ધર્મ પરિવર્તન કર્યા બાદ અનામતનો લાભ મેળવવાના મામલે સુપ્રીમ કોર્ટે મહત્ત્વપૂર્ણ નિર્ણય સંભળાવ્યો છે. સુપ્રીમ કોર્ટે સ્પષ્ટ કર્યું છે કે કોઈ વ્યક્તિ હિંદુ ધર્મ છોડીને અન્ય ધર્મ અપનાવે તો તે માત્ર અગાઉની સામાજિક પછાત સ્થિતિના આધારે જૂના વર્ગના અનામતનો લાભ માગી શકે નહીં.
સુપ્રીમ કોર્ટના ન્યાયમૂર્તિ પ્રશાંત કુમાર મિશ્રા અને ન્યાયમૂર્તિ શ્રી ચંદ્રશેખરની ખંડપીઠે તમિલનાડુ સરકારની અપીલ ફગાવીને મદ્રાસ હાઈકોર્ટના નિર્ણયને યથાવત્ રાખ્યો છે.
આ મામલો તમિલનાડુ સરકારના 9 માર્ચ, 2024ના સરકારી આદેશ સાથે જોડાયેલો હતો. આ આદેશ હેઠળ પછાત વર્ગ (BC), અત્યંત પછાત વર્ગ (MBC), વિમુક્ત સમુદાયો અને અનુસૂચિત જાતિના એવા લોકોને ઇસ્લામ અપનાવ્યા બાદ પછાત વર્ગના મુસ્લિમ તરીકે માન્યતા આપવાની વ્યવસ્થા કરવામાં આવી હતી.
ધર્મ પરિવર્તન બાદ જૂના સામાજિક દરજ્જાનો આપમેળે લાભ નહીં
સુપ્રીમ કોર્ટે જણાવ્યું હતું કે હિંદુ સામાજિક વ્યવસ્થા છોડીને અન્ય ધર્મની સામાજિક વ્યવસ્થામાં પ્રવેશ કરનાર વ્યક્તિ માત્ર ધર્મ પરિવર્તન પહેલાંની સામાજિક પછાત સ્થિતિના આધારે બંધારણની કલમ 16(4) હેઠળ અનામતનો દાવો કરી શકે નહીં.
ખંડપીઠે સ્પષ્ટ કર્યું કે અગાઉના સામાજિક માળખામાં અનુભવેલી પછાત સ્થિતિના આધારે વ્યક્તિને નવા ધર્મમાં પછાત વર્ગનો દરજ્જો આપમેળે મળી જતો નથી.
અદાલતે બંધારણ (અનુસૂચિત જાતિ) આદેશ, 1950નો પણ ઉલ્લેખ કર્યો હતો. આ આદેશના ફકરા ત્રણ અનુસાર, હિંદુ, શીખ અથવા બૌદ્ધ ધર્મ સિવાયના અન્ય ધર્મને અનુસરતી વ્યક્તિને અનુસૂચિત જાતિના સભ્ય તરીકે માન્યતા આપવામાં આવતી નથી.
ફરીથી હિંદુ ધર્મ અપનાવ્યા બાદ પણ જૂનો દરજ્જો આપમેળે નહીં મળે
સુપ્રીમ કોર્ટે વધુમાં સ્પષ્ટતા કરી હતી કે જો કોઈ વ્યક્તિ ધર્મ પરિવર્તન કર્યા બાદ ફરીથી હિંદુ ધર્મ અપનાવે, તો પણ તેને અગાઉનો પછાત વર્ગનો દરજ્જો આપમેળે મળી જશે નહીં.
અનામતના અધિકારનો નિર્ણય માત્ર અગાઉની સામાજિક સ્થિતિના આધારે કરી શકાય નહીં. આ માટે લાગુ પડતા કાયદાકીય નિયમો અને સંબંધિત પરિસ્થિતિઓને ધ્યાનમાં લેવી જરૂરી છે.
સમીર અહમદના કેસથી શરૂ થયો હતો વિવાદ
આ સમગ્ર વિવાદ સમીર અહમદ સાથે જોડાયેલો છે. તેમનો જન્મ હિંદુ પરિવારમાં થયો હતો અને જન્મ સમયે તેમનું નામ પરમાસિવમ હતું. વર્ષ 2015માં તેમણે ઇસ્લામ ધર્મ અપનાવ્યો હતો. ત્યારબાદ તેમણે મુસ્લિમ રીતિ-રિવાજ મુજબ લગ્ન કર્યા અને ‘મુસ્લિમ લબ્બાઈ’ સમુદાયનું પ્રમાણપત્ર માગ્યું હતું. તમિલનાડુમાં આ સમુદાયનો સમાવેશ પછાત વર્ગના મુસ્લિમોમાં થાય છે.
જોકે, તહસીલદારે તેમની અરજી ફગાવી દીધી હતી. ત્યારબાદ સમીર અહમદે મદ્રાસ હાઈકોર્ટનો દરવાજો ખખડાવ્યો હતો. હાઈકોર્ટે પણ તેમની અરજી ફગાવીને રાજ્ય સરકારના વર્ષ 2024ના સરકારી આદેશને ગેરબંધારણીય ઠેરવ્યો હતો.
તમિલનાડુ સરકારે મદ્રાસ હાઈકોર્ટના આ નિર્ણયને સુપ્રીમ કોર્ટમાં પડકાર્યો હતો. જોકે, સુપ્રીમ કોર્ટે રાજ્ય સરકારની અપીલ ફગાવી દેતાં હાઈકોર્ટના નિર્ણયને યથાવત્ રાખ્યો હતો.
રાજકોટના આજી GIDC વિસ્તારમાં થયેલી રૂ. 1.53 કરોડના સોના-ચાંદીની લૂંટ અને કર્મચારીની હત્યાના કેસમાં રાજકોટ ક્રાઇમ બ્રાન્ચને સફળતા મળી છે. આ ગુનામાં સંડોવાયેલી નવ આરોપીઓની ટોળકીને રાજસ્થાનના ઉદયપુરથી ઝડપી લેવામાં આવી છે. પોલીસ દ્વારા લૂંટનો મુદ્દામાલ પણ કબજે કરવામાં આવ્યો છે.
🔸 રાજકોટ શહેરમાં સોના-ચાંદીના ઘરેણાંની લૂંટની ઘટનામાં તનવી ગોલ્ડના કર્મચારી પર ફાયરિંગ કરી હત્યા
🔸 લાલજી સરધારા નામના સોનીને ગોળી મારી એક કિલો સોનું અને ત્રણ કિલો ચાંદીની લૂંટ
🔸 આજીડેમ વિસ્તારમાં લૂંટની ઘટના બનતા પોલીસે રાજકોટમાં નાકાબંધી કરી
રાજકોટના આજી GIDC વિસ્તારમાં આવેલી તન્વી એક્સપોર્ટ પ્રાઇવેટ લિમિટેડના કર્મચારી લાલભાઈ સરધારા સોના-ચાંદીના દાગીના લઈને એક્ટિવા પર જઈ રહ્યા હતા. તે દરમિયાન કારમાં આવેલા લૂંટારુઓએ તેમને આંતરી દાગીનાથી ભરેલો થેલો લૂંટવાનો પ્રયાસ કર્યો હતો.
