દિલ્હીના મુખ્યમંત્રી રેખા ગુપ્તા આજે સવારે પોતાની કેમ્પ ઓફિસમાં લોકદરબાર કરી રહ્યા હતા, ત્યારે અચાનક એક શખસે તેમના પર હુમલો કરી દીધો હતો. મળતી માહિતી મુજબ, આરોપી બૂમો પાડતો આવ્યો અને મુખ્યમંત્રીને લાફો ઝીંકી દીધો અને ગાળો ભાંડવા લાગ્યો. ત્યારબાદ ઘટનાસ્થળે અફરા-તફરી મચી ગઈ હતી.
મુખ્યમંત્રીની સુરક્ષામાં ચૂક
જોકે, બાદમાં પોલીસે તુરંત જ હુમલાખોરની ધરપકડ કરી લીધી અને આ મામલે પૂછપરછ શરૂ કરી છે. જોકે, હજુ સુધી આ હુમલો કેમ કરવામાં આવ્યો તે વિશેનું કોઈ કારણ સામે નથી આવ્યું. પરંતુ આ ઘટનાને મુખ્યમંત્રીની સુરક્ષામાં થયેલી મોટી ચૂક માનવામાં આવે છે. નોંધનીય છે કે, આ ઝપાઝપીમાં રેખા ગુપ્તાને ઈજા પણ થઈ હતી.
અન્ય એક પ્રત્યક્ષદર્શી સુરેશ ખંડેલવાલએ કહ્યું, ‘હું અહીં પહોંચ્યો અને તરત જ મુખ્યમંત્રી બહાર આવ્યા. તેમણે લોકો સાથે મળવાનું શરૂ કર્યું. આરોપી તકની રાહ જોઈ રહ્યો હતો અને તક મળતા જ તેણે સીએમ પર હુમલો કરી દીધો. આ લગભગ સવારે 8:05 – 8:10 વાગ્યે બન્યું. પોલીસ તેને લઈ ગઈ…’
દિલ્હીના સીએમઓએ શું કહ્યું
દિલ્હીના સીએમઓના જણાવ્યા અનુસાર, હુમલાખોરને તાત્કાલિક પકડી લેવામાં આવ્યો અને પોલીસને સોંપવામાં આવ્યો. ઓફિસે જણાવ્યું હતું કે, “આરોપીને દિલ્હી પોલીસે પકડી લીધો છે અને તેની પૂછપરછ કરવામાં આવી રહી છે.” ગુપ્તાને બાદમાં તબીબી તપાસ માટે હોસ્પિટલમાં લઈ જવામાં આવ્યા હતા.
પોલીસે આરોપીની ઓળખ રાજેશ ભાઈ ખીમજી ભાઈ સાકરિયા (41) તરીકે કરી છે, જેણે રાજકોટનો રહેવાસી હોવાનો દાવો કર્યો હતો. ગુજરાત પોલીસની મદદથી તેના પૂર્વજોની ચકાસણી કરવામાં આવી રહી છે.
