સોશિયલ મીડિયા પોસ્ટમાં ભાજપ અને RSS પર પણ આકરા પ્રહારો કર્યા.

કોંગ્રેસ પ્રમુખ મલ્લિકાર્જુન ખડગેએ X પર લખ્યું છે કે એ ખૂબ જ વિડંબના છે કે જેઓ આજે રાષ્ટ્રવાદના સ્વ-ઘોષિત રક્ષક હોવાનો દાવો કરે છે, RSS અને BJP, તેમણે ક્યારેય તેમની શાખાઓ કે કાર્યાલયોમાં વંદે માતરમ કે આપણું રાષ્ટ્રગીત, જન ગણ મન ગાયું નથી. તેના બદલે, તેઓ નમસ્તે સદા વાત્સલે ગાય છે, જે એક ગીત છે જે તેમના સંગઠનોનો મહિમા કરે છે, રાષ્ટ્રનો નહીં. 1925 માં તેની સ્થાપના થઈ ત્યારથી, RSS તેના સાર્વત્રિક આદર હોવા છતાં, વંદે માતરમને ટાળતું આવ્યું છે.

કોંગ્રેસ અધ્યક્ષે વધુમાં લખ્યું છે કે રાષ્ટ્રીય ચળવળમાં ભારતીયો વિરુદ્ધ RSS અને સંઘ પરિવારે અંગ્રેજોને ટેકો આપ્યો, 52 વર્ષ સુધી રાષ્ટ્રધ્વજ ફરકાવ્યો નહીં, ભારતીય બંધારણનો દુરુપયોગ કર્યો, બાપુ અને બાબાસાહેબ આંબેડકરના પુતળા બાળ્યા, અને સરદાર પટેલના શબ્દોમાં કહીએ તો, ગાંધીજીની હત્યામાં ભાગીદાર બન્યા. બીજી બાજુ, કોંગ્રેસ પાર્ટી વંદે માતરમ અને જન ગણ મન બંને પર ખૂબ ગર્વ અનુભવે છે. બંને ગીતો દરેક કોંગ્રેસ સંમેલન અને કાર્યક્રમમાં શ્રદ્ધા સાથે ગવાય છે, જે ભારતની એકતા અને ગૌરવનું પ્રતીક છે.

“દોષ છુપાવ્યો તો ઉમેદવારી રદ”, બિહાર ચૂંટણી વચ્ચે સુપ્રીમ કોર્ટનો કડક આદેશ

News Editor
-
0
“દોષ છુપાવ્યો તો ઉમેદવારી રદ”, બિહાર ચૂંટણી વચ્ચે સુપ્રીમ કોર્ટનો કડક આદેશ

ચૂંટણી પ્રક્રિયામાં પારદર્શિતા સુનિશ્ચિત કરવા માટે સુપ્રીમ કોર્ટે એક સીમાચિહ્નરૂપ ચુકાદો આપ્યો છે. કોર્ટે સ્પષ્ટ કર્યું છે કે કોઈપણ ઉમેદવાર જે તેમના ઉમેદવારી પત્રોમાં કોઈપણ ગુનાહિત દોષિતો જાહેર કરવામાં નિષ્ફળ જાય છે, ભલે તે સગીર હોય અને પછીથી હાઈકોર્ટ દ્વારા રદ કરવામાં આવે, તો તેને ચૂંટણી લડવા માટે ગેરલાયક ઠેરવવામાં આવશે. બિહાર વિધાનસભાની ચૂંટણીઓ વચ્ચે આવેલો આ નિર્ણય રાજકીય પક્ષો માટે મોટો ઝટકો સાબિત થઈ શકે છે.

આ કેસમાં કોર્ટે આ નિર્ણય આપ્યો
મધ્યપ્રદેશના ભીખાનગાંવના મ્યુનિસિપલ કાઉન્સિલર પૂનમના કિસ્સામાં આ નિર્ણય આવ્યો હતો, જેમને નેગોશિયેબલ ઇન્સ્ટ્રુમેન્ટ્સ એક્ટ (૧૮૮૧) ની કલમ ૧૩૮ હેઠળ ચેક બાઉન્સ થવા બદલ ટ્રાયલ કોર્ટે એક વર્ષની જેલની સજા ફટકારી હતી.