લાલભાઈએ લૂંટનો વિરોધ કરતાં એક આરોપીએ તેમની છાતીમાં ગોળી મારી દીધી હતી. ગંભીર રીતે ઘાયલ થયેલા લાલભાઈને તાત્કાલિક ખાનગી હોસ્પિટલમાં લઈ જવામાં આવ્યા હતા, પરંતુ સારવાર દરમિયાન તેમનું મોત નીપજ્યું હતું.
ક્રાઇમ બ્રાન્ચની તપાસમાં સફળતા
ઘટનાની ગંભીરતાને ધ્યાનમાં રાખીને રાજકોટ ક્રાઇમ બ્રાન્ચે તપાસ શરૂ કરી હતી. તપાસ દરમિયાન આ ગુનામાં પરપ્રાંતિય લૂંટારુ ગેંગની સંડોવણી સામે આવી હતી. પોલીસે રાજસ્થાનના ઉદયપુરમાંથી નવ આરોપીઓને ઝડપી પાડી લૂંટનો મુદ્દામાલ કબજે કર્યો છે. હાલ આરોપીઓની પૂછપરછ કરીને ગુનામાં તેમની ભૂમિકા સહિતની વધુ વિગતો મેળવવાની કાર્યવાહી હાથ ધરવામાં આવી છે.
અમેરિકાના શિકાગો નજીક આવેલા ઓરોરામાં એક હિન્દુ મંદિર પર મોટા પાયે ગોળીબાર કરી નરસંહાર કરવાની કથિત કાવતરું નિષ્ફળ બની હતી. આરોપીની બંદૂક જામ થઈ જતાં હુમલો થઈ શક્યો નહોતો. આ મામલે 19 વર્ષીય આરોપી એલેક્ઝાન્ડ્રોસ પાપોરાકિસની ઝડપી ધરપકડ કરવા બદલ શિકાગો સ્થિત ભારતીય મહાવાણિજ્ય દૂતાવાસે અમેરિકી પોલીસની પ્રશંસા કરી છે.
અમેરિકામાં હિન્દુ ધાર્મિક સ્થળને નિશાન બનાવવાના આ કથિત ષડયંત્રને લઈને સુરક્ષા એજન્સીઓ સતર્ક બની છે. ભારતીય મહાવાણિજ્ય દૂતાવાસે આ મામલે નજર રાખી રહ્યું હોવાનું જણાવ્યું છે અને અમેરિકામાં રહેતા ભારતીય સમુદાયના લોકો સાથે સતત સંપર્કમાં હોવાનું પણ સ્પષ્ટ કર્યું છે.
દૂતાવાસે જણાવ્યું હતું કે, ઇલિનોયના ઓરોરામાં એક ધાર્મિક સ્થળને નિશાન બનાવવાનો નિષ્ફળ પ્રયાસ કરવામાં આવ્યો હોવાની માહિતી મળી છે. આ મામલે પોલીસ દ્વારા કરવામાં આવેલી ઝડપી કાર્યવાહી પ્રશંસનીય છે. આ કથિત આતંકી ષડયંત્રના દરેક ઘટનાક્રમ પર નજીકથી નજર રાખવામાં આવી રહી છે.
11 ઓક્ટોબરે મોટા પાયે નરસંહાર કરવાની યોજના હોવાનો આરોપ
તપાસ એજન્સીઓના જણાવ્યા અનુસાર, આરોપી પાપોરાકિસે 11 ઓક્ટોબરે મોટા પાયે નરસંહાર કરવાની યોજના બનાવી હોવાનો આરોપ છે. તેના નિશાના પર ઓરોરા વિસ્તારમાં આવેલું કોઈ હિન્દુ ધાર્મિક સ્થળ હોવાનું તપાસમાં સામે આવ્યું છે.
આ ગંભીર ષડયંત્રની માહિતી મળ્યા બાદ પોલીસે તાત્કાલિક કાર્યવાહી કરી હતી. પોલીસ તંત્રે પોતાના અધિકારક્ષેત્રમાં આવતા હિન્દુ મંદિરો અને અન્ય ધાર્મિક સ્થળોનો સંપર્ક કરીને સંભવિત જોખમ અંગે સાવચેત રહેવા જણાવ્યું હતું. સાથે જ સુરક્ષા વ્યવસ્થા વધુ મજબૂત બનાવવા માટે પણ સૂચનાઓ આપવામાં આવી હતી.
કેવી રીતે નિષ્ફળ થયું હુમલાનું ષડયંત્ર?
અધિકારીઓના જણાવ્યા અનુસાર, આરોપીએ પોતાના એક સહકર્મીને જણાવ્યું હતું કે તે શનિવારે શિકાગોથી આશરે 70 કિલોમીટર દૂર આવેલા ઓરોરાના એક હિન્દુ મંદિરમાં ગયો હતો અને ત્યાં ગોળીબાર કરવાનો પ્રયાસ કર્યો હતો. જોકે, તેણે બંદૂકનું ટ્રિગર દબાવવાનો પ્રયાસ કર્યો ત્યારે બંદૂક જામ થઈ ગઈ હતી. આ કારણે કથિત હુમલો નિષ્ફળ રહ્યો હતો.
પોતાને શ્વેત વર્ચસ્વવાદી અને નિયો-નાઝી ગણાવતો આરોપી એલેક્ઝાન્ડ્રોસ પાપોરાકિસની તેના સહકર્મી પાસેથી મળેલી ગુપ્ત માહિતીના આધારે પોલીસે ધરપકડ કરી હતી.
પોલીસે આરોપીના ઘરેથી ઓટોમેટિક રાઇફલ, સેંકડો કારતૂસ અને શરીરનું રક્ષણ કરવા માટે ઉપયોગમાં લેવાતું બોડી આર્મર પણ જપ્ત કર્યું હોવાનું અહેવાલમાં જણાવાયું છે.
આ ઘટનાને પગલે અમેરિકામાં હિન્દુ ધાર્મિક સ્થળોની સુરક્ષાને લઈને ચિંતા ઊભી થઈ છે. ભારતીય દૂતાવાસે અમેરિકામાં રહેતા ભારતીય નાગરિકોની સુરક્ષા અંગે સતર્કતા જાળવી રાખી છે.
CJPના વિરોધ પ્રદર્શનમાં સામેલ થયા બાદ અભિનેતા ઇમરાન ખાનની મુશ્કેલીઓ વધી રહી છે. તાજેતરમાં ભાજપના નેતા કિરીટ સોમૈયાએ અભિનેતા વિરુદ્ધ લુકઆઉટ સર્ક્યુલર (LOC) જારી કરવાની માંગ કરી હતી. હવે અભિનેતાને 28 ઓક્ટોબર સુધીમાં ભારત છોડવાની નોટિસ આપવામાં આવી છે.
