અમેરિકાના રાષ્ટ્રપતિ ડોનાલ્ડ ટ્રમ્પ ઈરાન અંગે આપત્તિજનક ટિપ્પણી કર્યા બાદ ભારે વિવાદમાં ફસાઈ ગયા છે. તેમના નિવેદનથી અમેરિકાના વિરોધ પક્ષના નેતાઓમાં ભારે રોષ ફેલાયો છે અને હવે તેમના વિરુદ્ધ 25મા સુધારા લાગુ કરવાની માંગ ઉઠી રહી છે.
માહિતી મુજબ, ઓછામાં ઓછા 5 અમેરિકી સાંસદોએ ટ્રમ્પને પદ પરથી દૂર કરવા આ બંધારણીય પ્રાવધાનનો ઉપયોગ કરવાની માંગ કરી છે. સાંસદોના મતે, ટ્રમ્પ તેમના રાષ્ટ્રપતિ પદના ફરજો યોગ્ય રીતે નિભાવવા અસમર્થ છે અને દેશના હિતમાં તેમને હટાવવું જરૂરી છે. જો આ પ્રક્રિયા અમલમાં આવે તો ઉપ રાષ્ટ્રપતિ જે.ડી. વાન્સ બાકીના કાર્યકાળ માટે રાષ્ટ્રપતિ પદ સંભાળી શકે છે.
આ વિવાદની શરૂઆત ત્યારે થઈ જ્યારે ટ્રમ્પે 4 એપ્રિલે સોશિયલ મીડિયા પોસ્ટમાં ઈરાન અંગે અપશબ્દોનો ઉપયોગ કર્યો. આ નિવેદન બાદ અનેક ડેમોક્રેટ નેતાઓએ તીખી પ્રતિક્રિયા આપી. અમેરિકાની સ્ટેટ રિપ્રેઝેન્ટેટિવ બેકા બેલિન્ટે કહ્યું કે, જો આ પ્રકારનું નિવેદન બરાક ઓબામા અથવા જો બાઈડને આપ્યું હોત તો રિપબ્લિકન પક્ષ તેમને હટાવવાની માંગ કરત.
સેનેટર ક્રિસ મર્ફીએ જણાવ્યું કે, જો તેઓ ટ્રમ્પની કેબિનેટમાં હોત તો તરત જ 25મા સુધારા લાગુ કરવા માટે કાનૂની સલાહ લેતા. જ્યારે કોંગ્રેસ સભ્ય યાસ્મીન અન્સારીએ ટ્રમ્પને માનસિક રીતે અયોગ્ય ગણાવી તેમને હટાવવાનો આ યોગ્ય સમય ગણાવ્યો.
અમેરિકામાં 25મા સુધારા હેઠળ, જો રાષ્ટ્રપતિ અસમર્થ ગણાય તો કેબિનેટ પહેલું પ્રસ્તાવ મૂકે છે. જો રાષ્ટ્રપતિ વિરોધ કરે તો મામલો કોંગ્રેસ અને સેનેટમાં જાય છે, જ્યાં 2/3 બહુમતીથી મંજૂરી મળે તો રાષ્ટ્રપતિને પદ છોડવું પડે છે. મિડિયા અહેવાલો મુજબ, વિવાદ વધ્યા બાદ ટ્રમ્પે ત્રણ દિવસની રજા પણ લીધી છે, જેને કારણે રાજકીય ગરમાવો વધુ તેજ બન્યો છે.
