શું રક્ષકો જ ભક્ષક બની રહ્યા છે? ગઈકાલે રવિવારે નવી દિલ્હીમાં વિરોધ પ્રદર્શનના કવરેજ દરમિયાન દિલ્હી પોલીસના એસીપી વિવેક ભગત પર એક મહિલા પત્રકાર સાથે કથિત છેડતી કરવાનો અત્યંત ગંભીર આરોપ લાગ્યો છે. આ આઘાતજનક ઘટનાને પગલે કોકરોચ જનતા પાર્ટી (CJP) એ પોલીસ વિરુદ્ધ મોરચો માંડી દીધો હતો અને આકરા વિરોધ પ્રદર્શનો શરૂ કર્યા હતો.
CJP ના પ્રવક્તા સૌરવ દાસે સોશિયલ મીડિયા પ્લેટફોર્મ ‘X’ પર પોસ્ટ કરીને દાવો કર્યો હતો કે પોલીસ પીડિત મહિલા પત્રકારને મળવા માટે પણ તૈયાર નથી. સૌરવ દાસના જણાવ્યા અનુસાર, CJP ના લોકો સંસદ માર્ગ પોલીસ સ્ટેશનની બહાર એકઠા થયા હતા. તેઓએ સ્પષ્ટ ચીમકી ઉચ્ચારી હતી કે પોલીસનું આ વલણ બિલકુલ સ્વીકાર્ય નથી અને જ્યાં સુધી તેમને અંદર જવાની પરવાનગી આપવામાં નહીં આવે, ત્યાં સુધી તેઓ પોલીસ સ્ટેશનની બહાર જ ઊભા રહીને પોતાનો વિરોધ ચાલુ રાખશે.
આ સમગ્ર વિવાદ અને ભારે દબાણ બાદ દિલ્હી પોલીસે પોતાના સત્તાવાર ‘X’ હેન્ડલ પરથી સમગ્ર ઘટનાક્રમ અંગે ખુલાસો આપ્યો છે. પોલીસના જણાવ્યા મુજબ, ૩ ઓક્ટોબર ૨૦૨૬ ના રોજ નવી દિલ્હી વિસ્તારમાં ચાલી રહેલા વિરોધ પ્રદર્શન દરમિયાન કાયદો અને વ્યવસ્થાની સ્થિતિ વચ્ચે કુલ ત્રણ મહિલા પત્રકારોએ પોલીસ અધિકારીઓ પર જાતીય સતામણીના આરોપ લગાવ્યા છે.
નવી દિલ્હી જિલ્લા પોલીસને આ ત્રણેયની ફરિયાદો મળી ચૂકી છે. મામલાની ગંભીરતાને ધ્યાનમાં રાખીને, સ્વતંત્ર અને નિષ્પક્ષ તપાસ સુનિશ્ચિત કરવા માટે આખો કેસ હવે ક્રાઈમ બ્રાન્ચને સોંપી દેવામાં આવ્યો છે. પોલીસ વિભાગનું કહેવું છે કે હવે ક્રાઈમ બ્રાન્ચ આ તમામ ફરિયાદોની ઊંડાણપૂર્વક તપાસ કરશે અને તે પૂર્ણ થયા બાદ જ આરોપોની વાસ્તવિક સ્થિતિ અને સચ્ચાઈ સ્પષ્ટ થઈ શકશે.
