ડાંગ જિલ્લાના વઘઈ ગામના અને હાલ વલ્લભ વિદ્યાનગર ખાતે અભ્યાસ કરતાં યુવા સાયબર સંશોધક હેત દિસેશ પટેલે યુએસની પ્રખ્યાત અવકાશી સંસ્થા NASAની સિસ્ટમમાં સુરક્ષા ખામી શોધી કાઢી હતી. આથી આ મહત્વપૂર્ણ ખામીની જાણ નાસાને કરી હતી. આથી યુવા સંશોધક હેત પટેલની કુશળતાની કદર કરતા NASA દ્વારા “Letter of Appreciation” એનાયત કર્યો છે.
વલ્લભ વિદ્યાનગરમાં અભ્યાસ કરતાં વિદ્યાર્થી હેત પટેલ હાલ વલ્લભ વિદ્યાનગર ખાતે અભ્યાસ કરે છે. બી.ટેકના અંતિમ વર્ષમાં અભ્યાસની સાથે સાયબર સુરક્ષા અને એથિકલ હેકિંગ ક્ષેત્રે વિદ્યાર્થીએ આગવી ઓળખ ઉભી કરી છે. હેત પટેલે નાસાના સિસ્ટમમાં ખામીની જાણ કરતા તેને “Letter of Appreciation” સન્માન પ્રાપ્ત થયું છે. ઉપરાંત નાસાએ હોલ ઓફ ફેમમાં પણ તેમના યોગદાનને માન્યતા આપીને સ્થાન આપ્યું છે.
ડાંગ જિલ્લાના હેત પટેલે અગાઉ પણ અમેરિકાની એક કંપની વિન્ડમિલ લેબની સાઈટમાં ગંભીર સુરક્ષા ખામી શોધી કાઢી હતી. આથી કંપનીએ તેને 1 હજાર ડોલરનું ઇનામ એનાયત કર્યું હતું. ડાંગ જેવા આદિવાસી અને ગ્રામ્ય વિસ્તારમાંથી આવતા વિદ્યાર્થીની અનોખી સિદ્ધિની પગલે ડાંગ અને પરિવારમાં ખુશીનો માહોલ છે.
સામાજિક અને શૈક્ષણિક આગેવાનો દ્વારા અભિનંદન પાઠવવામાં આવી રહ્યા છે. વિધાર્થીના પિતાએ જણાવ્યું કે, હાલ પુત્રની સિદ્ધિ બદલ તેની કોલેજના પ્રિન્સિપાલે પણ શુભેચ્છાઓ પાઠવી છે. તેમજ લોકો પુત્રના ઉજ્જવળ ભવિષ્ય અંગે શુભકામનાઓ પાઠવી રહ્યા છે. ડાંગના વિદ્યાર્થીને મળેલી અદ્ભુત સિદ્ધિ બદલ ડાંગનું જ નહીં પરંતુ ગુજરાતનું નામ રોશન થયું છે
