જમ્મુ-કાશ્મીરના દક્ષિણ કાશ્મીરમાં આવેલા કુલગામ જિલ્લાના લારૂ વિસ્તારમાં સુરક્ષાદળો અને આતંકવાદીઓ વચ્ચે થયેલી અથડામણમાં લશ્કર-એ-તૈયબાના બે આતંકવાદીઓ માર્યા ગયા હોવાના અહેવાલ છે. તેમાં લશ્કરનો મોસ્ટ વોન્ટેડ કમાન્ડર લતીફ અહમદ ભટ પણ સામેલ હોવાનું જાણવા મળ્યું છે.
પ્રાપ્ત માહિતી અનુસાર, 11 નવેમ્બરે કુલગામના અખરાન વિસ્તારમાં CRPFની નાકા પાર્ટી પર આતંકવાદીઓએ હુમલો કર્યો હતો. મોટરસાઇકલ પર આવેલા આતંકીઓએ માત્ર 15 સેકન્ડમાં અંદાજે 30 રાઉન્ડ ફાયરિંગ કર્યું હતું. આ હુમલામાં CRPFના ત્રણ જવાનો ગંભીર રીતે ઘાયલ થયા હતા.

આ હુમલા બાદ સુરક્ષાદળોએ આતંકવાદીઓને શોધવા માટે મોટા પાયે સર્ચ ઓપરેશન શરૂ કર્યું હતું. સોમવારે જમ્મુ-કાશ્મીર પોલીસ, ભારતીય સેના અને CRPFની સંયુક્ત ટીમે લારૂ બાયપાસ વિસ્તારમાં ઘેરાબંધી કરીને કાર્યવાહી હાથ ધરી હતી. આ દરમિયાન આતંકવાદીઓએ ગોળીબાર કરતાં અથડામણ શરૂ થઈ હતી.
લતીફ ભટ પર હતું 15 લાખનું ઇનામ
લતીફ અહમદ ભટ સુરક્ષાદળોની વોન્ટેડ યાદીમાં સામેલ હતો અને તેના પર ₹15 લાખનું ઇનામ જાહેર કરવામાં આવ્યું હતું. તે દક્ષિણ કાશ્મીરમાં અનેક આતંકી ઘટનાઓમાં સંડોવાયેલો હોવાનો આરોપ હતો. આ વર્ષે જુલાઈમાં અનંતનાગના લાલ ચોક વિસ્તારમાં પોલીસકર્મીની હત્યા તેમજ કુલગામમાં છત્તીસગઢના બે શ્રમિકોની હત્યામાં પણ તેનું નામ સામે આવ્યું હતું.
500થી વધુ લોકોની પૂછપરછ
CRPF પર થયેલા હુમલા બાદ સુરક્ષાદળોએ લતીફ ભટ અને તેના સાથીઓને શોધવા માટે વ્યાપક અભિયાન ચલાવ્યું હતું. આ દરમિયાન 500થી વધુ શંકાસ્પદ લોકોની પૂછપરછ કરવામાં આવી હતી અને 20 લોકોને અટકાયતમાં લેવામાં આવ્યા હતા. તપાસ દરમિયાન લશ્કર અને TRF સાથે જોડાયેલા ત્રણ ઓવરગ્રાઉન્ડ વર્કર્સની પણ ઓળખ કરવામાં આવી હતી.
અહેવાલ મુજબ, અથડામણમાં લતીફ ભટનો સાથી ઉમર નિસાર પણ સામેલ હતો. જોકે, જાગરણના પ્રારંભિક અહેવાલમાં પોલીસ દ્વારા બંનેના મોત અથવા સાથીની ધરપકડ અંગે સત્તાવાર પુષ્ટિ બાકી હોવાનું જણાવાયું હતું.








