પાકિસ્તાનના બલૂચિસ્તાન પ્રાંતમાંથી માનવતાને શરમાવે અને કાળજું કંપી ઉઠે તેવી એક અત્યંત આઘાતજનક ઘટના સામે આવી છે. આજના આધુનિક યુગમાં જ્યાં માસૂમ બાળકોનું રક્ષણ થવું જોઈએ, ત્યાં એક કુરિવાજના નામે માત્ર ૩ વર્ષની બાળકીનો સોદો ૬૦ વર્ષના વૃદ્ધ સાથે કરી દેવામાં આવ્યો હતો. ચોંકાવનારી વાત એ છે કે આ વેપાર બીજા કોઈએ નહીં પરંતુ બાળકીના સગા પિતાએ ૨૫ લાખ પાકિસ્તાની રૂપિયા મેળવવાની લાલચમાં કર્યો હતો. જે વ્યક્તિ સાથે લગ્ન નક્કી થયા તે સંબંધમાં બાળકીનો જીજા થાય છે! સોશિયલ મીડિયા પર આ ઘટના સામે આવતાં જ ભારે જનરોશ ફાટી નીકળ્યો છે અને સમગ્ર વિશ્વમાં આ કુરિવાજની કડક ટીકા થઈ રહી છે.
મળતી માહિતી મુજબ, બલૂચિસ્તાનના સરહદી શહેર ચમનમાંથી પોલીસે કાર્યવાહી કરીને બાળકીના પિતા અબ્દુલ બાકીની ધરપકડ કરી લીધી છે. અબ્દુલ બાકીએ પોતાની ૩ વર્ષની દીકરીના બદલામાં ૬૦ વર્ષના સલાહુદ્દીન પાસેથી ૨૫ લાખ પાકિસ્તાની રૂપિયા લેવાનું નક્કી કર્યું હતું. આ વ્યવહાર પશ્તૂન સમુદાયની ‘વાલવાર’ (દુલહનની કિંમત) નામે ઓળખાતી એક જૂની પરંપરા હેઠળ થયો હતો. આ રસ્મમાં વરપક્ષ દ્વારા કન્યાના પરિવારને નાણાં આપવામાં આવે છે. જોકે, પૂરી રકમ ચૂકવાય તે પહેલાં જ આ મામલો સ્થાનિક માનવાધિકાર કાર્યકરોના ધ્યાને આવી ગયો હતો, જેથી આ લગ્ન માત્ર કાગળ પર જ રહી ગયા હતા.
મોટી બહેનની હત્યા અને ભૂતકાળનો વિવાદ
આ કેસમાં એક ભયાનક ભૂતકાળ પણ સામે આવ્યું છે. પીડિત બાળકીની મોટી બહેનના લગ્ન સલાહુદ્દીનના પુત્ર સાથે થયા હતા. આરોપ છે કે તેની હત્યા કરી નાખવામાં આવી હતી અને આ મામલે પોલીસ તપાસ ચાલી રહી છે. આ ઘટના બાદ સલાહુદ્દીને પોતાના સસુર (અબ્દુલ બાકી) પાસે નાની દીકરીના લગ્ન પોતાની સાથે કરાવવાની માંગ કરી હતી અને આ જૂની પરંપરાનો સહારો લઈને ૨૫ લાખ રૂપિયામાં સોદો નક્કી કરી લીધો હતો.
સરકાર અને પોલીસની કડક કાર્યવાહી
બલૂચિસ્તાનના મુખ્યમંત્રી મીર સરફરાઝ બુગટીએ આ ઘટનાની ગંભીરતા જોઈને અધિકારીઓને ઔપચારિક ફરિયાદની રાહ જોયા વગર જ ત્વરિત કાર્યવાહી કરવા આદેશ આપ્યા હતા. બલૂચિસ્તાન પોલીસના જેન્ડર મામલાના આસિસ્ટન્ટ ઇન્સ્પેક્ટર જનરલ ઇસરા૨ અહમદના જણાવ્યા મુજબ, પોલીસે તરત જ પિતા અબ્દુલ બાકીને જેલભેગો કર્યો હતો, જ્યારે માસૂમ બાળકી અને તેની માતાને પોલીસ સુરક્ષામાં રાખવામાં આવ્યા છે. હાલ ૬૦ વર્ષનો આરોપી સલાહુદ્દીન ફરાર છે અને તેને પકડવાના ચક્રો ગતિમાન કરાયા છે.
ઉલ્લેખનીય છે કે, ‘બલૂચિસ્તાન બાળ વિવાહ રોકથામ અધિનિયમ’ હેઠળ લગ્ન માટે લઘુત્તમ વય ૧૮ વર્ષ નક્કી કરાઈ છે. આ કાયદાના ઉલ્લંઘન બદલ દોષિતને ૩ વર્ષની જેલ અને ૧ લાખથી ૨ લાખ પાકિસ્તાની રૂપિયા સુધીના દંડની જોગવાઈ છે.