ઉમેદવારી પત્રોમાં સજાનો ઉલ્લેખ નહોતો.
જોકે બાદમાં હાઈકોર્ટે દોષિત ઠેરવવાની સજા રદ કરી હતી, પરંતુ પૂનમે તેના ઉમેદવારી પત્રોમાં તેનો ઉલ્લેખ કર્યો ન હતો. નીચલી અદાલતોએ તેની ઉમેદવારી રદ કરી હતી, જેના વિરુદ્ધ તેણે સુપ્રીમ કોર્ટમાં અપીલ કરી હતી.

ન્યાયાધીશે શું કહ્યું ખબર છે?
ન્યાયાધીશ પી.એસ. નરસિંહા અને અતુલ એસ. ચાંદુરકરની બેન્ચે ગુરુવારે સ્પેશિયલ લીવ પિટિશન (SLP) ફગાવી દેતા કહ્યું કે, “નોમિનેશન પેપરમાં દોષિત જાહેર ન કરવો એ મતદારોના અધિકારોનું સીધું ઉલ્લંઘન છે. દોષિત જાહેર ન થયાની હકીકત ઉમેદવારને તેને છુપાવવાનો અધિકાર આપતી નથી.”

સોગંદનામામાં દોષિત ઠેરવવાનો ફરજિયાત ઉલ્લેખ
કોર્ટે એ પણ ભાર મૂક્યો કે ચૂંટણી સોગંદનામામાં અગાઉની તમામ સજાઓનો ઉલ્લેખ કરવો ફરજિયાત છે, પછી ભલે ગુનો નાનો હોય અથવા સજા પાછળથી ઉલટાવી દેવામાં આવી હોય.

આરોગ્ય વિભાગે PMJAY હેઠળ ગેરરીતિ કરતી ખાનગી હોસ્પિટલ સામે કાર્યવાહી કરી

News Editor
-
0
આરોગ્ય વિભાગે PMJAY હેઠળ ગેરરીતિ કરતી ખાનગી હોસ્પિટલ સામે કાર્યવાહી કરી

ગુજરાત આરોગ્ય વિભાગે PMJAY (પ્રધાનમંત્રી જન આરોગ્ય યોજના) અંતર્ગત ગેરરીતિ કરતી ચાર ખાનગી હોસ્પિટલ સામે કડક કાર્યવાહી હાથ ધરી છે. આરોગ્યપ્રધાન પ્રફૂલ પાનસેરિયાની સરપ્રાઈઝ વિઝિટ દરમિયાન બંને હોસ્પિટલોમાં ગેરરીતિની વિગતો સામે આવી હતી. કાર્યવાહી હેઠળ બે હોસ્પિટલોને સસ્પેન્ડ કરવામાં આવ્યું છે, જ્યારે બાકીના બે હોસ્પિટલને કારણદર્શક નોટિસ મોકલવામાં આવી છે. આરોગ્યપ્રધાન પાનસેરિયાએ હૂંફ આપી જણાવ્યું કે ગેરરીતિ પર કોઈ ક્ષમા નહી, અને ભવિષ્યમાં આવી ઘટનાઓ રોકવા સખ્ત પગલાં લેવામાં આવશે.

દીપ ચિલ્ડ્રન હોસ્પિટલ અને નીઓનેટલ કેર, ગોધરા, પંચમહાલ (HOSP24T130518)
સ્થિતિ: સસ્પેન્ડ
▪️PICU અને NICU માટે જરૂરી માપદંડોની પૂર્તતા નહોતી
▪️એક્સપાયર્ડ દવાઓ મળી
▪️MBBS ડોકટર હાજર નહોતા
▪️લાભાર્થીઓને યોજનાકીય માહિતી આપતું કિઓસ્ક સ્થાપિત નહોતું
▪️ઇન્ફેક્શન કંટ્રોલ માર્ગદર્શિકાનું પાલન નહોતું

કાશીમા હોસ્પિટલ, ભરુચ (HOSP24T170981)
સ્થિતિ: સસ્પેન્ડ
▪️PICU અને NICU માટેની માપદંડ પૂરા નહોતા
▪️ઇન્ફેક્શન કંટ્રોલ માર્ગદર્શિકાનું પાલન નહોતું
▪️લાભાર્થીઓને યોજનાકીય માહિતી આપતું કિઓસ્ક સ્થાપિત નહોતું
▪️નર્સિંગ સ્ટાફ કવોલીફાઈડ નહોતાં
▪️બપોરના ૧૨ વાગ્યા સુધી તબીબી અધિકારી હાજર નહોતા
▪️BU પરમીશન અને ફાયર NOC ઉપલબ્ધ નહોતાં

