અમદાવાદમાં જિમની મેમ્બરશિપ લેવા આવેલા લોકો માટે એક એવી સ્કીમ કથિત રીતે ચલાવવામાં આવી, જેમાં માત્ર રૂ.10 હજારમાં 10 વર્ષની મેમ્બરશિપ આપવાનું કહી 1500થી વધુ ગ્રાહકો પાસેથી રૂ.1.66 કરોડથી વધુ વસૂલવામાં આવ્યા હોવાનો આરોપ છે. ચોંકાવનારી વાત એ છે કે આ સ્કીમની સમયમર્યાદા પૂરી થઈ ગયા બાદ પણ તે માલિકની ગેરહાજરીમાં ચાલુ રાખવામાં આવી હોવાની ફરિયાદ સામે આવી છે. સમગ્ર મામલે જિમના માલિકે ક્રાઈમ બ્રાન્ચની આર્થિક ગુના નિવારણ શાખામાં ફરિયાદ નોંધાવી છે.
ફરિયાદ મુજબ, ગાંધીનગરના સુઘડ વિસ્તારમાં રહેતા વિજય સેંગર ‘જિમ લોન્જ’ નામથી જિમ ચલાવે છે અને તેની અનેક શાખાઓ આવેલી છે. જિમના 10 વર્ષ પૂર્ણ થવાના પ્રસંગે 1 જુલાઈથી 10 જુલાઈ સુધી રૂ.10 હજારમાં 10 વર્ષની મેમ્બરશિપની ખાસ ઓફર શરૂ કરવામાં આવી હતી. 10 જુલાઈ બાદ આ સ્કીમ બંધ કરી નિયમિત દરે મેમ્બરશિપ આપવાની હતી.
આ દરમિયાન વિજય સેંગર નવા પ્રોજેક્ટના કામે આશરે બે મહિના બહારગામ ગયા હતા. તેમની ગેરહાજરીમાં જિમની જવાબદારી સેન્ટર હેડ જૈનિશ શુક્લા અને બ્રાન્ચ મેનેજર મનીષ શર્માને સોંપવામાં આવી હતી. ફરિયાદમાં આક્ષેપ છે કે બંનેએ બંધ થઈ ગયેલી 10 વર્ષની સ્કીમ ફરી શરૂ કરી અને અલગ-અલગ બ્રાન્ચના સ્ટાફને પણ આ સ્કીમ ચાલુ હોવાનું જણાવ્યું હતું.
10 સપ્ટેમ્બરે વિજય સેંગર પરત ફર્યા ત્યારે કેટલાક ગ્રાહકો 10 વર્ષની મેમ્બરશિપની ફી ભર્યાના પુરાવા સાથે જિમમાં આવ્યા હતા. પરંતુ તપાસ કરતાં આ રકમ જિમના સત્તાવાર બેંક ખાતામાં જમા થઈ ન હોવાનું સામે આવ્યું હતું. ફરિયાદ અનુસાર, મનીષ શર્મા ગ્રાહકોને સ્કીમ સમજાવી UPI અને રોકડ મારફતે રકમ લેતો અને ત્યારબાદ મેમ્બરશિપ આપતો હતો.
ફરિયાદમાં વધુ ગંભીર આક્ષેપ એ છે કે જૈનિશ શુક્લાએ પોતાની પત્ની ભારતી શુક્લા સાથે જિમમાં ભાગીદારી દર્શાવતો કથિત ખોટો એગ્રીમેન્ટ તૈયાર કર્યો હતો. આ દસ્તાવેજના આધારે ‘જિમ લોન્જ’ સાથે મળતા નામે બેંક ખાતું ખોલાવી તેમાં પણ મેમ્બરશિપની રકમ લેવામાં આવી હોવાનો આરોપ છે.
ફરિયાદ મુજબ જૈનિશ શુક્લા, મનીષ શર્મા અને ભારતી શુક્લા સાથે મળીને 1500થી વધુ ગ્રાહકો પાસેથી રૂ.1.66 કરોડથી વધુની રકમ UPI, રોકડ અને બેંક ખાતા મારફતે મેળવી હોવાનો આક્ષેપ છે. ફરિયાદ બાદ પોલીસે મામલાની તપાસ શરૂ કરી છે. બેંક ટ્રાન્ઝેક્શન, UPI પેમેન્ટ, ગ્રાહકોની મેમ્બરશિપ અને આરોપીઓની ભૂમિકા અંગે વધુ તપાસ ચાલી રહી છે.