બોલિવૂડ સુપરસ્ટાર આમિર ખાનના ભાણિયા અને અભિનેતા ઇમરાન ખાનની મુશ્કેલીઓ વધતી જોવા મળી રહી છે. મુંબઈના ઐતિહાસિક ઓગસ્ટ ક્રાંતિ મેદાનમાં મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે યોજાયેલા વિરોધ પ્રદર્શનમાં અભિનેતા સામેલ થયા હતા. ત્યારબાદ હવે મુંબઈ પોલીસે ઇમરાન ખાનને 28 ઓક્ટોબર સુધીમાં ભારત છોડવાની નોટિસ આપી છે.
હકીકતમાં, ઇમરાન ખાન પાસે અમેરિકાની નાગરિકતા છે. આવી સ્થિતિમાં, ભારતીય નાગરિક ન હોવા છતાં ભારતની સ્થાનિક રાજકીય પ્રવૃત્તિ અને વિરોધ પ્રદર્શનમાં સામેલ થવાના મામલે ઇમિગ્રેશન કાયદાની સંબંધિત જોગવાઈ હેઠળ તેમની સામે કાર્યવાહી કરવામાં આવી હોવાનું અહેવાલમાં જણાવાયું છે. અભિનેતાએ નોટિસની નકલ સ્વીકારી લીધી છે.
Bro thought this was his opportunity to seize the moment and revive his dead career, but Mumbai Police has sent Imran Khan a fresh notice to leave India. 😭 pic.twitter.com/T46FwcIkwi
કિરીટ સોમૈયાએ અભિનેતા વિરુદ્ધ LOC જારી કરવાની માંગ કરી હતી
આ પહેલાં ઇમરાન ખાન વિરોધ પ્રદર્શનમાં સામેલ થયા બાદ ભાજપના પૂર્વ નેતા અને પૂર્વ સાંસદ કિરીટ સોમૈયાએ નારાજગી વ્યક્ત કરી હતી. તેમણે ઇમિગ્રેશન અધિકારીઓ અને કેન્દ્રીય ગૃહ મંત્રાલયને પત્ર લખીને અભિનેતા વિરુદ્ધ લુકઆઉટ સર્ક્યુલર જારી કરવાની માંગ કરી હતી.
Reports suggest that Mumbai Police has asked actor #ImranKhan, who holds US citizenship, to leave India following his participation in the anti-CEC protest. 👀#MissMalinipic.twitter.com/9aixDw7ot2
સોમૈયાએ સવાલ ઉઠાવ્યો હતો કે જ્યારે ઇમરાન ખાન પાસે OCI કાર્ડ અને અમેરિકાની નાગરિકતા છે, તો તેઓ ભારતની સ્થાનિક રાજકીય પ્રવૃત્તિઓ અને વિરોધ પ્રદર્શનોમાં શા માટે ભાગ લઈ રહ્યા છે?
આ મામલે તેમણે પોલીસને અભિનેતા વિરુદ્ધ કડક કાર્યવાહી કરવાની માંગ કરી હતી. સાથે જ મુંબઈ પોલીસને તપાસ કરવા અને અભિનેતાને વિદેશ જવાની મંજૂરી ન આપવા પણ અપીલ કરી હતી.
હવે ભારત છોડવાની નોબત આવી
કિરીટ સોમૈયાની ફરિયાદ બાદ મુંબઈ પોલીસ અને ઇમિગ્રેશન વિભાગ આગળ શું પગલાં લેશે, તેના પર સૌની નજર હતી. હવે આ સમગ્ર વિવાદ વચ્ચે ઇમરાન ખાનને 28 ઓક્ટોબર સુધીમાં ભારત છોડવાની નોટિસ આપવામાં આવી હોવાના અહેવાલ સામે આવ્યા છે.
ઇમરાન ખાનની નાગરિકતાને લઈને વિવાદ
મુંબઈમાં CJPના વિરોધ પ્રદર્શનમાં સામેલ થયા બાદ ઇમરાન ખાન વિવાદોમાં ઘેરાયા છે. તેમની નાગરિકતાને લઈને પણ ચર્ચા શરૂ થઈ છે.
ઇમરાન ખાન તેમની ગર્લફ્રેન્ડ લેખા વોશિંગ્ટન અને પિતરાઈ બહેન ઝૈન મેરી ખાન સાથે મુંબઈના ઐતિહાસિક ઓગસ્ટ ક્રાંતિ મેદાનમાં યોજાયેલા CJPના વિરોધ પ્રદર્શનમાં સામેલ થયા હતા. આ પ્રદર્શનમાં મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરવામાં આવી રહી હતી.
આ દરમિયાન અભિનેતાને પોલીસે અટકાયતમાં લીધા હતા. ત્યારબાદ પોલીસ વાનમાં બેઠેલા ઇમરાન ખાનનો વીડિયો પણ સામે આવ્યો હતો.
રાજકીય વિરોધ પ્રદર્શનમાં ભાગ લીધા બાદ તેમની નાગરિકતાને લઈને સવાલો ઉઠવા લાગ્યા હતા. હકીકતમાં, ઇમરાન ખાન ભારતીય નાગરિક નથી, પરંતુ તેમની પાસે અમેરિકાની નાગરિકતા છે. તેમનો જન્મ અમેરિકાના વિસ્કોન્સિનમાં થયો હતો. તેમની પાસે અમેરિકન પાસપોર્ટ અને ભારતનું ઓવરસીઝ સિટિઝન ઑફ ઇન્ડિયા (OCI) કાર્ડ છે.
મેરઠના ચર્ચિત સૌરભ રાજપૂત હત્યા કેસમાં અદાલતે મુસ્કાન રસ્તોગી અને સાહિલ શુક્લાને મૃત્યુદંડની સજા ફટકારી છે. પતિની હત્યા કરીને મૃતદેહના ટુકડા કરી બ્લુ ડ્રમમાં છુપાવવાના આ ચકચારી કેસમાં બંને દોષિતોએ કોર્ટ સમક્ષ ઓછામાં ઓછી સજા કરવાની અપીલ કરી હતી.
ઉત્તર પ્રદેશના મેરઠમાં ચર્ચિત સૌરભ રાજપૂત હત્યા કેસમાં બુધવાર, 14 ઓક્ટોબર 2026ના રોજ અદાલતે મોટો ચુકાદો સંભળાવ્યો છે. જિલ્લા જજ અરવિંદ કુમાર મિશ્રાની અદાલતે મુસ્કાન રસ્તોગી અને સાહિલ શુક્લાને મૃત્યુદંડની સજા ફટકારી છે. ચુકાદો સાંભળ્યા બાદ બંને ભાવુક થઈ ગયા હતા અને રડવા લાગ્યા હતા.
