અમદાવાદમાં છેલ્લા 24 કલાક દરમિયાન મેઘરાજાએ ઐતિહાસિક બેટિંગ કરી હતી. શહેરમાં સરેરાશ 295.59 મિમી (11.64 ઇંચ) વરસાદ નોંધાયો, જ્યારે અનેક વિસ્તારોમાં 16થી 18 ઇંચથી વધુ વરસાદ વરસતા જનજીવન પર વ્યાપક અસર જોવા મળી હતી.
અમદાવાદ મહાનગરપાલિકા (AMC)ના સવારે 6 વાગ્યે જાહેર કરાયેલા આંકડા મુજબ બોપલમાં સૌથી વધુ 467.50 મિમી (18.41 ઇંચ) વરસાદ નોંધાયો હતો. તેના પછી બાકરોલમાં 18.21 ઇંચ, સરખેજ અર્બન હેલ્થમાં 17.32 ઇંચ, જોધપુરમાં 16.46 ઇંચ, સરખેજમાં 16.34 ઇંચ, થલતેજમાં 16.08 ઇંચ, જોધપુર ઝોનલમાં 16.06 ઇંચ અને બોડકદેવમાં 16.02 ઇંચ વરસાદ નોંધાયો હતો.
ઝોન પ્રમાણે જોવામાં આવે તો દક્ષિણ-પશ્ચિમ ઝોનમાં સૌથી વધુ સરેરાશ 16.88 ઇંચ વરસાદ નોંધાયો હતો. ત્યારબાદ ઉત્તર-પશ્ચિમ ઝોનમાં 14.32 ઇંચ, સેન્ટ્રલ ઝોનમાં 12.58 ઇંચ, પશ્ચિમ ઝોનમાં 12.42 ઇંચ, દક્ષિણ ઝોનમાં 9.27 ઇંચ, ઉત્તર ઝોનમાં 9.17 ઇંચ અને પૂર્વ ઝોનમાં 6.83 ઇંચ વરસાદ નોંધાયો હતો.
શહેરમાં કુલ વરસાદનો આંકડો 2,069.11 મિમી (81.46 ઇંચ) સુધી પહોંચ્યો હતો. ભારે વરસાદને પગલે સાબરમતી નદીમાં પાણીનો પ્રવાહ વધતા વાસણા બેરેજના તમામ 22 દરવાજા ખોલવામાં આવ્યા, જેથી વધારાનું પાણી સુરક્ષિત રીતે નીચેના વિસ્તારો તરફ છોડવામાં આવી શકે.
