શું તમે ક્યારેય કલ્પના કરી છે કે જે શિક્ષકને આપણે આપણાં બાળકોના ભવિષ્યના ઘડવૈયા માનીએ છીએ, તે જ જો રક્ષક મટીને ભક્ષક બને તો શું થાય? અમદાવાદના મણિનગર વિસ્તારમાં આવેલી જાણીતી પ્રગતિ સ્કૂલમાં એક એવી જ હચમચાવી દેનારી ઘટના પ્રકાશમાં આવી છે, જેણે સમગ્ર શિક્ષણ જગતને શરમાવી દીધું છે. અહીં એક કોમ્પ્યુટર શિક્ષકે ગુરુ-શિષ્યના પવિત્ર સંબંધને લજવીને ધોરણ 10ની એક વિદ્યાર્થિનીને નકલી ઈન્સ્ટાગ્રામ આઈડી બનાવીને અશ્લીલ મેસેજ મોકલ્યા હોવાનો પર્દાફાશ થયો છે. આ શરમજનક કરતૂતનો ભાંડો ફૂટતાં શાળા પરિસરમાં જ ભારે હોબાળો મચી ગયો હતો અને મામલો મારામારી સુધી પહોંચી ગયો હતો.
આ સમગ્ર ઘટનાની વિગતો મુજબ, આ લંપટ કોમ્પ્યુટર શિક્ષક છેલ્લા ઘણા સમયથી નકલી ઇન્સ્ટાગ્રામ એકાઉન્ટ મારફતે વિદ્યાર્થિનીને પરેશાન કરતો હતો. વિદ્યાર્થિનીના એક જાગૃત મિત્રને આ બાબતે શંકા જતાં તેણે પોતાના સ્તરે તપાસ આદરી હતી. તપાસમાં એવો ચોંકાવનારો ખુલાસો થયો કે મેસેજ કરનાર વિકૃત માનસિકતા ધરાવતો વ્યક્તિ બીજું કોઈ નહીં, પરંતુ સ્કૂલનો જ શિક્ષક છે. સત્ય સામે આવતા રોષે ભરાયેલા મિત્રએ શાળામાં જઈને શિક્ષકનો મોબાઈલ ચેક કર્યો હતો, જેમાં અનેક નકલી આઈડીઓ મળી આવી હતી. આ પુરાવા જોતાં જ આક્રોશિત થયેલા યુવાને શિક્ષકનો ફોન ફેંકી દીધો હતો અને તેને શાળામાં જ લાફા ઝીંકી દીધા હતા. શિક્ષકની ધોલાઈનો આ વીડિયો પણ સોશિયલ મીડિયા પર ભારે વાયરલ થયો છે.
આ મામલો ગરમાતાં વાત પોલીસ સ્ટેશન સુધી પહોંચી હતી. જોકે, પોલીસ સ્ટેશનમાં બંને પક્ષો વચ્ચે સમાધાન થઈ ગયું હતું. પ્રગતિ સ્કૂલના પ્રિન્સિપાલ શૈલેન્દ્ર યાદવે આ અંગે સ્પષ્ટતા કરતા જણાવ્યું હતું કે, ઘટનાની જાણ થતાં જ પોલીસને માહિતી આપવામાં આવી હતી અને શાળા કક્ષાએ પણ તપાસ કરવામાં આવી હતી. પૂછપરછમાં શિક્ષકે એવું વાહિયાત બહાનું રજૂ કર્યું હતું કે તે પોતાની પત્નીને મેસેજ કરવા જતો હતો અને ભૂલથી વિદ્યાર્થિનીને મોકલાઈ ગયો હતો. પરંતુ, શાળા સંચાલકોએ આ ગંભીર ગેરવર્તણૂકને સાંખી ન લેતા તાત્કાલિક અસરથી આ શિક્ષકને ટર્મિનેટ (નોકરીમાંથી બરતરફ) કરી દીધો છે.