મા ચિલ્ડ્રન અને જનરલ હોસ્પિટલ, કાલોલ, પંચમહાલ (HOSP24T132829)
સ્થિતિ: કારણદર્શક નોટિસ આપવામાં આવેલ
▪️લાભાર્થીઓને યોજનાકીય માહિતી આપતું કિઓસ્ક સ્થાપિત નહોતું

મા ચિલ્ડ્રન અને નીઓનેટલ કેર, દેવગઢ બારિયા, દાહોદ (HOSP24T148571)
સ્થિતિ: કારણદર્શક નોટિસ આપવામાં આવેલ
▪️NICU માં એક્સપાયર્ડ દવાઓ મળી
▪️હોસ્પિટલ દ્વારા CCTV ફૂટેજ આપવા ઈનકાર કર્યો
▪️લાભાર્થીઓને યોજનાકીય માહિતી આપતું કિઓસ્ક સ્થાપિત નહોતું

    આ બાબતે આરોગ્ય મંત્રી પ્રફુલ પાનશેરીયાએ મોડી રાત્રે નિવેદન આપતા જણાવ્યું કે “રાજ્ય સરકાર આરોગ્ય સેવાઓને વધુ સુચારૂ, પારદર્શક અને લોકહિતકારી બનાવવા સતત પ્રયત્નશીલ છે. મુખ્યમંત્રી શ્રી ભુપેન્દ્રભાઈ પટેલના માર્ગદર્શન હેઠળ આરોગ્ય ક્ષેત્રે માનવતાને પ્રથમ સ્થાન આપવાનો સંકલ્પ છેપી.એમ.જે.એ.વાય.-મા યોજના એ ગરીબ અને જરૂરિયાતમંદ નાગરિકો માટે આશીર્વાદ સમાન છે, તેથી કોઈપણ પ્રકારની ગેરરીતિ કે માનવતા વિરોધી બેદરકારી સહન કરવામાં નહીં આવે.

    વધુમાં આરોગ્ય મંત્રીએ જણાવ્યું કે – “ભવિષ્યમાં પણ સરકારી યોજનામાં માનવ સેવા વિરુદ્ધ વર્તન કરનાર હોસ્પિટલ સામે રાજ્ય સરકાર કડકથી કડક પગલાં લેતી રહેશે.”

    સુરતના ભેસ્તાનમાં બંધ ફ્લેટમાંથી મળ્યો નઝીર અહમદનો મૃતદેહ, હત્યા કે આત્મહત્યા અંગે ઉઠ્યા અનેક સવાલો

    News Editor
    -
    0
    સુરતના ભેસ્તાનમાં બંધ ફ્લેટમાંથી મળ્યો નઝીર અહમદનો મૃતદેહ, હત્યા કે આત્મહત્યા અંગે ઉઠ્યા અનેક સવાલો

    સુરત શહેરના ભેસ્તાન વિસ્તારમાં એક ચોંકાવનારો બનાવ સામે આવ્યો છે. ભેસ્તાનના એક બંધ ફ્લેટમાંથી નઝીર અહમદ નામના વ્યક્તિનો મૃતદેહ મળી આવતા સમગ્ર વિસ્તારમાં ચકચાર મચી ગયો છે. મૃતદેહ મળી આવતાની સાથે જ ભેસ્તાન પોલીસને જાણ કરવામાં આવી હતી. જેના પગલે પોલીસનો કાફલો ઘટનાસ્થળે દોડી ગયો હતો. નઝીર અહમદનો મૃતદેહ જે રીતે બંધ ફ્લેટમાંથી રહસ્યમય સંજોગોમાં મળી આવ્યો છે તેના કારણે આ બનાવ હત્યાનો છે કે આત્મહત્યાનો તે અંગે અનેક સવાલો ઊભા થયા છે.

