બારડોલી તાલુકાના દસ્તાન ગામ નજીક એક્સપ્રેસ હાઈવે પર આજે વહેલી સવારે ભયાનક અકસ્માત સર્જાયો હતો. મળતી માહિતી મુજબ, એક ટેમ્પાનું ટાયર ફાટી જતા તે હાઈવે પર ઉભું રહ્યું હતું. આ દરમિયાન પાછળથી પુરપાટ ઝડપે આવી રહેલી ઇકો કાર ટેમ્પા પાછળ જોરદાર અથડાઈ હતી. આ દુર્ઘટનામાં કારમાં સવાર એક મહિલા સહિત એક જ પરિવારના ચાર લોકોના કરુણ મોત નીપજ્યા હતા. કારમાં સવાર લોકો મુંબઈથી ખંભાત જઈ રહ્યા હતા ત્યારે આ દુર્ઘટના બની હતી. ઘટનાની જાણ થતાં પોલીસ તાત્કાલિક સ્થળ પર પહોંચી હતી અને મૃતદેહોને પોસ્ટમોર્ટમ માટે ખસેડવામાં આવ્યા હતા. હાલ પોલીસે અકસ્માત અંગે વધુ તપાસ હાથ ધરી છે.
આ સાથે સુરત જિલ્લામાં છેલ્લા કેટલાક દિવસોમાં અકસ્માતોની સંખ્યા વધતી નજરે પડી રહી છે, જેના કારણે ટ્રાફિક નિયમોનું પાલન અને સાવચેતી રાખવાની જરૂરિયાત ફરી એકવાર ચર્ચામાં આવી છે. પોલીસ દ્વારા વાહનચાલકોને ખાસ કરીને હાઈવે પર ઝડપ નિયંત્રણમાં રાખવા અને સુરક્ષા નિયમોનું પાલન કરવા અપીલ કરવામાં આવી રહી છે.
મળતી વિગતો મુજબ, આણંદ જિલ્લાના ખંભાત ખાતે કાદરપુરા મહોલ્લામાં રહેતો દાઉદી વ્હોરા સમાજનો પરિવાર મુંબઈની હોસ્પિટલમાં સારવાર કરાવીને મોડી રાત્રે ઈકો કાર (GJ 23 BL 0679) માં પરત ફરી રહ્યો હતો. આ દરમિયાન દસ્તાન ગામ પાસે ભારતમાળા હાઈવે પર ટાયર ફાટવાને કારણે સ્થિર ઉભેલા ટેમ્પો (GJ 16 AW 3448) પાછળ કાર ધડાકાભેર અથડાઈ હતી. ટક્કર એટલી ભીષણ હતી કે કારનો કચ્ચરઘાણ નીકળી ગયો હતો અને તેમાં સવાર ચારેય સભ્યોના પ્રાણ પંખેરૂ ઉડી ગયા હતા.
તસ્વીર: તેજસ વશી
