શું તમે ક્યારેય 50,000 અસલી સિક્કાઓથી બનેલી ભગવાન ગણેશજીની પ્રતિમા જોઈ છે? જો નહીં, તો છત્તીસગઢના રાયપુર પહોંચી જાવ, જ્યાં ભક્તિ અને કળાનો એક અદ્ભુત સંગમ જોવા મળી રહ્યો છે. રાયપુરમાં એક એવી મનમોહક ગણેશ પ્રતિમા સ્થાપિત કરવામાં આવી છે, જેણે આખા દેશનું ધ્યાન ખેંચ્યું છે અને દર્શન માટે ભક્તોની ભારે ભીડ ઉમટી પડી છે.
છત્તીસગઢના રાયપુર સ્થિત દેવપુરી (બજરંગ ચોક) ખાતે શિવ શક્તિ યુવા સમિતિ દ્વારા ‘સિક્કા વાળા ગણેશજી’ની સ્થાપના કરવામાં આવી છે. આ વર્ષે સમિતિના ગણેશોત્સવનું 53મું વર્ષ છે. આ ભવ્ય અને અનોખી ગણેશ પ્રતિમાને તૈયાર કરવા માટે ₹1, ₹2, ₹5, ₹10 અને ₹20 ના મૂલ્યના 50,000 થી વધુ ચલણી સિક્કાઓનો ઉપયોગ કરવામાં આવ્યો છે.
આ મૂર્તિની કારીગરી એટલી બારીક છે કે જોનારા દંગ રહી જાય છે. બાપ્પાના મુખ અને ધોતીને શણગારવા માટે ₹1 અને ₹2 ના સિક્કાઓ વપરાયા છે. જ્યારે તેમની સૂંઢ, કાન અને આંખો માટે ₹5 ના સિક્કાનો ઉપયોગ કરાયો છે. આ ઉપરાંત, ભગવાન ગણેશના મુગટને ભવ્ય દેખાવ આપવા માટે ₹10 અને ₹20 ના સિક્કાઓ ખૂબ જ કાળજીપૂર્વક ગોઠવવામાં આવ્યા છે. સિક્કાઓની ચમકને લીધે આખી પ્રતિમા દૂરથી સોના-ચાંદી જેવી આકર્ષક દેખાય છે.
આ અદભુત મૂર્તિને તૈયાર કરવામાં કારીગરોને સતત 15 દિવસનો સમય લાગ્યો હતો. આટલા મોટા પ્રમાણમાં સિક્કાઓ એકઠા કરવા માટે સમિતિએ બેંકો, સ્થાનિક દુકાનદારો અને આસપાસના રહીશોની મદદ લીધી હતી. નોંધનીય છે કે, ગણેશ ઉત્સવ પૂર્ણ થયા બાદ સમિતિની બેઠકમાં નક્કી કરવામાં આવશે કે આ સિક્કાઓને કાઢીને કોઈ સામાજિક કાર્ય, મંદિરમાં દાન કે જરૂરિયાતમંદોની મદદ માટે વાપરવા કે કેમ. ખરેખર, આ ‘સિક્કા વાળા ગણેશજી’ આસ્થા અને સર્જનાત્મકતાનું ઉત્તમ ઉદાહરણ પૂરું પાડે છે.
