સુરત શહેરમાં ફરી એકવાર દારૂના નશામાં વાહન ચલાવવાનો ગંભીર બનાવ સામે આવ્યો છે. સરથાણા જકાતનાકા વિસ્તારમાં એક કારચાલકે નશાની હાલતમાં બેફામ ઝડપે કાર હંકારી બે બાઈક અને એક કારને અડફેટે લેતા પાંચ લોકો ઘાયલ થયા હતા. અકસ્માત બાદ સ્થાનિક લોકોમાં ભારે રોષ ફાટી નીકળ્યો હતો.
પ્રાપ્ત માહિતી અનુસાર, સરથાણા જકાતનાકા નજીકથી પસાર થઈ રહેલી એક ઇલેક્ટ્રિક કાર (GJ 05 RU 2251)ના ચાલકે વાહન પરનો કાબૂ ગુમાવી દીધો હતો. દારૂના નશામાં ધૂત હોવાનું કહેવાતા કારચાલકે પહેલા બે બાઈક સવારોને ટક્કર મારી હતી. ત્યારબાદ કાર આગળ જઈને અન્ય એક કાર સાથે પણ અથડાઈ હતી. અકસ્માત એટલો ગંભીર હતો કે બંને બાઈક અને કારને ભારે નુકસાન પહોંચ્યું હતું. ઘટનાસ્થળે અફરાતફરીનો માહોલ સર્જાયો હતો.
લોકોનો ગુસ્સો ફાટ્યો, ચાલકને પકડીને ધોલાઈ કરી
અકસ્માત બાદ આસપાસના લોકો અને રાહદારીઓ તાત્કાલિક ઘટનાસ્થળે દોડી આવ્યા હતા. કારચાલક નશાની હાલતમાં હોવાનું જણાતા લોકોમાં ભારે રોષ ફેલાયો હતો. રોષે ભરાયેલા ટોળાએ ચાલકને કારમાંથી બહાર કાઢીને તેની ધોલાઈ કરી હતી. સાથે જ લોકોએ અકસ્માત સર્જનાર કારના કાચ તોડી પોતાનો વિરોધ વ્યક્ત કર્યો હતો.
પાંચ લોકો ઘાયલ, હોસ્પિટલમાં સારવાર
આ અકસ્માતમાં પાંચ જેટલા લોકોને ઈજાઓ પહોંચી હતી. ઘાયલોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા હતા. બીજી તરફ, લોકોના મારથી ઈજાગ્રસ્ત બનેલા કારચાલકને પણ પોલીસ બંદોબસ્ત હેઠળ હોસ્પિટલમાં દાખલ કરવામાં આવ્યો છે.
સરથાણા પોલીસે તપાસ હાથ ધરી
ઘટનાની જાણ થતાં જ સરથાણા પોલીસની ટીમ સ્થળ પર પહોંચી હતી. પોલીસે પરિસ્થિતિને કાબૂમાં લઈને ટ્રાફિક વ્યવસ્થા પુનઃસ્થાપિત કરી હતી. હાલ પોલીસે આરોપી ચાલક સામે ગુનો નોંધી આગળની કાર્યવાહી શરૂ કરી છે. ચાલક દારૂના નશામાં હતો કે નહીં તેની તબીબી તપાસ પણ કરાવવામાં આવી રહી છે. તપાસ પૂર્ણ થયા બાદ કાયદેસરની કાર્યવાહી હાથ ધરવામાં આવશે.
