નવસારીના ધમધમતા એરુ ચાર રસ્તા પાસે ગત મોડી રાત્રે એક કાળજું કંપાવનારી હિટ એન્ડ રનની ઘટના સામે આવી છે. પોતાની રોજીરોટીનું સાધન એવી જ્યુસની દુકાન બંધ કરીને સ્મિત સાથે ઘર તરફ જઈ રહેલા એક આધેડ પર પૂરઝડપે ધસી આવેલી ઓડી કાર કાળ બનીને તૂટી પડી હતી. ટક્કર એટલી ભયાનક હતી કે આધેડ હવામાં ફંગોળાઈને જમીન પર પટકાયા હતા અને સારવાર મળે તે પહેલાં જ તેમણે હોસ્પિટલના રસ્તે આખરી શ્વાસ લીધા હતા. આ હૃદયદ્રાવક અકસ્માત સર્જી ફરાર થયેલા ભાજપના નગરસેવકના બેરોજગાર ભત્રીજાની જલાલપોર પોલીસે ધરપકડ કરી કાયદેસરની કાર્યવાહી હાથ ધરી છે.
અકસ્માતની ભયાનક ક્ષણો અને આધેડનું મોત
મળતી વિગતો અનુસાર, એરુ ચાર રસ્તા ખાતે આવેલી પોતાની ‘શિવ શક્તિ’ જ્યુસની દુકાન રાત્રે આશરે 10:30 વાગ્યે બંધ કરીને અરુણ ઉપાધ્યાય નામના આધેડ પગપાળા પોતાના ઘર તરફ જઈ રહ્યા હતા. તે જ સમયે ગાંધી ફાટક તરફથી પૂરઝડપે અને બેફામ રીતે દોડી આવેલી ઓડી કારના ચાલકે વાહન પરથી કાબૂ ગુમાવી દેતાં અરુણભાઈને સામેથી જોરદાર અડફેટે લીધા હતા. અકસ્માત સર્જી કારચાલક વાહન સ્થળ પર જ મૂકીને અંધારામાં ફરાર થઈ ગયો હતો.
માથા અને શરીરે ગંભીર ઇજાઓ પહોંચતાં અરુણભાઈ અર્ધબેભાન અવસ્થામાં રોડ પર પટકાયા હતા. આસપાસના લોકોએ તાત્કાલિક ખાનગી વાહનમાં સારવાર અર્થે હોસ્પિટલ ખસેડ્યા હતા, પરંતુ હોસ્પિટલ પહોંચે તે પહેલાં જ તેમનું પ્રાણપંખીડું ઊડી ગયું હતું. નવસારી સિવિલ હોસ્પિટલના તબીબોએ તેમને મૃત જાહેર કર્યા હતા.
આરોપી ભાજપ કોર્પોરેટરનો ભત્રીજો હોવાનો ખુલાસો
ઘટના અંગે જલાલપોર પોલીસ મથકે ગુનો નોંધાતા જ તંત્ર દોડતું થયું હતું. પોલીસે તપાસનો ધમધમાટ શરૂ કરીને બપોરના સમયે આરોપી કારચાલક શિવાંશ પટેલની ધરપકડ કરી હતી. તપાસમાં બહાર આવ્યું છે કે આરોપી શિવાંશ પટેલ નવસારી મહાનગરપાલિકાના વોર્ડ નંબર 9ના ભાજપના નગરસેવક ધર્મેશ ભીમ પટેલના મોટા ભાઈ ભરત પટેલનો પુત્ર છે અને બેરોજગાર છે. અકસ્માત સમયે તેની સાથે કારમાં તેનો એક મિત્ર પણ સવાર હતો. પોલીસે ઓડી કાર જપ્ત કરી આરોપીને કોર્ટમાં રજૂ કરવાની તજવીજ હાથ ધરી છે.
108 એમ્બ્યુલન્સ મોડી પહોંચતા સ્થાનિકોમાં ભારે આક્રોશ
અકસ્માતના તુરંત બાદ એકત્ર થયેલા સ્થાનિક નાગરિકોએ તાત્કાલિક ઇમરજન્સી ‘108’ એમ્બ્યુલન્સ સેવાને ફોન કર્યો હતો. જોકે, અત્યંત ગંભીર પરિસ્થિતિ હોવા છતાં એમ્બ્યુલન્સ સમયસર ન પહોંચતા લોકટોળામાં ભારે રોષ વ્યાપી ગયો હતો. લાચાર બનીને સ્થાનિકોએ ઇજાગ્રસ્ત આધેડને ખાનગી વાહનમાં હોસ્પિટલ પહોંચાડવા પડ્યા હતા. તંત્રની આવી ઘોર બેદરકારી સામે સ્થાનિકોએ સ્થળ પર વીડિયો બનાવી પોતાનો રોષ વ્યક્ત કર્યો હતો અને ગુનેગાર સામે કડકમાં કડક શિક્ષાત્મક પગલાં ભરવાની માગ કરી છે.
