ભૂટાનમાં ગ્લેશિયર સરોવર ફાટવાની ઘટનાને પગલે ભારતના પશ્ચિમ બંગાળ અને આસામમાં પૂરનું જોખમ ઊભું થયું છે. ભૂટાનના લેમથાંગ વિસ્તારમાં આવેલા અત્યંત સંવેદનશીલ શિન્તાફૂ ગ્લેશિયર સરોવરમાંથી ગુરુવાર રાતથી પાણીનો ભારે પ્રવાહ નીકળી રહ્યો છે. આ પાણી મોફૂ નદીના માર્ગે નીચે તરફ સંકોશ નદીમાં વહી રહ્યું હોવાથી ઉત્તર બંગાળના અનેક વિસ્તારોમાં એલર્ટ જાહેર કરવામાં આવ્યું છે.
અલીપુરદ્વારમાંથી 10 હજાર લોકોને સુરક્ષિત સ્થળે ખસેડાયા
સરોવર ફાટવાની ઘટનાને પગલે પશ્ચિમ બંગાળના અલીપુરદ્વાર, જલપાઈગુડી અને દાર્જિલિંગ સહિતના જિલ્લાઓમાં પૂરનું જોખમ વધ્યું છે. પરિસ્થિતિને ધ્યાનમાં રાખીને અલીપુરદ્વારમાં આશરે 10 હજાર લોકોને સુરક્ષિત સ્થળોએ ખસેડવામાં આવ્યા છે.
પશ્ચિમ બંગાળના મંત્રીઓ નિશીથ પ્રમાણિક અને મનોજ કુમાર ઓરાંવે સંકોશ નદીના કિનારે રહેતા લોકોને તાત્કાલિક સલામત સ્થળે જવાની અપીલ કરી છે. આ ઉપરાંત ડિઝાસ્ટર મેનેજમેન્ટ વિભાગ, NDRF અને SDRFની ટીમોને પણ એલર્ટ કરી દેવામાં આવી છે.
ગામડાઓમાં વાગી રહ્યા છે સાયરન
ભૂટાનના શિન્તાફૂ સરોવરમાંથી પાણીનો પ્રવાહ શરૂ થયા બાદ આસપાસના વિસ્તારોમાં સતત સાયરન વગાડવામાં આવી રહ્યા છે. ઉત્તર બંગાળની સંકોશ નદી અને તેની સાથે જોડાયેલી સહાયક નદીઓના કેચમેન્ટ વિસ્તારમાં રહેતા લોકોને તાત્કાલિક સુરક્ષિત સ્થળે ખસી જવાની સલાહ આપવામાં આવી છે.
સંકોશ નદી ભૂટાનમાંથી ભારતમાં પ્રવેશે છે અને ઉત્તર પશ્ચિમ બંગાળ તથા આસામના અનેક વિસ્તારો માટે મહત્વપૂર્ણ છે. નદીના જળસ્તરમાં અચાનક વધારો થવાથી નદી કિનારે વસતા લોકો, પશુધન, ખેતીની જમીન અને માળખાકીય સુવિધાઓને નુકસાન થવાની આશંકા છે.
ભાજપના સાંસદે વીડિયો જાહેર કરી લોકોને ચેતવ્યા
દાર્જિલિંગના ભાજપના સાંસદ રાજુ બિસ્તાએ વીડિયો જાહેર કરીને લોકોને સાવચેત રહેવાની અપીલ કરી છે. તેમણે દાર્જિલિંગની પહાડીઓ, તરાઈ અને ડુઆર્સ વિસ્તારના લોકોને ખાસ સતર્ક રહેવા જણાવ્યું છે. પશ્ચિમ બંગાળના વનમંત્રી અને કુમારગ્રામના ધારાસભ્ય મનોજ કુમાર ઓરાંવે પણ અલીપુરદ્વાર જિલ્લામાં સંકોશ નદીના કિનારે રહેતા લોકોને સલામત સ્થળે ખસી જવાની અપીલ કરી છે.
ભારત સરકારે જાહેર કરી વિશેષ એડવાઈઝરી
ભારત સરકાર દ્વારા પણ આ પરિસ્થિતિને ધ્યાનમાં રાખીને વિશેષ એડવાઈઝરી જાહેર કરવામાં આવી છે. એડવાઈઝરીમાં જણાવ્યા અનુસાર, પુનાત્સાંગછૂ નદીના ઉપરવાસમાં અચાનક પૂર આવવાને કારણે પશ્ચિમ બંગાળના અલીપુરદ્વાર અને આસામના ધુબરી જિલ્લામાં નદીના જળસ્તરમાં ઝડપથી વધારો થઈ શકે છે.
પૂરનું પાણી ઘટનાના 6થી 8 કલાકની અંદર ભારત-ભૂટાન સરહદ સુધી પહોંચવાની આશંકા વ્યક્ત કરવામાં આવી હતી.
આ વિસ્તારોમાં પૂરનું જોખમ
- પશ્ચિમ બંગાળના અલીપુરદ્વાર જિલ્લામાં જળસ્તર વધવાની શક્યતા.
- આસામના ધુબરી જિલ્લામાં પણ પૂરનું જોખમ.
- દાર્જિલિંગની પહાડીઓ, જલપાઈગુડી અને ઉત્તર બંગાળના અન્ય વિસ્તારોમાં એલર્ટ.
- કૂચબિહાર જિલ્લાના તુફાનગંજ અને બક્સીરહાટમાં NDRF તથા SDRFની ટીમો તૈનાત.
ભૂટાનમાં સરોવર ફાટવાની આ ઘટનાને પગલે સરહદી વિસ્તારોમાં વહીવટી તંત્ર દ્વારા પરિસ્થિતિ પર સતત નજર રાખવામાં આવી રહી છે. લોકોને નદીના કિનારાથી દૂર રહેવા અને તંત્રની સૂચનાઓનું પાલન કરવા અપીલ કરવામાં આવી છે.
