સુરતના કાપડ ઉદ્યોગના ઇતિહાસમાં અહંકાર અને ગુસ્સાથી સર્જાયેલી એક એવી ઘટના સામે આવી છે, જે સાંભળીને ભલભલા વેપારીઓ ચોંકી ગયા છે. એક પૂર્વ કર્મચારી અને શેઠ વચ્ચે માત્ર ₹10 હજારના બાકી પગારના વિવાદે સુરતના શ્યામ સંગીની માર્કેટને આગની ભયાનક લપેટમાં ધકેલી દીધું હતું. આ કોઈ અકસ્માત કે શોર્ટ સર્કિટ નહોતું, પરંતુ બદલો લેવાની ભાવનાથી રચેલું એવું ષડયંત્ર હતું જેમાં ₹24 કરોડના કાપડનો જથ્થો બળીને રાખ થઈ ગયો હતો. સુરત ક્રાઈમ બ્રાન્ચે આ સનસનીખેજ કેસ ઉકેલીને એ સાબિત કર્યું છે કે ક્રોધમાં ઉઠાવેલું એક પગલું કેટલું વિનાશક સાબિત થઈ શકે છે.
ગત 9 સપ્ટેમ્બરના રોજ મોડી રાત્રે સારોલી વિસ્તારમાં આવેલા શ્યામ સંગીની ટેક્સ્ટાઇલ માર્કેટના છઠ્ઠા માળે વિકરાળ આગ ફાટી નીકળી હતી. આ ઘટનામાં 14 જેટલી દુકાનો અને કરોડો રૂપિયાનો સામાન બળીને ખાખ થઈ ગયો હતો. શરૂઆતમાં આ આગ શોર્ટ સર્કિટથી લાગી હોવાનું અનુમાન હતું. પરંતુ પોલીસ તપાસ દરમિયાન જ્યારે શહેરના 1500થી વધુ CCTV કેમેરા ફૂટેજ ચકાસવામાં આવ્યા, ત્યારે એક અજાણ્યો શખ્સ મોઢે રૂમાલ બાંધીને રાતના સમયે કાપડના પાર્સલ પર પેટ્રોલ છાંટી આગ લગાવતો નજરે પડ્યો. આ ફૂટેજે સમગ્ર ઘટનાની દિશા જ બદલી નાખી.
પોલીસે ટેકનિકલ સર્વેલન્સ અને હ્યુમન ઇન્ટેલિજન્સની મદદથી મહારાષ્ટ્રના ધુલિયાના વતની અને હાલ ડિંડોલીમાં રહેતા 33 વર્ષીય વિનોદ પંડિત સાવલેની ધરપકડ કરી છે. પૂછપરછમાં સામે આવ્યું કે વિનોદ એપ્રિલ મહિનાથી માર્કેટમાં એક દુકાનમાં માસિક ₹30,000ના પગારથી એકાઉન્ટન્ટ તરીકે કામ કરતો હતો. જોકે, માલિક હનુમાન જવર સાથે કામ બાબતે ઘર્ષણ થતાં તેને વારંવાર અપમાનિત થવું પડતું હતું. ‘એકાઉન્ટનું કામ આવડતું નથી’ તેવા મહેણાંથી કંટાળીને તેણે નોકરી છોડી દીધી, પરંતુ તેના બાકી નીકળતા ₹10,000 ચૂકવવામાં માલિકે ગલ્લાં-તલ્લાં કર્યા હતા. શેઠને ‘પાઠ ભણાવવા’ તેણે દેવધ ગામના પેટ્રોલ પંપથી ₹150નું પેટ્રોલ ખરીદ્યું અને રાત્રે 12:30 વાગ્યાની આસપાસ માર્કેટ સુમસાન થતાં જ કાપડના પાર્સલ પર પેટ્રોલ છાંટીને આગ લગાડી દીધી હતી.
આગ લગાવ્યા બાદ વિનોદ ત્યાંથી નાસી છૂટ્યો હતો. બીજે દિવસે અગ્નિકાંડના સમાચાર અને સીસીટીવી ફૂટેજ વાયરલ થતાં તે ગભરાઈ ગયો અને પોતાનો મોબાઈલ બંધ કરીને પરિવાર સાથે રાજસ્થાનના ખાટુશ્યામ તેમજ ત્યાંથી અયોધ્યા ભાગી ગયો હતો. જોકે, આખરે તે સુરત પરત ફર્યો ત્યારે ડિંડોલીના ફ્લાવર ગાર્ડન પાસેથી ક્રાઈમ બ્રાન્ચના હાથે ઝડપાઈ ગયો. હાલ પોલીસે તેને સારોલી પોલીસ સ્ટેશનને સોંપી વધુ કાયદેસરની કાર્યવાહી હાથ ધરી છે. માત્ર દસ હજાર રૂપિયા માટે થયેલો આ કાંડ વેપારીઓ અને કર્મચારીઓ બંને માટે એક મોટો બોધપાઠ સમાન બની ગયો છે.