સજા સંભળાવતા પહેલાં અદાલતે બંને દોષિતોને પોતાનો પક્ષ રજૂ કરવાની તક આપી હતી. શરૂઆતમાં બંનેએ કહ્યું હતું કે તેમને કંઈ કહેવું નથી. ત્યારબાદ અદાલતે મુસ્કાનને સીધો સવાલ કર્યો કે પતિની હત્યામાં દોષિત સાબિત થયા બાદ તે પોતાના માટે કઈ સજા ઇચ્છે છે?
આના જવાબમાં મુસ્કાને પોતાની બે નાની દીકરીઓનો ઉલ્લેખ કરીને તેમની સંભાળ રાખવાની અપીલ કરી હતી. તેણે ઓછામાં ઓછી સજા આપવાની વિનંતી કરી હતી. બીજી તરફ, સાહિલે પણ કોર્ટ સમક્ષ ઓછામાં ઓછી સજા કરવાની અપીલ કરી હતી. જોકે, અદાલતે બંનેને મૃત્યુદંડની સજા ફટકારી હતી.
ચુકાદો સાંભળતા જ બંને રડી પડ્યા
જેલ પ્રશાસન પાસેથી મળેલી માહિતી અનુસાર, ચુકાદો સંભળાવવામાં આવ્યો ત્યારે મુસ્કાને હાથ જોડ્યા હતા. ત્યારબાદ તે રડવા લાગી હતી. સાહિલની આંખોમાં પણ આંસુ આવી ગયાં હતાં. થોડા સમય બાદ બંને ધ્રૂસકે ધ્રૂસકે રડવા લાગ્યા હતા. ત્યારપછી તેમને જેલની બેરેકમાં લઈ જવામાં આવ્યા હતા.
બંનેને જેલમાંથી વીડિયો કોન્ફરન્સિંગના માધ્યમથી અદાલતમાં રજૂ કરવામાં આવ્યા હતા. જેલ અધિકારીઓના જણાવ્યા અનુસાર, સજાના નિર્ણય પહેલાં બંને અસ્વસ્થ અને બેચેન જણાતા હતા. તેમણે રાત્રે અને સવારે પણ ઓછું ભોજન લીધું હતું અને બરાબર ઊંઘી શક્યા નહોતા.
मेरठ के नीले ड्रम हत्याकांड में मुस्कान और प्रेमी साहिल दोषी करार.
मस्कान ने प्रेमी साहिल के साथ मिलकर अपने पति सौरभ राजपूत की हत्या की थी. pic.twitter.com/3tSiTeUbqf
સજા અંગેની સુનાવણી દરમિયાન મુસ્કાનની બે દીકરીઓના ભવિષ્યનો મુદ્દો પણ ઉઠ્યો હતો. બચાવ પક્ષનાં વકીલ રેખા જૈને અદાલત સમક્ષ દલીલ કરી હતી કે બંને બાળકી નાની છે અને તેમના ભવિષ્ય તથા ઉછેરને ધ્યાનમાં રાખીને મુસ્કાન પ્રત્યે નરમ વલણ અપનાવવામાં આવે.
જેલ અધિકારી વીરેન્દ્ર રાજ શર્માના જણાવ્યા અનુસાર, મુસ્કાન છેલ્લા ત્રણથી ચાર દિવસથી પોતાની મોટી દીકરીને મળવાની વિનંતી કરી રહી હતી. બાળકીની ઉંમર આશરે સાત વર્ષ હોવાનું જણાવાયું હતું. જોકે, તેને માતા સાથે મુલાકાત કરાવવા માટે જેલમાં લાવવામાં આવી નહોતી.
બીજી તરફ, સરકારી પક્ષે ગુનાની ગંભીરતા અને ક્રૂરતાને ધ્યાનમાં રાખીને બંને દોષિતો માટે મૃત્યુદંડની માંગ કરી હતી.
આ રીતે ખુલ્યો હતો બ્લુ ડ્રમ હત્યા કેસ
સૌરભ રાજપૂતની હત્યાનો ખુલાસો માર્ચ 2025માં થયો હતો. પોલીસ તપાસ મુજબ, સૌરભના ભાઈ બબલુએ 18 માર્ચ, 2025ના રોજ સૌરભ ગુમ થયાની ફરિયાદ નોંધાવી હતી. ફરિયાદમાં મુસ્કાન અને સાહિલ પર શંકા વ્યક્ત કરવામાં આવી હતી.
ફરિયાદના આધારે પોલીસે તપાસ શરૂ કરી હતી. પૂછપરછ અને અન્ય પુરાવાઓની તપાસ દરમિયાન પોલીસને હત્યા અંગે મહત્વપૂર્ણ કડીઓ મળી હતી. ત્યારબાદ ઘરમાં રાખવામાં આવેલા બ્લુ ડ્રમમાંથી સૌરભનો મૃતદેહ મળી આવ્યો હતો. મૃતદેહને છુપાવવા માટે ડ્રમમાં સિમેન્ટનો ઉપયોગ કરવામાં આવ્યો હોવાની વિગતો પણ તપાસમાં સામે આવી હતી.
આ ઘટનાએ સમગ્ર દેશમાં ભારે ચર્ચા જગાવી હતી.
નશીલી દવા આપીને હત્યા કરવાનો આરોપ
પોલીસ તપાસ અનુસાર, સૌરભ પોતાની માતા રેણુ દેવીના ઘરેથી કોફ્તાનું શાક લઈને આવ્યો હતો. આરોપ છે કે મુસ્કાને આ શાકમાં નશીલી દવા ભેળવી હતી. સૌરભ બેભાન થયા બાદ સાહિલને ઘરે બોલાવવામાં આવ્યો હતો.
પોલીસના જણાવ્યા અનુસાર, ત્યારબાદ સૌરભની હત્યા કરવામાં આવી હતી અને વોશરૂમમાં તેના મૃતદેહના ટુકડા કરવામાં આવ્યા હતા. શરૂઆતમાં મૃતદેહને બ્રીફકેસમાં રાખવાનો પ્રયાસ કરવામાં આવ્યો હતો, પરંતુ તેમાં સફળતા ન મળતાં મૃતદેહને બેડમાં રાખવામાં આવ્યો હતો. બાદમાં તેને બ્લુ ડ્રમમાં છુપાવવામાં આવ્યો હતો.
આ વિગતો પોલીસ તપાસમાં સામે આવેલા ઘટનાક્રમ અને અભિયોજન પક્ષની દલીલો પર આધારિત છે.
કેબ ડ્રાઇવર, હોટેલ અને ફોરેન્સિક પુરાવા બન્યા મહત્વપૂર્ણ
આ કેસમાં કોઈ પ્રત્યક્ષદર્શી ગવાહ ન હોવાથી પોલીસે સંજોગો આધારિત પુરાવા, ઇલેક્ટ્રોનિક રેકોર્ડ અને ફોરેન્સિક તપાસના આધારે કેસ મજબૂત કર્યો હતો.
