જે ઉંમરે બાળકો ગણિતના હોમવર્કથી બચવાના રસ્તા શોધતા હોય છે, એ જ ઉંમરે ઓસ્ટ્રેલિયાના નોઆ વિલિયમ્સે ગણિતને સરળ બનાવવા કોડિંગનો રસ્તો પસંદ કર્યો હતો. મેલબર્નના આ બાળ પ્રોગ્રામરે માત્ર 6 વર્ષની ઉંમરે C++ શીખી કમ્પ્યુટરને ગણિતીય ગણતરીમાં મદદરૂપ બનાવવાનું શરૂ કર્યું અને પછી માત્ર 8 વર્ષ 307 દિવસની ઉંમરે Guinness World Recordsમાં સૌથી નાની ઉંમરના કમ્પ્યુટર પ્રોગ્રામર તરીકે સ્થાન મેળવ્યું.
6 વર્ષની ઉંમરે શરૂ થયો કોડિંગનો સફર
નોઆ વિલિયમ્સનો જન્મ 5 ઓક્ટોબર 2016ના રોજ થયો હતો અને તે મેલબર્ન, ઓસ્ટ્રેલિયામાં રહે છે. નાનપણથી જ તેને વિજ્ઞાન, ટેક્નોલોજી, એન્જિનિયરિંગ અને ગણિતમાં રસ હતો. તેણે માઇક્રોબિટ કિટ અને અન્ય પ્રોજેક્ટ્સથી શરૂઆત કરી અને 6 વર્ષની ઉંમરે C++ પ્રોગ્રામિંગ લેંગ્વેજ શીખી લીધી. ત્યારબાદ તેણે કમ્પ્યુટરની મદદથી ગણિતીય ગણતરીઓને સરળ બનાવતા પ્રોગ્રામ્સ બનાવવાનું શરૂ કર્યું હતું.
અહીં એક મહત્વની વાત એ છે કે નોઆએ કોડિંગને માત્ર શોખ તરીકે નહીં, પરંતુ કોઈ સમસ્યાનો ઉકેલ શોધવાના સાધન તરીકે અપનાવ્યું હતું. એટલે કે ગણિતના કામને કમ્પ્યુટર પ્રોગ્રામિંગ સાથે જોડીને તેણે ટેક્નોલોજી પ્રત્યેનો પોતાનો રસ વધુ વિકસાવ્યો હતો. તેણે અત્યાર સુધી 15થી વધુ કમ્પ્યુટર પ્રોગ્રામ બનાવ્યા છે, જેમાં 8 પ્રોગ્રામમાં C++ અને Pythonનો ઉપયોગ થયો છે.
7 વર્ષની ઉંમરે Mensaમાં પ્રવેશ
નોઆની બીજી મોટી સિદ્ધિ પણ નાની ઉંમરે જ આવી. 7 વર્ષની ઉંમરે તેઓ હાઇ-IQ સોસાયટી Mensaના સભ્ય બન્યો હતો. તેના IQ ટેસ્ટનો સ્કોર 99.9th percentileમાં હતો, એટલે ટેસ્ટ આપનારી વસ્તીમાં તે ટોચના 0.1 ટકા જૂથમાં આવ્યો હતો.
8 વર્ષ 307 દિવસમાં વર્લ્ડ રેકોર્ડ
નોઆનો સત્તાવાર રેકોર્ડ એક પ્રોગ્રામ સાથે જોડાયેલો છે. નોઆની ઉંમર 8 વર્ષ 307 દિવસ હતી ત્યારે એક સ્વતંત્ર ફર્મે તેનો બનાવેલો કમ્પ્યુટર પ્રોગ્રામ પ્રકાશિત કર્યો હતો. ત્યારબાદ તેને ‘Youngest person to programme computers (male)’નો Guinness World Records ખિતાબ મળ્યો હતો.
હવે રોબોટ્સ અને ડ્રોન પર નજર
કોડિંગ બાદ નોઆનો રસ હવે રોબોટિક્સ અને ડ્રોન સુધી પણ પહોંચી ગયો છે. Guinnessની 2027 Young Achievers પ્રોફાઇલમાં તેને કમ્પ્યુટર પ્રોગ્રામિંગ ક્ષેત્રના યુવા પ્રતિભાશાળી તરીકે દર્શાવવામાં આવે છે. નોઆના જણાવ્યા મુજબ કોડિંગની મૂળભૂત બાબતો શીખ્યા પછી સર્જનાત્મક શક્યતાઓ ઘણી વધી જાય છે.
