ગુજરાતમાં ગુરુવારની સવારથી જ અનેક વિસ્તારોમાં ભારે વરસાદ વરસી રહ્યો છે. ખાસ કરીને દક્ષિણ ગુજરાતમાં મેઘરાજાએ જોરદાર બેટિંગ કરી છે. સ્ટેટ ઇમરજન્સી ઓપરેશન સેન્ટર (SEOC)ના આંકડા મુજબ, સવારે 6 વાગ્યાથી બપોરે 12 વાગ્યા સુધીના માત્ર 6 કલાકમાં સુરત જિલ્લાના ઉમરપાડા તાલુકામાં સૌથી વધુ 11.14 ઇંચ વરસાદ નોંધાયો હતો.
આ સમયગાળા દરમિયાન રાજ્યના 50 તાલુકામાં 2 ઇંચથી વધુ વરસાદ નોંધાયો હતો. જેમાં વલસાડ જિલ્લાના ઉમરગામમાં 9.88 ઇંચ, ભરૂચના નેત્રંગમાં 6.89 ઇંચ, વલસાડના પારડીમાં 6.61 ઇંચ, નવસારીના ખેરગામમાં 6.46 ઇંચ, વલસાડના નાનાપોંઢામાં 5.43 ઇંચ અને મહેસાણાના બેચરાજીમાં 5.12 ઇંચ વરસાદ નોંધાયો હતો.
અન્ય ભારે વરસાદવાળા વિસ્તારોમાં ડાંગ જિલ્લાના વઘઈ અને તાપી જિલ્લાના ઉકાઈમાં 4.92 ઇંચ, કપરાડામાં 4.84 ઇંચ, વ્યારામાં 4.57 ઇંચ, ધરમપુરમાં 4.53 ઇંચ, વાંસદામાં 4.45 ઇંચ અને નર્મદા જિલ્લાના ચિકદામાં 4.41 ઇંચ વરસાદ નોંધાયો હતો.
અમદાવાદ જિલ્લામાં પણ સવાર બાદ વરસાદનું જોર વધ્યું હતું. અમદાવાદ શહેરમાં સવારે 6થી બપોરે 12 વાગ્યા દરમિયાન 2.60 ઇંચ વરસાદ પડ્યો હતો. જ્યારે વિરમગામમાં 3.23 ઇંચ, ડેટ્રોજ-રામપુરામાં 2.20 ઇંચ, માંડલમાં 2.09 ઇંચ, ધોળકામાં 1.65 ઇંચ, ધંધુકામાં 1.46 ઇંચ, દસ્ક્રોઈમાં 0.98 ઇંચ, બાવળામાં 0.91 ઇંચ, સાનંદમાં 0.67 ઇંચ અને ધોળેરામાં 0.16 ઇંચ વરસાદ નોંધાયો હતો.
રાજ્યના અન્ય મોટા શહેરોમાં સુરત શહેરમાં 1.93 ઇંચ, ભરૂચમાં 3.39 ઇંચ, વાપીમાં 3.78 ઇંચ, વલસાડ શહેરમાં 3.39 ઇંચ અને નવસારીમાં 1.22 ઇંચ વરસાદ નોંધાયો હતો.
હાલમાં સૌથી વધુ વરસાદનો પ્રભાવ દક્ષિણ ગુજરાતના સુરત, વલસાડ, નવસારી, ભરૂચ, તાપી, ડાંગ અને નર્મદા જિલ્લામાં જોવા મળી રહ્યો છે. સતત વરસાદને કારણે કેટલાક વિસ્તારોમાં પાણી ભરાવાની અને જનજીવન પર અસર થવાની સ્થિતિ ઉભી થઈ છે. તંત્ર દ્વારા સમગ્ર પરિસ્થિતિ પર સતત નજર રાખવામાં આવી રહી છે.
