ગાંધીનગર શહેર અને જિલ્લામાં ચોમાસાની મોસમ અનોખી રીતે અનુભવાઈ રહી છે. શહેરમાં હજુ સુધી મોસમનો ધારણા મુજબનો વરસાદ નોંધાયો નથી. છેલ્લા 24 કલાકમાં જિલ્લાના ચારેય તાલુકામાં વરસાદી ઝાપટાં પડ્યાં છે.
માણસા તાલુકામાં સૌથી વધુ 10 મિમી વરસાદ નોંધાયો છે. દહેગામ અને ગાંધીનગરમાં 7 મિમી તથા કલોલમાં 6 મિમી વરસાદ પડયો છે. શુક્રવારે સવારથી વાદળછાયું વાતાવરણ જોવા મળ્યું છે. સવારે 26 ડિગ્રી તાપમાન નોંધાયું છે. બપોરે તાપમાન 32 ડિગ્રી સુધી પહોંચવાની સંભાવના છે.
હવામાન વિભાગના જણાવ્યા અનુસાર, આજે ધુમ્મસ સાથે ભેજનું પ્રમાણ 82થી 87 ટકા રહેવાની શક્યતા છે. ગુરુવારે મહત્તમ તાપમાન 31.8 ડિગ્રી નોંધાયું હતું. રાત્રિ દરમિયાન કેટલાક વિસ્તારોમાં ઝરમર વરસાદ પડ્યો હતો. હવામાન વિભાગે શહેરમાં વધુ વરસાદની આગાહી કરી છે. તાપમાન અને ભેજના પ્રમાણમાં થતા ફેરફારને કારણે વરસાદી માહોલ સર્જાયો છે. સમગ્ર રાજ્યમાં છેલ્લા કેટલાક દિવસથી હવામાનમાં પરિવર્તન જોવા મળી રહ્યું છે.