પોલીસે મુસ્કાન અને સાહિલ સાથે જોડાયેલા કેબ ડ્રાઇવરની પૂછપરછ કરી હતી. આ ઉપરાંત, બંને રોકાયા હોવાની માહિતી ધરાવતી હોટેલમાંથી નિવેદનો અને સીસીટીવી ફૂટેજ એકત્ર કરવામાં આવ્યાં હતાં.
તપાસ દરમિયાન મોબાઇલ ફોનની કોલ ડિટેઇલ રેકોર્ડ (CDR), લોકેશન, હોટેલના રજિસ્ટર અને ફોરેન્સિક રિપોર્ટ સહિતના પુરાવાઓની તપાસ કરવામાં આવી હતી. સરકારી વકીલ કૃષ્ણ કુમાર ચૌબેના જણાવ્યા અનુસાર, આ પુરાવાઓએ અભિયોજન પક્ષનો કેસ મજબૂત બનાવવામાં મહત્વની ભૂમિકા ભજવી હતી.
14 ઓક્ટોબર, 2026: અદાલતે બંને દોષિતોને મૃત્યુદંડની સજા ફટકારી.
દેશભરમાં ચર્ચામાં રહ્યો બ્લુ ડ્રમ કેસ
સૌરભ રાજપૂત હત્યા કેસ મૃતદેહને છુપાવવાની પદ્ધતિ અને પોલીસ તપાસમાં સામે આવેલી ચોંકાવનારી વિગતોને કારણે દેશભરમાં ચર્ચાનો વિષય બન્યો હતો. તપાસ એજન્સીઓએ ઇલેક્ટ્રોનિક, ફોરેન્સિક અને સંજોગો આધારિત પુરાવાઓ એકત્ર કર્યા હતા.
સજાની સુનાવણી દરમિયાન સરકારી પક્ષે ગુનાની ગંભીરતાને ધ્યાનમાં રાખીને કડક સજાની માંગ કરી હતી, જ્યારે બચાવ પક્ષે મુસ્કાનની બંને દીકરીઓના ભવિષ્યનો મુદ્દો ઉઠાવ્યો હતો. બંને પક્ષોની દલીલો સાંભળ્યા બાદ અદાલતે મુસ્કાન રસ્તોગી અને સાહિલ શુક્લાને મૃત્યુદંડની સજા ફટકારી હતી.
કાનપુરમાં ભાજપના પછાત વર્ગ મોરચાના પ્રદેશ મંત્રી રમેશ યાદવને બંધક બનાવી આશરે ₹50 લાખની લૂંટ ચલાવવાની ઘટના સામે આવી છે. સોમવારે મધરાતે નકાબપોશ બદમાશો તેમના ફાર્મહાઉસમાં ઘૂસી ગયા હતા. બદમાશોએ રમેશ યાદવના હાથ-પગ બાંધીને લૂંટ ચલાવી હતી અને ત્યારબાદ ઘટનાસ્થળેથી ફરાર થઈ ગયા હતા. આ ઘટના કાનપુર શહેરથી આશરે 15 કિલોમીટર દૂર પશ્ચિમપારા પોલીસ સ્ટેશન વિસ્તારમાં બની હતી. ઘટનાની જાણ થતાં પોલીસ તંત્રમાં દોડધામ મચી ગઈ હતી.
CCTV ફૂટેજના આધારે આરોપીઓની ઓળખ કરવાના પ્રયાસ
ઘટનાની જાણ થતાં જ જોઈન્ટ પોલીસ કમિશનર ડૉ. વિપિન તાડા અને DCP દીપેન્દ્રનાથ ચૌધરી પોલીસ કાફલા સાથે ઘટનાસ્થળે પહોંચ્યા હતા. પોલીસ અધિકારીઓએ સ્થળનું નિરીક્ષણ કરીને તપાસ શરૂ કરી હતી. ફાર્મહાઉસમાં લગાવેલા CCTV કેમેરાનાં ફૂટેજ તપાસવામાં આવી રહ્યા છે, જેથી લૂંટારુઓની ઓળખ થઈ શકે. આરોપીઓને પકડવા માટે પોલીસની અલગ-અલગ ટીમો પણ કામે લાગી છે.
કાનપુરના પોલીસ કમિશનર રઘુવીર લાલે જણાવ્યું હતું કે પોલીસ અધિકારીઓ ઘટનાસ્થળે હાજર રહી તપાસ કરી રહ્યા છે. તેમણે આશ્વાસન આપ્યું હતું કે આરોપીઓની ટૂંક સમયમાં ધરપકડ કરવામાં આવશે. પોલીસ આ મામલે તમામ પાસાંઓની તપાસ કરી રહી છે.
1 ઓક્ટોબરે બનાવાયા હતા BJP પછાત વર્ગ મોરચાના પ્રદેશ મંત્રી
ઉલ્લેખનીય છે કે રમેશ યાદવને 1 ઓક્ટોબરે ભાજપના પછાત વર્ગ મોરચાના પ્રદેશ મંત્રી તરીકે નિયુક્ત કરવામાં આવ્યા હતા. સોમવારે તેમણે લખનઉમાં પોતાના પદનો કાર્યભાર સંભાળ્યો હતો અને મોડી સાંજે કાનપુર પરત ફર્યા હતા.
રમેશ યાદવ બે વખત બ્લોક પ્રમુખ રહી ચૂક્યા છે, જ્યારે તેમની પત્ની શશિ યાદવ પણ બ્લોક પ્રમુખ રહી ચૂક્યાં છે. વર્ષ 2022માં રમેશ યાદવે બહુજન સમાજ પાર્ટી (BSP)ની ટિકિટ પર બિઠૂર વિધાનસભા બેઠક પરથી ચૂંટણી લડી હતી.
હાલમાં પોલીસ લૂંટારુઓની શોધખોળ કરી રહી છે અને સમગ્ર મામલે વધુ તપાસ ચાલુ છે.
લોકસભામાં વિપક્ષના નેતા રાહુલ ગાંધીએ બુધવારે દિલ્હી પોલીસ પર આરોપ લગાવ્યો કે તેણે NSUI (કોંગ્રેસની વિદ્યાર્થી પાંખ)ના કાર્યકરો સહિત અન્ય પ્રદર્શનકારી વિદ્યાર્થીઓ સાથે નિર્દયતાથી મારપીટ કરી હતી. CEC જ્ઞાનેશ કુમાર વિરુદ્ધ વિરોધ પ્રદર્શન દરમિયાન આ લોકોને કસ્ટડીમાં લેવામાં આવ્યા હતા.
11 अक्टूबर को RSS-बजरंग दल के गुंडों के कहने पर पुलिस ने मुझे हिरासत में लिया था।
ये वही गुंडे थे, जो शांतिपूर्ण तरीके से प्रदर्शन कर रहे प्रोटेस्टर्स को धमका रहे थे। इन गुंडों के पास डंडे और पत्थर थे।
રાહુલ ગાંધીએ દાવો કર્યો કે કેરળની એક મહિલા પ્રદર્શનકારીને પોલીસ દ્વારા કથિત રીતે માર મારવામાં આવતાં તેના એક કાનની સાંભળવાની ક્ષમતા જતી રહી છે.
