સંભલમાં હિંસા અને વીજળી ચોરીના મામલામાં સંડોવાયેલા સપા સાંસદ ઝિયાઉર રહેમાન બર્ક સામે કાર્યવાહી તેજ થઈ ગઈ છે. હવે તેમના દ્વારા કરાયેલા અતિક્રમણ સામે પણ કાર્યવાહી શરૂ કરવામાં આવી છે. દરોડા, FIR અને પાવર કટ બાદ હવે યોગી સરકારનું બુલડોઝર તેમના ઘરે પહોંચ્યું, પગથિયા તોડી નાખ્યા છે. એવું કહેવાય છે કે નકશા પાસ કર્યા વિના ઘર બનાવવા માટે એસડીએમ સાંસદને બે નોટિસ મોકલી ચૂક્યા છે. આ સાથે સાંસદે ઘરની બહાર ગટર પર પગથિયાઓ બનાવ્યા હતા. નગરપાલિકા આ વિસ્તારમાં ગેરકાયદેસર અતિક્રમણ સામે સતત કાર્યવાહી કરી રહી છે.
પ્રાપ્ત માહિતી અનુસાર, વહીવટીતંત્ર અને નગરપાલિકાની સંયુક્ત ટીમ સપા સાંસદ બર્કના ઘરે પહોંચી હતી. ત્યાં બુલડોઝર દ્વારા ડિમોલિશનની કામગીરી હાથ ધરી હતી અને સાંસદના ઘરની બહાર ગટર પર બનાવેલ સીડીઓ તોડી પાડવામાં આવી હતી. તમને જણાવી દઈએ કે, સંભલથી સમાજવાદી પાર્ટીના સાંસદ ઝિયાઉર રહેમાન બર્ક પર વીજળી ચોરીનો આરોપ છે. વીજળી વિભાગે તેમના પર વીજળી ચોરી બદલ 1 કરોડ 91 લાખ રૂપિયાનો દંડ ફટકાર્યો છે. આ સિવાય વિજળી વિભાગે તેમની સામે એફઆઈઆર પણ નોંધાવી છે. એટલું જ નહીં સપા સાંસદ બર્કના ઘરની વીજળી પણ કાપી નાખવામાં આવી છે.
વીજળી ચોરીની પુષ્ટિ થયા બાદ વિભાગે બપોરે સાંસદના ઘરનું વીજ જોડાણ પણ કાપી નાખ્યું હતું. જોકે, સાંસદના એડવોકેટે દરોડા સામે વાંધો ઉઠાવ્યો છે અને ઓવરલોડિંગના આરોપને ફગાવી દીધો છે. તેમણે જણાવ્યું કે ઘરમાં દસ કિલોવોટની સોલાર પેનલ અને પાંચ કિલોવોટનું જનરેટર પણ લગાવવામાં આવ્યું છે.
વિદ્યુત વિભાગના એસડીઓ સંતોષ ત્રિપાઠીએ જણાવ્યું હતું કે, જ્યારે વિદ્યુત વિભાગની ટીમે સાંસદ બર્કના ઘરમાં લગાવેલા મીટરનું રીડિંગ લીધું તો તે શૂન્ય હોવાનું બહાર આવ્યું. જે બાદ વિભાગ દ્વારા તેમને નોટિસ મોકલવામાં આવશે. જો નોટિસના 15 દિવસમાં રકમ જમા કરવામાં નહીં આવે તો વિભાગ દ્વારા આરસી જારી કરવામાં આવશે.
આ પણ વાંચો :-
