ગુજરાતમાંથી ચોમાસું વિદાય લઈ રહ્યું છે, છતાં મેઘરાજાએ હજુ પણ પોતાની પકડ છોડી નથી! હવામાન વિભાગની તાજી આગાહીએ દક્ષિણ ગુજરાતના પાંચ જિલ્લાઓમાં ફરી મેઘરાજાના રૌદ્ર સ્વરૂપના એંધાણ આપ્યા છે. જો તમે પણ આ સપ્તાહમાં બહાર જવાનું વિચારી રહ્યા છો, તો હવામાનની આ મોટી અપડેટ જાણી લેવી તમારા માટે અત્યંત જરૂરી છે.
હવામાન વિભાગ (IMD) દ્વારા આજે સાંજે ૫ વાગ્યા સુધીનું નાઉકાસ્ટ વોર્નિંગ જાહેર કરવામાં આવ્યું છે. રાહતના સમાચાર એ છે કે ઉત્તર ગુજરાતના પંથકોમાં હાલ કોઈ જ ચેતવણી નથી.
પરંતુ, દક્ષિણ ગુજરાત અને સૌરાષ્ટ્રના કેટલાક વિસ્તારોમાં ખતરો દેખાઈ રહ્યો છે. હવામાન વિભાગના જણાવ્યા અનુસાર, રાજકોટ, અમરેલી, ભાવનગર, ભરૂચ, નર્મદા, સુરત, તાપી, નવસારી, ડાંગ, વલસાડ તેમજ કેન્દ્રશાસિત પ્રદેશ દમણ અને દાદરા અને નગર હવેલીમાં ભારે વરસાદની સંભાવનાને પગલે ઓરેન્જ એલર્ટ જાહેર કરવામાં આવ્યું છે. આ ઉપરાંત, રાજ્યના અન્ય ૧૧ જિલ્લાઓમાં યેલો એલર્ટ આપવામાં આવ્યું છે.
હવામાનના આ બદલાતા મિજાજને ધ્યાનમાં રાખીને તંત્ર દ્વારા નાગરિકોને સુરક્ષિત રહેવા અને નીચાણવાળા વિસ્તારોમાં સાવચેતી રાખવા ખાસ અપીલ કરવામાં આવી છે.