    બંધ ફલેટમાંથી નઝીરનો મૃતદેહ મળતા ચકચાર
    ઘટનાની ગંભીરતા જોતાં ભેસ્તાન પોલીસ સહિત ઉચ્ચકક્ષાના અધિકારીઓ પણ તાત્કાલિક સ્થળ પર પહોંચ્યા હતા. પોલીસે સૌપ્રથમ મૃતદેહનો કબજો મેળવીને કાયદેસરની કાર્યવાહી હાથ ધરી હતી. વધુમાં પુરાવાઓ એકઠા કરવા અને મૃત્યુના ચોક્કસ કારણો જાણવા માટે ફોરેન્સિક વિભાગની ટીમ પણ બોલાવવામાં આવી હતી. ફોરેન્સિક ટીમે સ્થળ પરથી જરૂરી સેમ્પલો એકત્ર કરીને તપાસ શરૂ કરી છે.

    પોલીસે મૃતદેહનો કબજો મેળવી તપાસ હાથ ધરી
    ભેસ્તાન પોલીસે હાલ બે મુખ્ય દિશામાં તપાસનો ધમધમાટ શરૂ કર્યો છે, શું કોઈએ નઝીર અહમદની હત્યા કરી છે? કે પછી નઝીર અહમદે કોઈ કારણોસર આત્મહત્યા કરી છે? પોલીસે મૃતકના નજીકના સગા-સંબંધીઓ અને મિત્રોની પૂછપરછ શરૂ કરી છે. તેમજ મૃતકનો વ્યવસાય અને છેલ્લી પ્રવૃત્તિઓ અંગે પણ માહિતી મેળવી રહી છે.

    100 કરોડની જમીન 15 કરોડમાં! જમીન સોદાના નામે 12 કરોડની છેતરપિંડી, 3 ઠગોની ધરપકડ

    News Editor
    -
    0
    100 કરોડની જમીન 15 કરોડમાં! જમીન સોદાના નામે 12 કરોડની છેતરપિંડી, 3 ઠગોની ધરપકડ

    સુરતમાં સરકારી જમીનની ફાળવણીના નામે એક મોટા કૌભાંડનો પર્દાફાશ થયો છે. અહીં એક વેપારીને રૂ. 100 કરોડની કિંમતની સરકારી જમીન માત્ર રૂ. ૧૫ કરોડમાં અપાવવાની લાલચ આપીને તેમની પાસેથી રૂ. 12 કરોડ રૂપિયાની ઠગાઈ કરવામાં આવી હતી. આ ગંભીર મામલે સુરત પોલીસની આર્થિક ગુના નિવારણ શાખાએ છ લોકો વિરુદ્ધ ફરિયાદ નોંધી છે, જેમાંથી ત્રણ આરોપીઓની ધરપકડ કરવામાં આવી છે. આ ઠગ ટોળકીએ વિશ્વાસ કેળવવા માટે સરકારી વિભાગો અને એક મંત્રીના પીએના નામના બોગસ લેટરપેડ નો ઉપયોગ કર્યો હતો.

    છેતરપિંડી કરનારા આરોપીઓએ ફરિયાદી વેપારીનો વિશ્વાસ જીતવા માટે સુરત અને ગાંધીનગરની સરકારી કચેરીઓના નકલી દસ્તાવેજોનો ઉપયોગ કર્યો હતો. તેમણે વેપારીને ખાતરી આપી હતી કે તેઓ મહેસૂલ વિભાગથી લઈને શહેરી વિકાસ વિભાગ સુધીની તમામ સરકારી પ્રક્રિયાઓ પૂરી કરાવી દેશે અને આ પ્રક્રિયા પેટે રૂ. 15 કરોડમાં જમીન વેપારીના નામે થઈ જશે. આ ખોટા ભરોસાના આધારે વેપારીએ તબક્કાવાર કુલ રૂ. 12 કરોડ રૂપિયા આરોપીઓને ચૂકવી દીધા હતા. જોકે, લાંબા સમય સુધી જમીનનો કરાર આગળ ન વધ્યો અને કોઈપણ સરકારી અધિકારીનો સંપર્ક ન થતાં વેપારીને શંકા ગઈ હતી. બાદમાં તપાસમાં બહાર આવ્યું કે રજૂ કરાયેલા તમામ લેટરપેડ અને દસ્તાવેજો સંપૂર્ણપણે નકલી અને બનાવટી હતા.

