સુરતના મોટા વરાછા ખાતે આવેલા આપના ધારાસભ્ય ગોપાલ ઇટાલિયાના ઘરે મહેસાણા પોલીસ 2020માં પરવાનગી વિના રેલી કાઢવાના કેસમાં સમન્સ આપવા પહોંચી હતી, જેને લઈને વિવાદ ઉભો થયો છે. ઇટાલિયાએ આરોપ લગાવ્યો કે પોલીસ તેમના ઘરે પહોંચી તેમની માતા સાથે ગેરવર્તન કર્યું. આ ઘટના બાદ એક કથિત ઓડિયો ક્લિપ સોશિયલ મીડિયામાં વાયરલ થઈ, જેમાં પોલીસની કાર્યવાહી અંગે પૂર્વ તૈયારી જેવી વાતચીત દર્શાવવામાં આવી છે. જોકે, ઇટાલિયાએ આ ઓડિયોને સંપૂર્ણપણે ખોટો ગણાવી દાવો કર્યો છે કે તે AI દ્વારા તૈયાર કરાયેલ છે.
વાયરલ ઓડિયોમાં “જીતુ” અને “ગોપાલ” વચ્ચેની વાતચીતમાં પોલીસ ઘરે વોરંટ બજાવવા આવશે અને ઘરના ફોટા લઈ પોર્ટલ પર અપલોડ કરશે તેવી ચર્ચા છે. જેમાં ગોપાલ તરફથી એવું કહેવામાં આવે છે કે “પોલીસ આવે તો આવવા દો, અને પછી કહીશું કે મારી મા ને હેરાન કરે છે.” આ ક્લિપને લઈને વિવાદ વધુ ઉગ્ર બન્યો છે.
આ મામલે ઇટાલિયાએ પ્રતિક્રિયા આપતા કહ્યું કે, “મારા પરિવાર સાથે ગેરવર્તનનો ભાંડો ફોડતા જ સાંજ સુધીમાં બનાવટી AI ઓડિયો વાયરલ કરવામાં આવ્યો.” તેમણે વધુમાં કહ્યું કે ભાજપ અને હર્ષ સંઘવી પર તેમણે અગાઉ પણ અનેક મુદ્દાઓ ઉઠાવ્યા છે, પરંતુ ક્યારેય આવો ઓડિયો સામે આવ્યો નહોતો. ઇટાલિયાએ આ ઓડિયોને “ફેબ્રિકેટેડ” ગણાવી કહ્યું કે તેમાં દર્શાવેલી વાતો બિનઆધારિત અને બનાવટી છે.
ઇટાલિયાએ જણાવ્યું કે તેઓ કાયદાની સારી સમજ ધરાવે છે અને પોતે વકીલ રહી ચૂક્યા છે, તેથી કોઈ વ્યક્તિ તેમને નિયમોની સમજ આપે તે હાસ્યાસ્પદ છે. તેમણે આક્ષેપ કર્યો કે આ આખી ઘટનાને રાજકીય રીતે પ્રભાવિત કરવા માટે બનાવટી ઓડિયો તૈયાર કરવામાં આવ્યો છે.
આ સાથે જ ઇટાલિયાએ ભાજપ અને હર્ષ સંઘવી પર વધુ આક્ષેપો કરતાં જણાવ્યું કે તેમના સમયમાં રાજ્યમાં ડ્રગ્સ અને ગેરકાયદેસર પ્રવૃત્તિઓ વધી છે અને પોલીસ પર પણ હુમલાઓ વધ્યા છે. તેમણે પડકાર આપ્યો કે આવા મુદ્દાઓ પર પણ ઓડિયો બનાવી બતાવો.
આ સમગ્ર મામલે હવે રાજકીય વાતાવરણ ગરમાયું છે અને ચૂંટણીના માહોલ વચ્ચે આ વિવાદ ક્યાં સુધી પહોંચે છે તે જોવાનું રહ્યું.
