સ્વતંત્રતા દિવસની ઉજવણીને હવે ગણતરીના કલાકો બાકી છે અને એ જ સમયે દિલ્હીમાં એકસાથે અનેક મહત્વના સ્થળોને બોમ્બથી ઉડાવી દેવાની ધમકી મળતાં રાજધાનીની સુરક્ષા વ્યવસ્થા ચકચારમાં આવી ગઈ છે. દિલ્હી હાઈકોર્ટથી લઈને IGI એરપોર્ટ સુધી ધમકી પહોંચતા સુરક્ષા એજન્સીઓએ તાત્કાલિક સર્ચ ઓપરેશન શરૂ કર્યું છે. જોકે અત્યાર સુધીની તપાસમાં કોઈ શંકાસ્પદ વસ્તુ મળી આવી નથી.
મળતી માહિતી મુજબ, દિલ્હી હાઈકોર્ટને ઈ-મેલ મારફતે ધમકી આપવામાં આવી હતી. ધમકી બાદ બોમ્બ ડિસ્પોઝલ સ્ક્વોડ અને સ્નિફર ડોગ્સની મદદથી હાઈકોર્ટ પરિસરની સંપૂર્ણ તપાસ કરવામાં આવી રહી છે. હાઈકોર્ટના રજિસ્ટ્રાર જનરલ પણ દિલ્હી પોલીસ સાથે સતત સંપર્કમાં છે. હાઈકોર્ટના જોઈન્ટ સેક્રેટરી એડવોકેટ કુણાલે ધમકીને પ્રથમ નજરે ખોટી હોવાનું જણાવ્યું છે, જોકે સુરક્ષા પ્રક્રિયા મુજબ તપાસ ચાલુ રાખવામાં આવી છે.
દિલ્હી ફાયર સર્વિસ અનુસાર હાઈકોર્ટ ઉપરાંત જામનગર હાઉસ, ઝંડેવાલાન ફ્લેટેડ ફેક્ટરી કોમ્પ્લેક્સ, સાકેત સ્થિત ડીએમ કાર્યાલય, IGI એરપોર્ટના ટર્મિનલ-3 અને દિલ્હી કેન્ટના SDM કાર્યાલયને પણ બોમ્બની ધમકી મળી હતી. તમામ સ્થળોએ ફાયર ટેન્ડર અને સુરક્ષા ટીમો મોકલવામાં આવી હતી. અત્યાર સુધી કોઈ વિસ્ફોટક વસ્તુ મળી નથી.
આ ઘટનાને ધ્યાનમાં રાખીને 15 ઓગસ્ટ પહેલાં દિલ્હીના સંવેદનશીલ સ્થળો, સરકારી ઇમારતો, જાહેર વિસ્તારો અને ટ્રાન્સપોર્ટ હબ પર સુરક્ષા વધારી દેવામાં આવી છે. પોલીસે તપાસ અને પેટ્રોલિંગ વધુ કડક બનાવ્યું છે.