પ્રેસ કોન્ફરન્સને સંબોધતાં રાહુલ ગાંધીએ કહ્યું કે કેરળની અથીરા નામની વિદ્યાર્થિનીના એક કાનથી સાંભળવાનું બંધ થઈ ગયું છે. હવે તે એક કાનથી સાંભળી શકતી નથી.
दिल्ली पुलिस ने हमारे साथ जैसा व्यवहार किया, वह बहुत ही अमानवीय था।
आजादी से पहले जैसे अंग्रेज़ों ने गरीबों और मजदूरों पर बर्बरता की, उसी तरह आज पुलिस देश के लोगों की आवाज दबाने का काम कर रही है।
हम कहना चाहते हैं कि हमारे नेता राहुल गांधी जी एक बड़े भाई की तरह हमारे साथ खड़े… pic.twitter.com/T9ljkwAuSv
રાહુલ ગાંધીએ વધુમાં કહ્યું, “ગયા વખતે મેં તમને એક એવા યુવકને બતાવ્યો હતો, જેની આંખોની રોશની જતી રહી હતી. હવે એક વિદ્યાર્થિની એક કાનથી સાંભળી શકતી નથી.”
આ તમામ આરોપો રાહુલ ગાંધી દ્વારા કરવામાં આવ્યા છે. ઘટનાને લઈને દિલ્હી પોલીસનું પક્ષ જાણ્યા બાદ જ સમગ્ર મામલે વધુ સ્પષ્ટતા થઈ શકશે.
મેષ (Aries): બુધવાર અને વિનાયક ચતુર્થીના શુભ સંયોગથી તમારી નિર્ણયશક્તિ અને કાર્યક્ષમતામાં અનેકગણો વધારો જોવા મળશે. ભાગીદારી વ્યવસાયમાં લાંબા સમયથી ચાલી રહેલી ગૂંચવણો પારદર્શક સંવાદથી ઉકેલાશે. મા કૂષ્માંડાના આશીર્વાદથી મનમાં રહેલી અશાંતિ અને નકારાત્મકતા દૂર થઈ નવી સકારાત્મક ઊર્જાનો સંચાર થશે. નાણાકીય દ્રષ્ટિએ જૂના કરારોમાંથી લાભ મળવાની શરૂઆત થશે. ક્રોધ અને અધીરાઈથી બચવું તથા પૂરતો પ્રવાહી આહાર લેવો.
વૃષભ (Taurus): કાર્યક્ષેત્રે તમારી મહેનત અને વ્યવહારકુશળતાની બોસ દ્વારા ખુલ્લેઆમ પ્રશંસા થશે, જેનાથી તમારો આત્મવિશ્વાસ વધશે. મોસાળ પક્ષ તરફથી કોઈ માંગલિક પ્રસંગના સમાચાર કે આર્થિક લાભ મળવાની ઉજ્જવળ સંભાવના છે. ગુપ્ત શત્રુઓ તમારી સામે ફાવી શકશે નહીં અને તમારી સ્થિતિ અગાઉ કરતાં વધુ મજબૂત બનશે. માતાજીની ઉપાસના અને ગણપતિ પૂજનથી કાર્યમાં રહેલા વિઘ્નો દૂર થશે. સાંજ પછી પગના સ્નાયુઓમાં દુખાવો ન થાય તે માટે આરામ કરવો.
મિથુન (Gemini): રાશિ સ્વામી બુધના સાનુકૂળ પ્રભાવથી બૌદ્ધિક, શૈક્ષણિક અને સંશોધનાત્મક કાર્યોમાં મોટી સફળતા પ્રાપ્ત થશે. સંતાનોના શિક્ષણ કે કારકિર્દી અંગે કોઈ મહત્વનો નિર્ણય આજે સુપેરે લઈ શકશો. શેરબજાર કે પરંપરાગત બચતમાં સુરક્ષિત રોકાણ કરવા માટે દિવસ અત્યંત ફળદાયી સાબિત થશે. મિત્રો સાથે નવરાત્રી ગરબા કે મનોરંજનમાં સુંદર સમય વિતવાથી મન પ્રફુલ્લિત રહેશે. પાચનતંત્ર જાળવવા માટે ઉપવાસ દરમિયાન સાત્વિક ફળાહાર લેવો.
કર્ક (Cancer): જમીન-મકાન, વાહન કે સ્થાવર મિલકત ખરીદવાના આયોજનોમાં આજે મક્કમ અને સકારાત્મક પ્રગતિ જોવા મળશે. માતાના સ્વાસ્થ્યમાં સારો સુધારો જણાશે અને પરિવાર સાથે ઉત્સવની ખુશીઓ વહેંચવાનો મોકો મળશે. કાર્યસ્થળની દોડધામ વચ્ચે ઘરે સાંજે માતાજીની સ્તુતિ અને આરતી કરવાથી આખો દિવસનો થાક ઊતરી જશે. આર્થિક આયોજનમાં સ્થિરતા રહેશે અને બિનજરૂરી ખર્ચ નિયંત્રણમાં રહેશે. મોસમી શરદી કે કફથી સાવચેત રહેવું.
સિંહ (Leo): તમારા સાહસ, પુરુષાર્થ અને વાણીકૌશલ્યથી અટકેલા મહત્વના સોદાઓ સફળતાપૂર્વક પાર પાડી શકશો. નાના ભાઈ-બહેનો સાથેના સંબંધોમાં આત્મીયતા વધશે અને ઉત્સવના આયોજનમાં તેમનો પૂર્ણ સહકાર મળશે. માર્કેટિંગ, સંચાર માધ્યમો કે મીડિયા સાથે જોડાયેલા જાતકો માટે નવી ક્લાયન્ટ મેળવવાનો ઉત્તમ દિવસ છે. ટૂંકી મુસાફરી લાભદાયી નીવડશે અને નવા ફાયદાકારક સંપર્કો ઊભા થશે. ગળાની ખાસ કાળજી રાખવી અને ઠંડા પીણાં ટાળવા.
કન્યા (Virgo): નાણાકીય બચતમાં નોંધપાત્ર વધારો થશે અને જૂની ઉઘરાણી કે અટવાયેલા નાણાં અચાનક પરત મળવાના યોગ છે. પરિવારમાં માંગલિક કાર્યો કે નવી જવાબદારીઓ અંગે વડીલો સાથે સૌહાર્દપૂર્ણ ચર્ચા આગળ વધશે. તમારી મધુર અને પ્રભાવશાળી વાણીથી કઠિન પરિસ્થિતિઓને પણ સરળતાથી થાળે પાડી શકશો. મા કૂષ્માંડાની આરાધના મનને અદ્ભુત શાંતિ અને આરોગ્યનું સુખ પ્રદાન કરશે. આંખોમાં થાક કે બળતરા ન લાગે તે માટે સ્ક્રીન ટાઈમ ઓછો કરવો.
