કેન્સરના દર્દીઓ માટે રાહતના સમાચાર સામે આવ્યા છે. કેન્દ્ર સરકારે કેન્સર વિરોધી કેટલીક દવાઓ પર ટ્રેડ માર્જિન એટલે કે વેપારીઓના નફાના માર્જિનને મહત્તમ 30 ટકા સુધી મર્યાદિત કરવાનો નિર્ણય લીધો છે. આ નિર્ણયથી કેટલીક દવાઓની કિંમતોમાં 70 ટકા સુધીનો ઘટાડો થઈ શકે છે. સાથે જ દર્દીઓને દર વર્ષે અંદાજે ₹2,500 કરોડની બચત થવાની શક્યતા છે.
સરકારના જણાવ્યા અનુસાર, સપ્લાય ચેઇન દરમિયાન કેટલીક કેન્સરની દવાઓની કિંમતો અનેક ગણી વધી જાય છે. નવા નિર્ણયથી દવાઓની કિંમતોમાં થતી મનસ્વી વધારાને નિયંત્રિત કરવામાં મદદ મળશે અને દર્દીઓ પર સારવારનો આર્થિક બોજ હળવો થઈ શકશે.
કઈ દવાઓ પર લાગુ થશે નવો નિયમ?
નવી યાદી નિષ્ણાત સમિતિ દ્વારા તૈયાર કરવામાં આવશે. આ નિયમ બ્રાન્ડેડ, જેનેરિક, ભારતમાં ઉત્પાદિત તેમજ વિદેશથી આયાત કરવામાં આવતી દવાઓ પર લાગુ થશે.
દવાઓની ઉપલબ્ધતા જળવાઈ રહે તે માટે સરકારે કંપનીઓને હાલનું ઉત્પાદન સ્તર જાળવી રાખવાનો પણ નિર્દેશ આપ્યો છે. આ પગલાથી મોંઘી કેન્સરની દવાઓની કિંમતોમાં ઘટાડો થવાની અને સામાન્ય પરિવારોને રાહત મળવાની આશા છે.
2019માં પણ સરકારે લીધો હતો નિર્ણય
કેન્દ્ર સરકારના જણાવ્યા અનુસાર, આ નિર્ણય વર્ષ 2019માં કરવામાં આવેલી પહેલનું આગળનું પગલું છે. તે સમયે કેન્સરની 526 બ્રાન્ડની દવાઓ પર કરવામાં આવેલી કાર્યવાહીથી દર વર્ષે આશરે ₹984 કરોડની બચત થવાનો અંદાજ વ્યક્ત કરવામાં આવ્યો હતો.
હવે બિન-અનુસૂચિત કેન્સર વિરોધી દવાઓ પર ટ્રેડ માર્જિન મહત્તમ 30 ટકા સુધી મર્યાદિત કરવાના નિર્ણયથી દર્દીઓ માટે સારવાર વધુ સસ્તી બનાવવાનો પ્રયાસ કરવામાં આવ્યો છે. આ પગલાથી દર વર્ષે અંદાજે ₹2,500 કરોડની બચત થવાની શક્યતા છે.
સુપ્રીમ કોર્ટે પણ દવાઓની કિંમતો અંગે ઉઠાવ્યા હતા સવાલ
તાજેતરમાં સુપ્રીમ કોર્ટે કેન્સરની દવાઓની કિંમતોમાં થયેલા વધારા અને ખાનગી હોસ્પિટલો દ્વારા વસૂલવામાં આવતા ઊંચા માર્જિન અંગે સવાલો ઉઠાવ્યા હતા. કેટલીક દવાઓની કિંમતોમાં અનેકગણો વધારો થવાના મુદ્દે કોર્ટે ચિંતા વ્યક્ત કરી હતી.
આવા સંજોગોમાં કેન્દ્ર સરકારનો આ નિર્ણય કેન્સરના દર્દીઓ માટે મહત્ત્વપૂર્ણ બની શકે છે. જોકે, દવાઓની વાસ્તવિક કિંમતોમાં કેટલો ઘટાડો થશે તે સંબંધિત દવાઓની યાદી અને લાગુ પડનારા નિયમો પર આધારિત રહેશે.
