સુરત: ગુજરાતના સુરત સ્થિત ડિફેન્સ ટેક્નોલોજી ક્ષેત્રની કંપની ‘insideFPV’ એ દેશની સંરક્ષણ ક્ષમતાને મજબૂત બનાવવાની દિશામાં મોટી સિદ્ધિ હાંસલ કરી છે. કંપનીએ સ્વદેશી ટેક્નોલોજીથી તૈયાર કરેલા ‘અદ્વિક’ (Advik) નામના કામિકાઝે FPV ડ્રોનનું લદ્દાખમાં આશરે 18,000 ફૂટની ઊંચાઈએ પરીક્ષણ કર્યું છે. ખાસ વાત એ છે કે ઇલેક્ટ્રોનિક જામિંગ સિસ્ટમ સક્રિય હોવા છતાં ડ્રોનની ઉડાન અને ઓપરેટર સાથેનું કોમ્યુનિકેશન લિંક ચાલુ રહ્યું હતું. સફળ પરીક્ષણ બાદ આ ડ્રોન ભારતીય સેનાને સોંપવામાં આવ્યું છે.
જામિંગ સિસ્ટમ સામે પણ કામ કરશે ડ્રોન
આ પરીક્ષણ દરમિયાન એડવાન્સ્ડ ડ્રોન ડિફેન્સ સિસ્ટમ સહિતની ઇલેક્ટ્રોનિક વોરફેર સિસ્ટમ સક્રિય રાખવામાં આવી હતી. સામાન્ય રીતે દુશ્મન દેશો દ્વારા કરવામાં આવતા સિગ્નલ જામિંગને કારણે ડ્રોન અને તેને નિયંત્રિત કરતા ઓપરેટર વચ્ચેનો સંપર્ક તૂટી શકે છે. જોકે, અદ્વિક ડ્રોને આ પડકારનો સામનો કરીને પોતાની નિયંત્રણ ક્ષમતા જાળવી રાખી હતી.
કંપનીએ આ માટે બજારમાં મળતા સામાન્ય કોમ્યુનિકેશન પાર્ટ્સ પર આધાર રાખવાને બદલે સ્વદેશી RF (રેડિયો ફ્રિક્વન્સી) કોમ્યુનિકેશન સિસ્ટમ વિકસાવી છે. તેમાં ખાસ એન્ટેના રેક સિસ્ટમ અને અનેક RF સિસ્ટમને જોડતી કસ્ટમાઇઝ્ડ ટેક્નોલોજીનો ઉપયોગ કરવામાં આવ્યો છે.
18 હજાર ફૂટની ઊંચાઈએ કરવામાં આવ્યું પરીક્ષણ
લદ્દાખમાં આશરે 18,000 ફૂટની ઊંચાઈએ ડ્રોનનું પરીક્ષણ કરવું મોટો પડકાર હતો. આટલી ઊંચાઈએ હવા પાતળી હોવાથી ડ્રોનની ઉડાન અને પ્રોપેલરની કાર્યક્ષમતા પર અસર થાય છે. જ્યારે અત્યંત ઠંડીને કારણે બેટરીની ક્ષમતા પણ ઘટી શકે છે. આ તમામ પડકારો વચ્ચે ડ્રોને સફળતાપૂર્વક પોતાની કામગીરી જાળવી રાખી હતી.
ઓછા ખર્ચે સ્વદેશી ડ્રોન બનાવવાનો ઉદ્દેશ
કંપનીના ચીફ ટેક્નોલોજી ઓફિસર (CTO) દેયવંત ભારદ્વાજના જણાવ્યા અનુસાર, એન્ટી-જામિંગ ટેક્નોલોજી ધરાવતું ડ્રોન વધુ વજનદાર અને મોંઘું હોવું જરૂરી નથી. કંપનીનો ઉદ્દેશ ઓછા ખર્ચે, હળવા અને અસરકારક ટેક્ટિકલ ડ્રોન તૈયાર કરવાનો છે.
નિવૃત્ત મેજર જનરલ વિકાસ શર્માએ પણ આધુનિક યુદ્ધમાં મોટી સંખ્યામાં ઓછા ખર્ચે તૈયાર થઈ શકે તેવા કામિકાઝે ડ્રોનની જરૂરિયાત પર ભાર મૂક્યો હતો. તેમના મતે, ચોક્કસ હુમલા માટે ભારતને આશરે એક લાખ ઓછા ખર્ચે તૈયાર થઈ શકે તેવા કામિકાઝે ડ્રોનની જરૂર પડી શકે છે.
આ રીતે સુરતની કંપનીની આ સિદ્ધિ સ્વદેશી સંરક્ષણ ટેક્નોલોજી અને આત્મનિર્ભર ભારતની દિશામાં મહત્વપૂર્ણ પગલું બની શકે છે.