તુલા (Libra): તમારી રાશિમાં રહેલા શુભ ગ્રહો અને ચતુર્થીનો પ્રભાવ તમારા વ્યક્તિત્વને નવું તેજ અને પ્રભાવશાળી આકર્ષણ આપશે. અટકેલા અંગત લક્ષ્યાંકોને ફરી શરૂ કરવા માટે આ શ્રેષ્ઠ તક છે, જેમાં પરિણામ સંતોષકારક મળશે. જીવનસાથી સાથે ગરબા મહોત્સવ કે ધાર્મિક પૂજનમાં સુંદર સમય વિતશે જેથી દાંપત્યજીવન વધુ મધુર બનશે. સામાજિક વર્તુળમાં તમારી પ્રતિષ્ઠા અને મોભામાં નોંધપાત્ર વધારો જોવા મળશે. માથાના ભારથી બચવા માટે સમયસર ભોજન લેવું.
વૃશ્ચિક (Scorpio): વિદેશ વ્યાપાર કે દૂરના શહેરો સાથે જોડાયેલા પ્રોજેક્ટ્સમાં પ્રગતિના સારા અને આશાસ્પદ સંકેતો મળી શકે છે. ઉત્સવ નિમિત્તે પૂજા સામગ્રી કે વસ્ત્રોની ખરીદી પાછળ થોડો ખર્ચ થશે, પરંતુ તે મનને સંતોષ આપશે. કાનૂની બાબતો કે સરકારી પ્રક્રિયાઓમાં ઉતાવળ કરવાને બદલે નિયમોનું ચુસ્ત પાલન કરવું સલાહભર્યું છે. એકાંતમાં બેસીને દુર્ગા સ્તોત્ર કે ગણપતિ અથર્વશીર્ષનો પાઠ કરવાથી અંદર રહેલો ભય શમી જશે. અનિદ્રા ટાળવા રાત્રે સમયસર સૂવું.
ધન (Sagittarius): આવકના નવા સ્ત્રોત ઊભા થશે અને જૂના રોકાણોમાંથી ઉત્તમ વળતર મળવાથી આર્થિક સ્થિતિ વધુ સદ્ધર બનશે. વરિષ્ઠ મિત્રો અને મોભીઓ તરફથી મળેલો વ્યવહારુ ટેકો તમારા આત્મવિશ્વાસને બમણો કરશે. સંતાનો તરફથી કોઈ ગૌરવપૂર્ણ સમાચાર મળતાં પારિવારિક વાતાવરણ આનંદમય બનશે. સામાજિક કે ધાર્મિક સંગઠનોમાં તમારી સક્રિયતા વધશે જે તમારી છબી ઉજળી કરશે. પગ કે પિંડીઓમાં દુખાવો ન થાય તે માટે દોડધામ વચ્ચે આરામ કરવો.
મકર (Capricorn): કાર્યક્ષેત્રે નવી જવાબદારીઓ કે મહત્વના પ્રોજેક્ટ્સનું નેતૃત્વ સોંપાઈ શકે છે, જેને તમે કુશળતાપૂર્વક નિભાવી શકશો. પિતા કે પરિવારના મોભી તરફથી મળેલી યોગ્ય સલાહ વ્યાવસાયિક મૂંઝવણનો કાયમી ઉકેલ લાવશે. સરકારી વિભાગો કે ઉચ્ચ અધિકારીઓ સાથેના સંબંધો સુધરશે અને અટકેલા કાગળો આગળ ધપશે. સામાજિક સ્તરે તમારી વિશ્વસનીયતા વધુ દ્રઢ બનશે. કામના ભારણ વચ્ચે નિયમિત સમયે સાદો આહાર લેવો જેથી પાચનતંત્ર સારું રહે.
કુંભ (Aquarius): ભાગ્યનો ભરપૂર સાથ મળવાથી લાંબા સમયથી અટકેલા શૈક્ષણિક કે વ્યાવસાયિક કામો કોઈપણ વિઘ્ન વિના પાર પડી જશે. ધાર્મિક અનુષ્ઠાન, સત્સંગ કે માતાજીના મંદિરે દર્શન માટે દિવસ અત્યંત શુભ અને પ્રેરણાદાયક છે. ઉચ્ચ અભ્યાસ કરતા વિદ્યાર્થીઓ માટે કોઈ વિદ્વાન વ્યક્તિનું માર્ગદર્શન પ્રેરણારૂપ સાબિત થશે. દૂર રહેતા સંબંધીઓ તરફથી સુખદ સમાચાર મળતાં ઘરમાં ઉત્સાહ વધશે. સાંધા કે પીઠના દુખાવાને ટાળવા યોગ્ય મુદ્રામાં બેસવું.
મીન (Pisces): અણધારી પરિસ્થિતિ કે યોજનાઓમાં ફેરફાર થાય તો ધીરજ ગુમાવવાને બદલે શાંતિથી આગળ વધવું સલાહભર્યું છે. વારસાગત મિલકત, વીમા કે જૂના નાણાકીય મામલાઓમાં રાહતરૂપ ઉકેલ મળશે. રહસ્યમય વિદ્યાઓ, મંત્રજાપ કે મા કૂષ્માંડાની ઉપાસનામાં ઊંડો રસ જાગશે જે મનને નવી ઊર્જા આપશે. સટ્ટાકીય પ્રવૃત્તિઓથી સંપૂર્ણ દૂર રહીને સુરક્ષિત આયોજન પર જ ધ્યાન આપવું. પેટની તકલીફોથી બચવા માટે પ્રવાહી અને સાદો સુપાચ્ય આહાર લેવો.
ફ્રેન્કફર્ટથી દિલ્હી આવી રહેલી એअर ઇન્ડિયાની ફ્લાઇટ AI-2030નું બુધવારે સવારે જયપુર એરપોર્ટ પર ઇમરજન્સી લેન્ડિંગ કરાવવામાં આવ્યું હતું. મળતી માહિતી મુજબ, પાયલટે અમદાવાદ એર ટ્રાફિક કંટ્રોલ (ATC)ને હાઇજેક અંગેનો સંકેત મોકલ્યો હતો. ત્યારબાદ આ માહિતી જયપુર ATCને આપવામાં આવી હતી.
અહેવાલો અનુસાર, સંકેત મળ્યાના આશરે 45 મિનિટ બાદ વિમાનને જયપુર એરપોર્ટ પર ઉતારવામાં આવ્યું હતું. લેન્ડિંગ બાદ સુરક્ષા એજન્સીઓના અધિકારીઓએ વિમાનમાં તપાસ હાથ ધરી હતી. જોકે, આ ઘટનાને લઈને તપાસનાં પરિણામોની સત્તાવાર પુષ્ટિ હજુ સુધી થઈ નથી.
