હૈદરાબાદ લોકસભા બેઠક પરની ભાજપ ઉમેદવાર માધવી લતાએ મતદાન કેન્દ્ર પર મુસ્લિમ મહિલાઓના બુરખા ઉઠાવી ચેક કરવું ભારે પડ્યું છે. આ મામલે તેમની સામે માલકપેટ પોલીસ સ્ટેશનમાં એફઆઈઆર નોંધાઈ છે. લતા સામે આઈપીસીની કલમ ૧૭૧સી, ૧૮૬, ૫૦૫(૧)(સી) અને લોક પ્રતિનિધિત્વ અધિનિયમની કલમ ૧૩૨ હેઠળ કેસ નોંધાયો છે.
આ અંગે ખુલાસો કરતાં માધવી લત્તાએ કહ્યું કે ઉમેદવારને વોટર આઈડી કાર્ડ ચેક કરવાનો અધિકાર છે. કાયદા મુજબ, ઉમેદવારો વોટર્સનો ચહેરો ઓળખી શકે છે અને મતદાર ઓળખકાર્ડ સાથે તેના ચહેરાને મેચ કરી શકે છે. હું કોઈ પુરુષ નથી, એક સ્ત્રી હોવાને કારણે મેં ખૂબ જ માનવીય રીતે અને નમ્રતાપૂર્વક તેમને બુરખો હટાવવાનું કહ્યું હતું. જો કોઈ આ મુદ્દે ‘કાગનો વાઘ’ કરી રહ્યાં હોય તો તેઓ ડરી ગયા છે. ભાજપના ઉમેદવારે મતદાર યાદીમાં ગેરરીતિ આચરાઈ હોવાનો આક્ષેપ કર્યો છે.
તેમણે કહ્યું કે પોલીસ ખૂબ સુસ્ત દેખાય છે. તેઓ કશું ચેક કરતા નથી. ઘણા વૃદ્ધ મતદારો આવી રહ્યા છે પરંતુ તેમના નામ મતદાર યાદીમાંથી દૂર કરવામાં આવ્યા છે. માધવી લતાનું કહેવું છે કે તેમને મુસ્લિમ મતદારો પણ મળવાના છે કારણ કે ભાજપે ત્રણ તલાક અને રોજગારના મોરચે મુસ્લિમ યુવાનો માટે કામ કર્યું છે.
હૈદરાબાદની બેઠક પરથી ભાજપે માધવી લતાને મેદાનમાં ઉતાર્યા છે. AIMIM વડા અને વર્તમાન સાંસદ અસદુદ્દીન ઓવૈસી પણ આ બેઠક પરથી ચૂંટણી લડી રહ્યા છે. આ સિવાય જો કોંગ્રેસની વાત કરીએ તો પાર્ટીએ અહીથી મોહમ્મદ વલીઉલ્લાડ સમીરને પોતાના ઉમેદવાર બનાવ્યા છે.
આ પણ વાંચો :-