    સુરત પોલીસે આ મામલે ત્વરિત કાર્યવાહી કરીને ત્રણ આરોપીઓને ઝડપી પાડ્યા છે. ડીસીપી કરણરાજ વાઘેલાએ માહિતી આપતાં જણાવ્યું હતું કે, ધરપકડ કરાયેલા આરોપીઓમાં રતન સિંહ ઠાકોર, સંગ્રામ સિંહ અને સંજય સિંહ ઠાકોરનો સમાવેશ થાય છે. આ ત્રણેય આરોપીઓ ગાંધીનગરના દહેગામ ગામના રહેવાસી છે અને એકબીજાના સગાં-સંબંધી છે. જોકે, અન્ય ત્રણ આરોપીઓ હાલ ફરાર છે અને તેમને પકડવા માટે પોલીસે ચક્રો ગતિમાન કર્યા છે.

    પોલીસે પકડાયેલા ત્રણેય આરોપીઓના બે દિવસના રિમાન્ડ મેળવ્યા છે અને હાલ પૂછપરછ ચાલી રહી છે. પોલીસ દ્વારા એ દિશામાં તપાસ કરવામાં આવી રહી છે કે છેતરપિંડી કરીને મેળવેલા રૂ. ૧૨ કરોડ રૂપિયાનો ઉપયોગ ક્યાં કરવામાં આવ્યો છે અને આ કૌભાંડમાં અન્ય કોઈ મોટા માથાંની સંડોવણી છે કે કેમ.

    સુરત નેચર પાર્કને દિવાળી વેકેશન ફળ્યું, 1.53 લાખ લોકોએ મુલાકાત લીધી, 42.85 લાખની આવક થઇ

    News Editor
    -
    0
    સુરત નેચર પાર્કને દિવાળી વેકેશન ફળ્યું, 1.53 લાખ લોકોએ મુલાકાત લીધી, 42.85 લાખની આવક થઇ

    સુરત શહેરના મુખ્ય આકર્ષણોમાંના એક એવા સરથાણા નેચર પાર્ક માટે દિવાળીનું વેકેશન ખૂબ જ લાભદાયી સાબિત થયું છે. જાહેર રજાઓ અને તહેવારોની સિઝનમાં સહેલાણીઓની ભારે ભીડ ઉમટી પડતાં 42,85 લાખ રૂપિયાની આવક થઇ હતી.

    પ્રાપ્ત માહિતી અનુસાર, સુરતના સરથાણા વિસ્તારમાં આવેલા મનપા સંચાલિત ડૉ. શ્યામાપ્રસાદ મુખર્જી ઝૂઓલોજિકલ ગાર્ડન સરથાણા નેચર પાર્ક ને દિવાળી વેકેશન ફળ્યું છે, તા. 16-10-2025 થી 6-11-2025 સુધીના લગભગ 21 દિવસના સમયગાળા દરમિયાન, મોટી સંખ્યામાં લોકોએ આ પ્રાણી સંગ્રહાલયની મુલાકાત લીધી હતી. આ 21 દિવસના ગાળામાં કુલ 1,53,705 લોકોએ નેચર પાર્કની મુલાકાત લીધી હતી, જે એક નોંધપાત્ર આંકડો છે.

    મુલાકાતીઓની આ ભારે સંખ્યાના કારણે નેચર પાર્કને સારો એવો આર્થિક ફાયદો થયો છે. આ સમયગાળા દરમિયાન ટિકિટ વેચાણ મારફતે રૂપિયા 42,85,930 રૂપિયાની જંગી આવક નોંધાઈ છે. ઉનાળુ વેકેશન, દિવાળી વેકેશન અને જાહેર રજાઓમાં નેચર પાર્કમાં સામાન્ય રીતે ભારે ભીડ જોવા મળતી હોય છે. ખાસ કરીને દિવાળી, ભાઈ બીજથી લઈને લાભ પાંચમ સુધીના દિવસોમાં પરિવાર સાથે ફરવા આવેલા મુલાકાતીઓની સંખ્યામાં જબરજસ્ત ઉછાળો જોવા મળ્યો હતો, નેચર પાર્કમાં વાઘ સિંડ, દીપડા સહિતના પ્રાણીઓ આકર્ષણનું કેન્દ્ર બને.

    1...280281282...1,450Page 281 of 1,450