ગણદેવી નગર પાલિકાની ચૂંટણીમાં 22 બેઠકો પર બિનહરીફ વિજય થયા બાદ બાકી રહેલી બે બેઠકો પર પણ ભાજપના ઉમેદવારોનો વિજય થતાં તમામ 24 બેઠકો પર ભાજપનો વિજય થયો છે.
આ સતત બીજી ચૂંટણીમાં ભાજપે ક્લિપ સ્વીપ કરી છે. પાંચ વર્ષ પહેલાં પણ તમામ 24 બેઠકો ભાજપે જીતી લીધી હતી.
આ ચૂંટણીમાં 18 બેઠકો પર કોંગ્રેસ તેમના ઉમેદવારોને સમયસર મેન્ડેડ પહોંચાડી ન શકી હતી. એ ઉપરાંત 4 અપક્ષ ઉમેદવારોએ ઉમેદવારીપત્ર પરત ખેંચી લેતા ચૂંટણી પહેલાં જ ભારતીય જનતા પાર્ટીને 22 બેઠકો બિનહરીફ મળી જતાં પાલિકા પર ભાજપનું શાસન નિશ્ચિત થઈ ગયું હતું. બાકીની બે બેઠકો માટે રવિવારે મતદાન થયા બાદ આજે મતગણતરી થતાં વોર્ડ નં 1 ભાજપના ઉમેદવાર રાજેશ પટેલને 1095 અને પ્રતિસ્પર્ધી અપક્ષ જયેશ ઢીંમરને 396 મત મળતાં ભાજપનો 663 મતે વિજય થયો હતો. જ્યારે વોર્ડ નં 4 માં ભાજપના નિલેશ શર્માને 858 મત અને તેમના પ્રતિસ્પર્ધી અપક્ષ જયેશ ઢીંમરને 601 મત મળતાં ભાજપનો 157 મતે વિજય થયો હતો. પરિણામ જાહેર થતાં વિજય રેલી નીકળી હતી.