VIDEO | Jaipur: Air India's Frankfurt-Delhi flight diverted to Jaipur following bomb threat; plane makes emergency landing at airport; officials arrive at the airport. More details awaited.
Flightradar24ના અહેવાલ મુજબ, આ વિમાને 13 ઑક્ટોબરની રાત્રે 9:45 વાગ્યે ફ્રેન્કફર્ટથી ઉડાન ભરી હતી અને 14 ઑક્ટોબરની સવારે 10:40 વાગ્યે દિલ્હી પહોંચવાનું નિર્ધારિત હતું. જોકે, હાઇજેક એલર્ટ બાદ વિમાનને દિલ્હી લઈ જવાને બદલે જયપુર તરફ ડાયવર્ટ કરવામાં આવ્યું હતું.
કેપ્ટન સ્મિત મચ્છરની ફ્લાઇટમાંથી પણ મળ્યો હતો આવો સંકેત
ઉલ્લેખનીય છે કે, 30 સપ્ટેમ્બરે ઇઝરાયેલ જઈ રહેલી ફ્લાયદુબઈની ફ્લાઇટમાંથી પણ હાઇજેક ઇમરજન્સી કોડ 7500 મોકલવામાં આવ્યો હોવાના અહેવાલો સામે આવ્યા હતા. આ ઘટનામાં વિમાનને હાઇજેક કરીને ક્રેશ કરવાનો પ્રયાસ કરવામાં આવ્યો હોવાનો દાવો કરવામાં આવ્યો હતો. જોકે, ભારતીય કો-પાયલટ કેપ્ટન સ્મિત મચ્છરે આ પ્રયાસને નિષ્ફળ બનાવ્યો હોવાનું અહેવાલોમાં જણાવાયું હતું.
બિહારના વૈશાલી જિલ્લામાં મંગળવારે ગંગા નદીમાં હોડી પલટી જતાં બાળકો સહિત ઓછામાં ઓછા 13 લોકોનાં મોત થયાં છે. હોડીમાં 15થી 20 લોકો સવાર હોવાનું કહેવાય છે. તમામ લોકો એક ભોજન સમારંભમાં હાજરી આપવા જઈ રહ્યા હતા.
આ દુર્ઘટના વૈશાલીના રાઘોપુર વિસ્તારમાં બની હતી. મૃતકોમાં મોટાભાગનાં બાળકો હોવાનું જાણવા મળ્યું છે. ઘટનાની જાણ થતાં જ વહીવટી તંત્રના અધિકારીઓ ઘટનાસ્થળે પહોંચ્યા હતા. બચાવ અને રાહત કામગીરી માટે NDRFની ટીમોને પણ તહેનાત કરવામાં આવી છે.
નદીમાં ગુમ થયેલા લોકોને શોધવા માટે સ્થાનિક ગ્રામજનો પણ વહીવટી તંત્રને સહયોગ આપી રહ્યા છે. બચાવ કામગીરી હજુ ચાલુ છે અને તંત્ર સમગ્ર પરિસ્થિતિ પર નજર રાખી રહ્યું છે.
મૃતકોના પરિવારજનોને ₹4 લાખની સહાયની જાહેરાત
બિહારના મુખ્યમંત્રી સમ્રાટ ચૌધરીએ દુર્ઘટનામાં જીવ ગુમાવનારા લોકોના પરિવારજનોને ₹4 લાખની આર્થિક સહાય આપવાની જાહેરાત કરી છે.
સમ્રાટ ચૌધરીએ સોશિયલ મીડિયા પ્લેટફોર્મ X પર શોક વ્યક્ત કરતાં લખ્યું કે, વૈશાલીના રાઘોપુરમાં હોડી દુર્ઘટનામાં નિર્દોષ લોકોનાં મોતના સમાચાર અત્યંત દુઃખદ અને હૃદયદ્રાવક છે. આ મુશ્કેલ સમયમાં શોકગ્રસ્ત પરિવારો પ્રત્યે મારી ઊંડી સંવેદના છે. ઈશ્વર દિવંગત આત્માઓને શાંતિ આપે અને તેમના પરિવારજનોને આ અસહ્ય દુઃખ સહન કરવાની શક્તિ આપે.
વડાપ્રધાન નરેન્દ્ર મોદીએ પણ સહાયની જાહેરાત કરી
વડાપ્રધાન નરેન્દ્ર મોદીએ પણ આ દુર્ઘટના પર દુઃખ વ્યક્ત કર્યું છે. તેમણે મૃતકોના પરિવારજનોને ₹2 લાખની આર્થિક સહાય આપવાની જાહેરાત કરી છે.
પીએમ મોદીએ જણાવ્યું કે, બિહારના વૈશાલી જિલ્લામાં ગંગા નદીમાં હોડી પલટી જવાથી થયેલી જાનહાનિ અત્યંત દુઃખદ છે. આ મુશ્કેલ સમયમાં મારી સંવેદનાઓ શોકગ્રસ્ત પરિવારો સાથે છે. ઘાયલો ઝડપથી સાજા થાય તેવી પ્રાર્થના કરું છું. સ્થાનિક વહીવટી તંત્ર અસરગ્રસ્ત લોકોને મદદ કરી રહ્યું છે.
તેજસ્વી યાદવે બચાવ કામગીરી ઝડપી બનાવવા અપીલ કરી
બિહાર વિધાનસભામાં વિપક્ષના નેતા તેજસ્વી યાદવે પણ આ ઘટના અંગે દુઃખ વ્યક્ત કર્યું હતું. તેમણે જણાવ્યું કે વૈશાલીના રાઘોપુર દિયારા વિસ્તારમાં હોડી પલટી જવાની દુઃખદ ઘટના સામે આવી છે. ડૂબી ગયેલા લોકોમાં મોટાભાગનાં બાળકો છે. સ્થાનિક લોકો, વહીવટી તંત્ર અને અધિકારીઓ સાથે ચર્ચા કર્યા બાદ રાહત, બચાવ અને સારવારની કામગીરી ઝડપી બનાવવા સૂચના આપવામાં આવી છે.
ઉપરાષ્ટ્રપતિ સી.પી. રાધાકૃષ્ણને શોક વ્યક્ત કર્યો
ઉપરાષ્ટ્રપતિ સી.પી. રાધાકૃષ્ણને પણ વૈશાલીમાં ગંગા નદીમાં થયેલી હોડી દુર્ઘટના અંગે ઊંડા દુઃખની લાગણી વ્યક્ત કરી હતી. તેમણે મૃતકોના પરિવારજનો પ્રત્યે સંવેદના વ્યક્ત કરી અને આ મુશ્કેલ સમયમાં તેમને હિંમત મળે તેવી પ્રાર્થના કરી હતી. સાથે જ તેમણે હજુ પણ ગુમ થયેલા લોકોની સલામતી માટે પ્રાર્થના કરી હતી.
