સ્થાનિક સ્વરાજ્યની ચૂંટણી માટે આજે રાજ્યભરમાં મતગણતરીની પ્રક્રિયા શરૂ થઈ છે. સુરત જિલ્લામાં પણ ઉત્સુકતા વચ્ચે મતગણતરી ચાલી રહી છે. ત્યારે બારડોલી નગરપાલિકાની મતગણતરી શહેરમાં આવેલ BABC શાળા ખાતે કરવામાં આવી રહી છે, જ્યાં વહેલી સવારે જ પ્રક્રિયાની શરૂઆત થઈ હતી.
મતગણતરી વચ્ચે પ્રથમ મહત્વનું પરિણામ સામે આવ્યું છે, જેમાં બારડોલી નગરપાલિકાના વોર્ડ નંબર-3માં ભાજપની પેનલ વિજેતા જાહેર થઈ છે. આ વોર્ડમાં ભાજપના ચારેય ઉમેદવારોને મતદારોનો મજબૂત સમર્થન મળ્યો હતો.
વિજેતા ઉમેદવારોમાં ક્રિષ્ના હાર્દિક ચૌહાણ, કેજલ સુધીર વ્યાસ, જેનિષ ઈશ્વર ભંડારી અને તેજસ ચતુર પટેલનો સમાવેશ થાય છે. ચારેય ઉમેદવારોની જીત સાથે ભાજપે વોર્ડ નં. 3માં ક્લીન સ્વીપ કર્યો છે.
મતગણતરીના અન્ય રાઉન્ડ ચાલુ છે અને આગામી સમયમાં વધુ પરિણામો જાહેર થવાના છે. સમગ્ર બારડોલી શહેરમાં રાજકીય ઉત્સુકતા ચરમસીમાએ પહોંચી છે, જ્યારે ભાજપ કાર્યકરોમાં જીતને લઈને આનંદનો માહોલ જોવા મળી રહ્યો છે.
