ગુજરાત અને મહારાષ્ટ્રમાં પડી રહેલા ભારે વરસાદને કારણે પશ્ચિમ રેલવેની કામગીરી પર મોટી અસર પડી છે. રેલવે ટ્રેક પર પાણી ભરાવા અને ઓપરેશનલ મુશ્કેલીઓને ધ્યાનમાં રાખીને પશ્ચિમ રેલવેએ 24 જુલાઈના રોજ 15 ટ્રેનો સંપૂર્ણપણે રદ કરવાની જાહેરાત કરી છે. આ ઉપરાંત એક સ્પેશિયલ ટ્રેનનું સમયપત્રક બદલવામાં આવ્યું છે, જ્યારે બે ટ્રેનોને આંશિક રીતે રદ અથવા ટૂંકાવવામાં આવી છે.

મુંબઈ-અમદાવાદ રેલ રૂટ પર ભારે વરસાદની અસર જોવા મળી છે. ખાસ કરીને ઘોલવડ-ઉમરગામ રોડ વચ્ચેના વિસ્તારમાં પાણીનું સ્તર વધતા ટ્રેન વ્યવહારને અસર પહોંચી હતી. મુસાફરોને મુસાફરી પહેલાં પોતાની ટ્રેનનું સ્ટેટસ તપાસવાની સલાહ આપવામાં આવી છે.

સંપૂર્ણપણે રદ કરાયેલી 15 ટ્રેનોની યાદી
ટ્રેન નંબર ટ્રેનનું નામ/રૂટ
19002 સુરત – વિરાર
22444 બાંદ્રા ટર્મિનસ – કાનપુર સેન્ટ્રલ
19011 વલસાડ – દાહોદ
22953 મુંબઈ સેન્ટ્રલ – અમદાવાદ જંક્શન
20959 વલસાડ – વડનગર
20901 મુંબઈ સેન્ટ્રલ – ગાંધીનગર કેપિટલ
59049 વલસાડ – વડોદરા જંક્શન
12009 મુંબઈ સેન્ટ્રલ – અમદાવાદ જંક્શન (શતાબ્દી)
12935 બાંદ્રા ટર્મિનસ – સુરત
69139 બોરીવલી – વલસાડ
59045 મુંબઈ સેન્ટ્રલ – વાપી
59024 વલસાડ – મુંબઈ સેન્ટ્રલ
19010 વિરાર – ભરૂચ જંક્શન
69161 વિરાર – સુરત
59039 વિરાર – વલસાડ

બે ટ્રેનો આંશિક રીતે પ્રભાવિત
04727 હિસાર-વલસાડ એક્સપ્રેસ: ટ્રેનને મરોલી ખાતે ટૂંકાવવામાં આવી છે. મરોલીથી વલસાડ વચ્ચેની સેવા રદ રહેશે.
22955 બાંદ્રા ટર્મિનસ-ભુજ એક્સપ્રેસ: હવે આ ટ્રેન બાંદ્રા ટર્મિનસના બદલે સુરતથી શરૂ થશે. બાંદ્રા ટર્મિનસથી સુરત વચ્ચેનો ભાગ રદ રહેશે.

રેલવે પ્રશાસને જણાવ્યું છે કે વરસાદી પરિસ્થિતિ પર સતત નજર રાખવામાં આવી રહી છે અને સ્થિતિ સામાન્ય થયા બાદ ટ્રેન સેવા તબક્કાવાર પૂર્વવત કરવામાં આવશે. મુસાફરોને સત્તાવાર રેલવે અપડેટ્સ ચેક કરવાની અપીલ કરવામાં આવી છે.