સુરત શહેરના એક ૭૨ વર્ષીય સિનિયર સિટીઝનને નિશાન બનાવી સાયબર માફિયાઓએ ‘ડિજિટલ એરેસ્ટ’ના બહાને રૂ. ૧.૪૭ કરોડથી વધુની રકમ પડાવ્યાની ચોંકાવનારી ઘટના સામે આવી છે. સુરત શહેર સાયબર ક્રાઈમ સેલે આ હાઈપ્રોફાઈલ કેસમાં ટેકનિકલ સર્વેલન્સ અને બેંક ટ્રાન્ઝેક્શનના આધારે અમદાવાદના ગોતા વિસ્તારમાંથી મુખ્ય આરોપી ઉર્જિત સચ્ચિદાનંદ કવિની ધરપકડ કરી છે.
આરોપીએ વૃદ્ધને મની લોન્ડરિંગ અને દેશવિરોધી પ્રવૃત્તિના ખોટા કેસમાં ફસાવી સતત ૨૮ દિવસ સુધી માનસિક દબાણમાં રાખી આ જંગી રકમ પડાવી લીધી હતી.
સાયબર ગઠિયાઓએ ફરિયાદી વૃદ્ધને ફોન કરી પોતે મુંબઈ સાયબર ક્રાઈમ અને CBI ઓફિસર હોવાની ઓળખ આપી હતી. ગઠિયાઓએ એવી સ્ક્રિપ્ટ રચી હતી કે, ‘તમારા ઓળખ કાર્ડના નંબર પરથી લેવાયેલા સીમકાર્ડનો ઉપયોગ જેટ એરવેઝના નરેશ ગોયલના મની લોન્ડરિંગ કેસમાં થયો છે અને તેનાથી દેશવિરોધી મેસેજ મોકલાયા છે.’ આ સાંભળી ગભરાઈ ગયેલા વૃદ્ધને સતત ૨૮ દિવસ સુધી વીડિયો કોલ પર નજરકેદ હેઠળ રાખી ‘ડિજિટલ એરેસ્ટ’ કરાયા હતા.સાયબર ક્રાઈમની ટીમે જ્યારે તપાસ હાથ ધરી ત્યારે માલૂમ પડ્યું કે પીડિતના રૂ. ૧.૪૭ કરોડમાંથી રૂ. ૩૯ લાખ સીધા જ અમદાવાદના રહેવાસી ઉર્જિત કવિના ICICI બેંકના ખાતામાં ટ્રાન્સફર થયા હતા.
અમદાવાદના ‘સેવી સ્વરાજ-૧’ ફ્લેટમાં દરોડો પાડી પોલીસે ઉર્જિતને ઝડપી લીધો હતો. પોલીસ તપાસમાં ખૂલ્યું છે કે આરોપીના આ એકાઉન્ટમાં અત્યાર સુધીમાં કુલ રૂ. ,૮૪,૯૩,૬૨૮ના શંકાસ્પદ વ્યવહારો થયા છે, જે દેશભરના લોકો સાથે થયેલી છેતરપિંડીના હોવાની આશંકા છે. NCCRP પોર્ટલ મુજબ મુખ્ય સૂત્રધાર ઉર્જિત કવિના આ એક જ એકાઉન્ટ વિરુદ્ધ દેશ વિવિધ રાજ્યોમાં ૧૨ ફરિયાદો નોંધાઈ ચૂકી છે.
