બંગાળની ખાડીમાં સર્જાયેલું અત્યંત ગંભીર ચક્રવાતી વાવાઝોડું ‘અર્નબ’ 28 ઓક્ટોબર, 2026ની વહેલી સવારે આંધ્રપ્રદેશના દરિયાકાંઠે ત્રાટક્યું છે. વાવાઝોડાને કારણે દરિયાકાંઠાના વિસ્તારોમાં ભારે વરસાદ, તોફાની પવન અને જળભરાવની સ્થિતિ સર્જાઈ છે. ભારતીય હવામાન વિભાગ (IMD)ના જણાવ્યા અનુસાર, વાવાઝોડાની અસરને પગલે પવનની ઝડપ 125થી 135 કિમી પ્રતિ કલાક સુધી પહોંચી શકે છે, જ્યારે ઝટકાવાળા પવનની ઝડપ 150 કિમી પ્રતિ કલાક સુધી રહેવાની શક્યતા છે.
યાનમ અને કાકીનાડા સહિતના વિસ્તારોમાં ભારે અસર
ચક્રવાતનું લેન્ડફોલ બાપટલા અને વિશાખાપટ્ટનમ વચ્ચે, યાનમની દક્ષિણે શરૂ થયું છે. હવામાન વિભાગના અપડેટ મુજબ, સવારે વાવાઝોડાનું કેન્દ્ર નરસાપુરથી આશરે 30 કિમી પૂર્વમાં અને યાનમથી 45 કિમી દક્ષિણ-પશ્ચિમમાં હતું. લેન્ડફોલની પ્રક્રિયા કેટલાક કલાકો સુધી ચાલુ રહેવાની શક્યતા દર્શાવવામાં આવી હતી.
89 હજારથી વધુ લોકોને સુરક્ષિત સ્થળે ખસેડાયા
વાવાઝોડાના જોખમને ધ્યાનમાં રાખીને આંધ્રપ્રદેશમાં દરિયાકાંઠાના સંવેદનશીલ વિસ્તારોમાંથી ઓછામાં ઓછા 89 હજાર લોકોને સુરક્ષિત સ્થળોએ ખસેડવામાં આવ્યા હતા. રાહત શિબિરો તૈયાર કરવામાં આવી છે અને NDRF, SDRF સહિતની બચાવ ટીમોને એલર્ટ પર રાખવામાં આવી છે. વહીવટીતંત્ર દ્વારા વીજળી, આરોગ્યસેવાઓ અને રસ્તાઓ પરની અવરજવર પર નજર રાખવામાં આવી રહી છે.
ટ્રેન અને ફ્લાઇટ સેવાઓને અસર
ચક્રવાતને પગલે પરિવહન વ્યવસ્થા પણ ખોરવાઈ છે. અહેવાલો અનુસાર, દરિયાકાંઠાના વિસ્તારોમાં ઓછામાં ઓછી 50 ટ્રેનો રદ કરવામાં આવી હતી. જ્યારે વિજયવાડા અને વિશાખાપટ્ટનમ એરપોર્ટ પર પણ અનેક ફ્લાઇટ્સ રદ કરવામાં આવી હતી. ભારે વરસાદ અને તોફાની પવનને કારણે માર્ગ પરિવહન પર પણ અસર પડી છે.
નીચાણવાળા વિસ્તારોમાં પૂરનું જોખમ
હવામાન વિભાગે દરિયાકાંઠાના નીચાણવાળા વિસ્તારોમાં દરિયાના પાણી ઘૂસી આવવાની ચેતવણી આપી છે. ભારે વરસાદને કારણે રસ્તાઓ પર પાણી ભરાવા, વૃક્ષો ધરાશાયી થવા અને વીજળીના થાંભલાઓને નુકસાન થવાનું જોખમ છે. સ્થાનિક લોકોને સુરક્ષિત સ્થળે રહેવા અને વહીવટીતંત્રની સૂચનાઓનું પાલન કરવા અપીલ કરવામાં આવી છે.
