બિહારના સમસ્તીપુર જિલ્લામાં સગીરા સાથે રસ્તા વચ્ચે અભદ્ર વર્તન કર્યાની શરમજનક ઘટના સામે આવી છે. મળતી માહિતી મુજબ, કેટલાક શખ્સોએ સગીરાને રસ્તા પર ઘેરી લીધી હતી અને તેની સાથે અભદ્રતા કરી હતી. ઘટનાને લઈને સ્થાનિકોમાં રોષ જોવા મળી રહ્યો છે.
આ ઘટનાનો વીડિયો સોશિયલ મીડિયા પર વાયરલ થયો હોવાનો પણ દાવો કરવામાં આવી રહ્યો છે. મામલો સામે આવ્યા બાદ પોલીસ દ્વારા ઘટનાની તપાસ હાથ ધરવામાં આવી છે અને સંડોવાયેલા શખ્સો સામે કાર્યવાહી કરવાની પ્રક્રિયા શરૂ કરવામાં આવી છે.
સગીરા સાથે યુવકોની ગેરવર્તણૂક, વીડિયો વાયરલ
કિશોરના ત્યાંથી જતા રહ્યા બાદ એકલી પડેલી સગીરાને કેટલાક યુવકોએ ઘેરી લીધી હતી. આ દરમિયાન તેની સાથે ગેરવર્તણૂક કરવામાં આવી હોવાનો મામલો સામે આવ્યો છે. વાયરલ વીડિયોમાં સગીરા યુવકોનો વિરોધ કરતી અને પોતાનો બચાવ કરવાનો પ્રયાસ કરતી જોવા મળે છે.
આરોપ છે કે યુવકો સગીરા પર દબાણ કરી તેનું સરનામું પૂછી રહ્યા હતા. સગીરાએ સાથે આવેલા કિશોરને પોતાનો ભાઈ ગણાવતા યુવકોએ તેની સાથે અભદ્ર ભાષામાં વાત કરી હતી. સમગ્ર ઘટનાનો વીડિયો કોઈ વ્યક્તિએ મોબાઈલમાં રેકોર્ડ કરી સોશિયલ મીડિયા પર પોસ્ટ કર્યો હતો, જે બાદમાં વાયરલ થયો હતો.
વીડિયો સામે આવતા પોલીસની કાર્યવાહી
વીડિયો સોશિયલ મીડિયા પર વાયરલ થયા બાદ સમસ્તીપુર પોલીસ હરકતમાં આવી હતી. સમસ્તીપુરના એસપી અરવિંદ પ્રતાપ સિંહે ઘટનાની પુષ્ટિ કરી તપાસ શરૂ કરવામાં આવી હોવાનું જણાવ્યું છે. પોલીસે વીડિયો અને અન્ય માહિતીના આધારે સંડોવાયેલા યુવકોની ઓળખ કરવાની કાર્યવાહી હાથ ધરી છે અને કડક કાર્યવાહી કરવાની ખાતરી આપી છે.
