ગ્લાસ્ગોમાં યોજાયેલી કોમનવેલ્થ ગેમ્સ 2026માં ભારત માટે ગૌરવની ક્ષણ સર્જાઈ, જ્યારે નાસિક જિલ્લાના એક નાનકડા આદિવાસી ગામમાંથી આવેલા પેરા એથ્લીટ દિલીપ મહાદુ ગાવિતે પુરુષોની 100 મીટર T47 સ્પર્ધામાં ગેમ્સ રેકોર્ડ સાથે સુવર્ણ ચંદ્રક જીતી ઇતિહાસ રચ્યો. પાંચ વર્ષની ઉંમરે અકસ્માતમાં એક હાથ ગુમાવનાર દિલીપ આજે પોતાની મહેનત, આત્મવિશ્વાસ અને અડગ સંકલ્પથી દેશના કરોડો લોકો માટે પ્રેરણાસ્ત્રોત બન્યો છે. તેની આ સફર સાબિત કરે છે કે મુશ્કેલીઓ ભલે મોટી હોય, પરંતુ મજબૂત ઇચ્છાશક્તિ હોય તો સફળતા જરૂર મળે છે.
દિલીપ ગાવિતનો જન્મ મહારાષ્ટ્રના નાસિક નજીક આવેલા તોરણ ડોંગરી ગામમાં એક સામાન્ય ખેડૂત પરિવારમાં થયો હતો. બાળપણમાં ઝાડ પરથી પડી જતાં તેના હાથમાં ગંભીર ઈજા થઈ હતી. સમયસર યોગ્ય સારવાર ન મળતાં ચેપ ફેલાયો અને અંતે તેનો એક હાથ કાપવો પડ્યો. આ ઘટના બાદ પણ તેણે જીવન સામે હાર માની નહીં. ગામમાં પૂરતી રમતગમતની સુવિધા ન હોવા છતાં તેણે દોડ પ્રત્યેનો જુસ્સો જાળવી રાખ્યો. શાળાના દિવસોમાં તેના કોચ વૈજનાથ કાલેએ તેમની પ્રતિભા ઓળખી અને વ્યવસ્થિત તાલીમ આપીને તેને પેરા એથ્લેટિક્સ તરફ આગળ વધાર્યો.
ગ્લાસ્ગોમાં યોજાયેલી 100 મીટર T47 ફાઇનલ વરસાદથી ભીના ટ્રેક પર યોજાઈ હતી. શરૂઆતમાં દિલીપ પાછળ દેખાતો હતો, પરંતુ અંતિમ મીટરોમાં તેણે જોરદાર ઝડપ પકડી 10.71 સેકન્ડમાં રેસ પૂર્ણ કરી ગેમ્સ રેકોર્ડ સાથે ગોલ્ડ મેડલ પોતાના નામે કર્યો. આ જ સ્પર્ધામાં ભારતના મોહમ્મદ બાસિલે સિલ્વર મેડલ જીતતા ભારતે ઐતિહાસિક 1-2 ફિનિશ નોંધાવી.
દિલીપ અગાઉ 400 મીટર T47 સ્પર્ધામાં પણ એશિયન સ્તરે સુવર્ણ ચંદ્રક જીત્યો છે. હવે તેનું આગામી લક્ષ્ય જાપાનમાં યોજાનારી પેરા એશિયન સ્પર્ધા અને ત્યારબાદ લોસ એન્જેલિસ 2028 પેરાલિમ્પિક્સમાં ભારત માટે વધુ સફળતા મેળવવાનું છે. કોમનવેલ્થ ગેમ્સમાં દિલીપનું આ ગોલ્ડ ભારત માટે ત્રીજું સુવર્ણ ચંદ્રક બન્યું અને દેશના પદકોની સંખ્યામાં વધુ વધારો કર્યો.
